26/02/2026
. 🙏ပီတိအဟာရ,ဇီဝိတဒါန
~~~~~~~~~~
ဖုန်းသံမြည်လို့ကိုင်လိုက်တော့.....
``ကြက်ခြေနီသွေးလှူပေးတဲ့စီကလားခင်ဗျား´´
``ဟုတ်ပါတယ်´´
``အနောက်ပိုင်းဆေးရုံကဆရာမတစ်ယောက်
ဖုန်းနံပါတ်ပေးလို့ဆက်လိုက်တာပါ။
B+ သွေး(၁)လုံးလောက်အလှူခံချင်လို့ပါ။
ကျွန်တော်ကကြို့ပင်ကောက်ကပါ။
ကျွန်တော့်အမျိုးသမီးရင်သားကင်ဆာ
ခွဲစိတ်ရမှာဆိုတော့ကူညီပါဦးဆရာ´´
B+ သွေးကတောင်းခံတာများနေပြီ
ကုန်နေတောချက်ချင်းအဖြေမပေးနိုင်။
စဉ်းစားလို့မရ။
နယ်ကလာတာဆိုတော့သူတို့ခင်ဗျာ
အသိအကျွမ်းကလည်းမရှိ၊ကိုယ်ချင်းစာပြီး
ရအောင်လုပ်ပေးဦးမှပါပဲလေ။
``ဟုတ်ပြီလေ။
အစ်ကိုဆေးရုံကပဲစောင့်နေ။
ကျွန်တော်မရရအောင်ရှာပြီးလာလှူပေးပါ့မယ်။
ရပြီဆိုခုဆက်နေတဲ့ဖုန်းကိုပြန်ဆက်လိုက်ပါ့မယ်။
ဆေးရုံကနေစောင့်နေပေးပေါ့´´
ပြောပြီးဖုန်းချလိုက်တယ်။
သွေးလှူရှင်စာရင်းတွေကို
ကျွန်တော့်စာရင်းဟောင်းထဲမှာပြန်ရှာတော့မတွေ့။
ဖုန်းနံပါတ်မှတ်ထားတဲ့စာရင်းထဲက
ရင်းနှီးတဲ့သူတွေကိုရှာ။
ဖြစ်နိုင်တဲ့တစ်ယောက်ပြီးတစ်ယောက်ကို
ဖုန်းဆက်ပြီးမေး။
ဆယ်ယောက်မြောက်ကျမှပဲရတော့တယ်။
လှူပေးပါ့မယ်တဲ့၊လာခေါ်လိုက်လေဆိုတော့
သူပြောတဲ့လိပ်စာအတိုင်းသွားခေါ်။
လူနာရှင်ကိုသွေးရပြီလို့ဖုန်းဆက်ပြီးပြော။
ဆေးရုံကိုအမြန်မောင်းထွက်လာခဲ့ပါတော့တယ်။
ဆေးရုံမှာလူနာရှင်နဲ့သွေးလှူရှင်ကိုမိတ်ဆက်ပေး။
သွေးလှူရှင်မှတ်တမ်းဖောင်ဖြည့်၊သွေးပေါင်ချိန်
သွေးစစ်အားလုံးအဆင်ပြေ။
အဲဒီတော့မှဇာတ်လမ်းကစတော့တာပဲ။
``အစ်ကိုသွေးလှူပြီးပြီ ဆိုတော့
ကျွန်တော်တို့ပြန်တော့မယ်´´
သူ့ကိုနှုတ်ဆက်တုန်းရှိသေးတယ်။ကျွန်တော့်စကား
မဆုံးသေးခင်.....
သူကအားတုံ့အားငယ်ပုံစံမျက်နှာငယ်လေးနဲ့...
