01/07/2026
Сакам искрено да му се заблагодарам на премиерот Hristijan Mickoski за довербата што ми ја укажа да го водам Министерството за земјоделство, шумарство и водостопанство изминатите две години.
Кога ја презедовме одговорноста, заедно со мојот тим затекнавме обрасната и запуштена нива – институционален хаос, неисплатени субвенции, блокирани проекти и разочарани земјоделци.
Не ветувавме чуда, ветивме работа и напорно деноноќно работевме.
Во првите 18 дена донесовме Методологија за пресметка на трошоците за производство на килограм винско грозје. Донесени се повеќе од 150 плански документи на самото Министерство, над 50 правилници согласно Законите од областа.
Паралелно се донесоа измени на закони со цел доуредување на области - Законот за земјоделско земјиште, Законот за земјоделство и рурален развој, Законот за уредување на пазарите и Законот за шумите.
Во постапка е формирање на кредитен револвинг фонд за откуп на земјоделски производи.
За две години исплатени се над 15 милијарди денари тековни и заостанати обврски кон земјоделците.
Го укинавме и двојното пријавување, односно бирократијата која што ја имаше воведено претходната власт.
Ги придвиживме проектите, обезбедивме повисоки откупни цени за грозјето и тутунот, за првпат беа откупени околу 300.000 тони домашна пченица, а стоковните резерви започнаа да се полнат со домашна пченица и ориз.
Склучивме над 2.100 договори за користење на околу 6.000 хектари државно земјоделско земјиште, подготвивме нов јавен повик за распределба на државно земјоделско земјиште кој во скоро време ќе се објави.
По 6 години повторно беше извршено порибување на Охридското Езеро со околу еден милион единки охридска пастрмка и се доделија зоните за стопански и рекреативен риболов.
Се објавија 4 јавни повици за вкупно 110 ловишта, денеска имаме склучени 71 нов договор со нови корисници на дивечот, а 39 постапката се уште тече и многу скоро и таа ќе биде завршена.
Годинава повторно се потпиша колективен договор за вработените во Министерството, но и се спроведе постапка за признавање на бенефициран стаж на припадниците на Шумската полиција и кадровска доекипираност.
Министерството напорно работеше да биде поблиску до сите оние кои што се корисници, земјоделците, се отворија нови подрачни единици и подрачни канцеларии во Ново Село, Јегуновце, Босилово, Могила, Новаци, Росоман, се работеше и на подобрување на условите за работа во Министерството и подрачните единици.
Скоро сите проекти од програмата за работа на Владата во областа од земјоделството се завршени или се во одмината фаза на реализирање.
Со кампањата „Македонско најдобро“, ја афирмираме вредноста на домашното производство и македонските производи.
Но, мојот мандат не го поминав затворен во канцелариите на Министерството. Напротив, овие изминати две години бев постојано на терен, меѓу земјоделците на нивите, овоштарниците, лозјата, шталите затоа што верувам дека најдобрите политики се креираат од теренот.
Речиси и да нема населено место што не го посетив и во кое не остварив средба со земјоделците, ги сослушав нивните проблеми, идеи и предлози. Изминатиот период имавме ја спроведовме и кампањата „Гласот што го слушаме – Македонско најдобро“, преку која со тимовите предводени од директори одржавме трибини по општините.
Тука треба да се споменат и секојдневните посети на откупните центри, преработувачките капацитети и фабриките, каде што директно разговаравме со производителите.
Мојата обврска и задача на која бев цврсто фокусиран и напорно работев и верував е да создадам услови во кој секој земјоделец ќе биде почитуван и вреднуван, институциите ќе работат во интерес на земјоделците, а државата ќе биде вистински партнер на секој производител.
За мене, теренот беше најважната канцеларија, меѓу земјоделците каде што се слушаа нивните проблеми и потреби и се носеа најдобрите решенија.
На мојот наследник му оставаме стабилни темели, функционални институции и многу започнати процеси како што се - проектот за модернизација на земјоделството, „Наводнување на Македонија“, проектот за уредување на пазари, проектот за „Злетовица“, проектот „Подобрување на самоорганизацијата на земјоделците во создавањето и управувањето со мали системи за наводнување“, проектот „Изградба на мали, нискотрошковни, еколошки системи за наводнување во Сопот и Новаци“ кофинансиран од ЕУ и подготвени проекти кои ќе започнат во блиска иднина.
Со продолжување на проектите и политиките ќе се придонесе кон силно и успешно земјоделство, што ќе значи уште посилна Македонија.
Мојата борба за земјоделството не завршува тука, ќе продолжам да се залагам за земјоделците и за политиките кои ќе обезбедат сигурна иднина на овој сектор.
Му благодарам на мојот тим, на сите вработени во Министерството, институциите, но најмногу на земјоделците кои секој ден со својот труд произведуваат квалитетна и безбедна храна.
Верувам дека вистинските резултати остануваат и зборуваат многу погласно од секој збор.
