02/10/2026
විශේෂ දිස්ත්‍රික් සම්බන්ධීකරණ කමිටු රැස්වීම - මොනරාගල දිස්ත්‍රික්කය.
===================================
කෘෂිකර්ම පසු සම්පත් ඉඩම් හා වාරිමාර්ග ගරු අමාත්‍ය කේ.ඩී.ලාල්කාන්ත මැතිතුමා හා පරිසර ගරු අමාත්‍ය වෛද්‍ය ධම්මික පටබැඳි මැතිතුමාගේ ප්‍රධානත්වයෙන් විශේෂ දිස්ත්‍රික් සම්බන්ධීකරණ කමිටු රැස්වීමක් පසුගිය (01) දින සන්ධ්‍යාවේ මොනරාගල දිස්ත්‍රික් ලේකම් කාර්යාලීය ප්‍රධාන ශ්‍රවණාගාරයේදී පවත්වන ලදී .
කෘෂිකාර්මික දිස්ත්‍රික්කයක් වන මොණරාගල දිස්ත්‍රික්කයේ,ගොවි ජනතාවගේ ජන ජීවිතය අභියෝගයට ලක්වී තිබීම,ඔවුන් මුහුණ දෙන ගැටලු පිළිබඳව මෙහිදී සාකච්ඡා කරන ලදී.
ඒ අනුව,
● රක්ෂිත මායිම් ලෙස සලකුණු කර ඇතිි ඉඩම් කොටස්වල ගොවි ප්‍රජාව;හේන් වගාවන් සිදුකර තිබීම හේතුවෙන් මතුව පවතින ඉඩම් ගැටලු පිළිබඳ මෙහිදී සාකච්ඡා කළ අතර,වගා කර ඇති ගොවීන්ට මෙම කන්නයේ එම වගාව කරගෙන යෑම සඳහා අවස්ථාව ලබා දීමටත් නව වගා සඳහා අවසර ලබා නොදීමට මෙහිදී තීරණය කරන ලදී.
● මරගල සංවේදී පරිසර කලාපයක් ලෙස ගැසට් කිරීමේදී මොනරාගල නගරය,ප්‍රධාන මාර්ග,මහජනතාවගේ පෞද්ගලික ඉඩම් එම කලාපයට අයත් වී තිබීම,හේතුවෙන් එය ගැටලුකාරී තත්ත්වයක් වන බැවින් ගැසට් පත්‍ර සංශෝධනයක් සිදු කළ යුතු බව මෙහිදී සාකච්ඡා කරන ලදී.
● වන වගාවන්හි නිරත ගොවියන්ගේ ඉඩම්; වාණිජ වගා සඳහා වෙන්කර ගැනීමේ ගැටලුව පිළිබඳවත්, තණමල්විල නිකවැව කොහොඹ වගා බිමට පැමිණෙන අලින්ගෙන් සිදුවන තර්ජන හේතුවෙන් පවතින ගැටලුව පිළිබඳවත්,එම තර්ජන අවම කිරීම සඳහා එම කොහොඹ වගා භූමිය ප්‍රාදේශීය ලේකම් වෙත භාරදී යටිකැලේ ශුද්ධ පවිත්‍ර කිරීම සුදුසු බවත්ද මෙහිදී සාකච්ඡා කරන ලදි.
● දහයියාගල රක්ෂිතය සම්බන්ධව පවතින ගැටලුව පිළිබඳවත්,
● තණමල්විල ලුණුගම්වෙහෙර වනජීවී කලාපය ගැසට් කිරීම පිළිබඳව පවතින ගැටලු සම්බන්ධවත්
● කතරගම යෝජිත කඳ සුරිඳුගම රක්ෂිත මායිම් නිරවුල්කර නව මායිම් ගැසට් කිරීම පිළිබඳවත්
● බුත්තල තේක්ක වගා භූමියෙන් පොදු ක්‍රීඩාංගණය සඳහා අක්කර 10 ක් වෙන් කිරීම පිළිබඳවත්,
මෙහිදී සාකච්ඡා කරන ලදී.
කුඹුක්කන් ඔය ජලාශ ව්‍යාපෘතිය හේතුවෙන් ඉඩම් අහිමිවන පවුල් 301 ක් නැවත පදිංචි කිරීම සඳහා ඉඩම් ලබාදීමට සිදුවන බවත්,ඔවුන්ගේ රබර්,ගම්මිරිස්, රඹුටන් වැනි වගා ඉඩම් අහිමි වීම වෙනුවෙන් වගාව සඳහා ඉඩම් ලබාදීමට ද සිදුවන බවත්,ජලාශය ඉදිකිරීම සඳහා අක්කර 1100 ක භූමි භාගයක අවශ්‍යතාවය පිළිබඳවත්,මේ පිළිබඳව නැවත ක්ෂේත්‍ර පරික්ෂාවක් සිදු කිරීම සුදුසු බවත් මෙහිදී සාකච්ඡා කරන ලදී.
මෙම අවස්ථාව සඳහා දිස්ත්‍රික් සම්බන්ධීකරණ කමිටු සම සභාපති,වෙළඳ,වාණිජ,ආහාර සුරක්ෂිතතා නියෝජ්‍ය අමාත්‍ය හා මොණරාගල දිස්ත්‍රික් ගරු පාර්ලිමේන්තු මන්ත්‍රී ආර්.එම් ජයවර්ධන මැතිතුමා,මොනරාගල දිස්ත්‍රික් ගරු පාර්ලිමේන්තු මන්ත්‍රී රුවන් විජේවීර ගුණවර්ධන මැතිතුමා,මොනරාගල දිස්ත්‍රික් ගරු පාර්ලිමේන්තු මන්ත්‍රී එච්.එම් සරත් කුමාර මැතිතුමා,ගරු පාර්ලිමේන්තු මන්ත්‍රී අජිත් ශාන්ත ප්‍රියදර්ශන මැතිතුමා,ගරු පාර්ලිමේන්තු මන්ත්‍රීනී එම්.ඒ.සී.එස්.චතුරි ගංගානි මැතිතුමිය ඇතුළු මොණරාගල දේශපාලන අධිකාරිත්වය හා මොනරාගල දිස්ත්‍රික් ලේකම් ඒ.ජී.නිශාන්ත මහතා,අතිරේක දිස්ත්‍රික් ලේකම්වරුන්,වනජීවී හා වන සංරක්ෂණ අමාත්‍යාංශයේ අතිරේක ලේකම් ඩී.සී.පී.උදය කුමාර මහතා,පරිසර අමාත්‍යාංශයේ නියෝජ්‍ය අමාත්‍ය පෞද්ගලික ලේකම් අකලංක ඒකනායක මහතා,වනජීවී සංරක්ෂණ දෙපාර්තමේන්තුවේ අධ්‍යක්ෂ ජනරාල් එස්.එම්.එල්.ආර්.පී.මාරසිංහ මහතා,වන රක්ෂක දෙපාර්තමේන්තුවේ වන රක්ෂක ජනරාල් එස්.සී.පාලමකුඹුර මහතා,ප්‍රාදේශීය ලේකම්වරුන් ඇතුළු රාජ්‍ය නිලධාරි මහත්ම මහත්මින් පිරිසක් සහභාගි විය.
දිස්ත්‍රික් මාධ්‍ය ඒකකය,
මොනරාගල.