``ခုလိုကူညီတာကျေးဇူးတင်ပါတယ်။
ကျွန်တော့်အမျိုးသမီးက,ရင်သားတစ်ဖက်
ခွဲစိတ်ရမှာဆိုတော့
နောက်ထပ်သွေးတစ်လုံးလိုသေးတယ်။
ဖြစ်နိုင်ရင်ကူညီပေးပါဦး၊
ကျွန်တော်ကကြို့ပင်ကောက်ကရွာတွေမှာ
ဆိုင်ကယ်နဲ့ကုန်စိမ်း ဟင်းသီးဟင်းရွက်
လိုက်ရောင်းတာပါ။
အဆင်ပြေလှတယ်မဟုတ်ပါဘူး။
အစ်ကိုတို့ကြက်ခြေနီက သွေးလိုရင်
အကူအညီပေးတယ်ဆိုလို့ပါ။
အလှူငွေလည်းအများကြီးမတတ်နိုင်ပါဘူး
ဒီညနေခွဲစိတ်ခန်းဝင်ရမယ်ပြောပါတယ်။
ထပ်ပြီးကူညီပါဦးနော်´´
လက်အုပ်လေးချီ,အားငယ်နေတဲ့မျက်နှာလေးနဲ့
ပြောနေတဲ့သူပုံလေးကို
မြင်နေရတဲ့ကျွန်တော်တောင်ရင်ထဲစို့နင့်သွားတယ်။
B+ သွေးတစ်လုံးတောင်မနည်းရှာရတာ
နောက်ထပ်တစ်လုံးဆိုတော့???
ကျွန်တော်ကိုယ်တိုင်က B+ သွေး, ဒါပေမဲ့
ကျွန်တော်က သွေးလှူဖို့သတ်မှတ်ထားတဲ့အသက်
ထက်ကျော်နေပြီလေ။ ဘာပဲဖြစ်ဖြစ်လှူဖို့
ဆုံးဖြတ်လိုက်ပြီ။
``အစ်ကို...ကျွန်တော်တို့ကိုဘာမှမပေးနဲ့
လှူစရာမလိုဘူး။
ခုလိုနေတဲ့သွေးတစ်လုံးကို
ကျွန်တော်လှူပေးမယ်။
ကျွန်တော်က B+သွေး။
စိတ်အေးအေးထား။
ဘာမှသောကရောက်မနေနဲ့တော့။
ကဲ...လာ
သွေးမှတ်တမ်းဖောင်သွားယူ။
ဒီနေ့ကျွန်တော့်မွေးနေ့။
ဇီဝိတဒါနကုသိုလ်ပြုလှူပေးမယ်´´
အဲ့ဒီလိုလည်းပြောလိုက်ရော
ဟန်တောင်မဆောင်နိုင်ဘူး။
သူ့မျက်နှာချက်ချင်းဝမ်းသာအဲလဲ
ဖြစ်သွားပုံကကျွန်တော်မြင်အောင်
မရေးတတ်တော့ဘူး။
``ကျေးဇူးအများကြီးတင်ပါတယ်။
ဒီလိုကူညီတဲ့ အဖွဲ့အစည်းနဲ့တွေ့ရတာ
ယုံတောင်မယုံနိုင်တော့ဘူး။
ကျွန်တော့်မိန်းမဆေးရုံကဆင်းရင်
အစ်ကိုတို့ကိုလာကန်တော့ပါဦးမယ်´´
``ဟာ...တကူးတက,လာမကန်တော့ပါနဲ့
မလိုပါဘူး။
စေတနာသန့်သန့်နဲ့လူသားချင်းစာနာပြီးကူညီတာ။
ကျွန်တော်တို့ကြက်ခြေနီက
ဆောင်ပုဒ်တွေရှိတယ်။
#နှလုံးသားဖြင့်ကူညီ
#တို့ကြက်ခြေနီ ...တဲ့´´
``ဟုတ်ကဲ့ပါ။
ကျွန်တော်ဘယ်လိုကျေးဇူးဆပ်ရမလဲမသိလို့ပါ´´
လက်အုပ်ကလေးချီကာချီကာမတ်တပ်လေးရပ်,
ကိုယ်လေးယို့ပြီးပြောတဲ့ပုံလေးက
ကျွန်တော်သူ့အမျိုးသမီးအတွက်
သွေးလှူပေးလိုက်ရခွင့်အကျိုးဟာ
နှလုံးပီတိဂွမ်းဆီထိသလိုမျိုး
တစိမ့်စိမ့်တွေးပြီးခံစားမိပါတော့တယ်။
ကျွန်တော့်မွေးနေ့သွေးလှူခြင်းအမှတ်တရ
ရေးဖွဲ့သီကုံးပါသည်။
သန်းဝင်း(ညောင်လေးပင်)
၂၆.၂.၂၀၂၆
(၁၆း၃၂)နာရီ
Edit... PS,(၁၀)ယောက်မြောက်
ဖုန်းဆက်ခေါ်တဲ့သွေးလှူရှင်ကို
Comment မှာကျေးဇူးပြုကြည့်ပေးပါ။
ကိုလွှမ်းမိုးလို့ခေါ်ပါတယ်။
