23/04/2026
غلاء الخضرة والفواكه فالمغرب… معاناة يومية ديال المواطن
فهاد الأيام، ولات الخضرة والفواكه فالمغرب طالعة بزاف فالثمن، حتى ولى المواطن البسيط ما قادرش يواكب هاد الغلاء. الطماطم، البطاطا، البصل وحتى الفواكه بحال التفاح والموز، كاملين تزادو فالثمن بشكل كبير، وهاد الشي خلا بزاف ديال العائلات تحيد بزاف من الحوايج من الماكلة اليومية ديالها.
الناس كيتسائلو: فين غاديين بهاد الوضع؟ واش المشكل فقلة التساقطات؟ ولا فالمضاربة ديال الشناقة؟ ولا فالتصدير اللي كيأثر على السوق الداخلية؟ حيت بزاف كيشوفو باللي الثمن فالسوق المحلي ما بقىش معقول، خصوصاً مع ضعف القدرة الشرائية.
المواطن اليوم ولى كيقلب على الأقل، كيشري غير الضروري، وكيتخلى على بزاف ديال الحوايج اللي كانت عادية من قبل. وهاد الشي كيزيد يضغط على الحياة اليومية، خصوصاً فالأحياء الشعبية والبادية.
الكل كينتظر تدخل الجهات المعنية باش تراقب الأسواق وتحد من المضاربة، وتلقى حلول ترجع التوازن للأسعار، حيث ماشي معقول تبقى الخضرة والفواكه، اللي هما أساس التغذية، خارج متناول بزاف ديال المغاربة.
في الاخر الله المستعان
بقلم محمد الزلاك
