24/01/2020
"တရားစပြီး အားထုတ်တော့မယ့် လူငယ်တွေအတွက် "
- အခုမှ တရား စအားထုတ်မယ့် လူငယ်တွေအတွက် သိစေချင်တာ နဲ့ သိသင့်တာ တချို့ကို ပေါ့ပေါ့ပါးပါး ပြောပြပါမယ်။ ယူတတ်ရင်တော့ အသိဉာဏ် ရနိုင်ပါလိမ့်မယ်။
ခန္ဓာ ရဲ့ အဓိပ္ပာယ်က အစု ဖြစ်ပါတယ်။
ရုပ် = ရူပံ = ဖောက်ပြန်မှု
ရူပက္ခန္ဓာ ဆိုတာ ဖောက်ပြန်မှုအစု ကို ခေါ်တာဖြစ်တယ်။ သေချာမှတ်ထားရမယ့် သိပ်အရေးကြီးတဲ့ အချက်တခု ဖြစ်ပါတယ် ။
- တရားအလုပ်ဆိုတာ ခန္ဓာရဲ့ သဘောအမှန်ကို သတိနဲ့ ရှုနေရတာပါ။ သူ့သဘောက ဘာလဲ။ ဖောက်ပြန် ဖြစ်ပျက်နေတာ နေတာလို့ အရင်မှတ်ထားကြပါ။ တရားရှုရမဲ့ ခန္ဓာငါးမျိုး ရှိပါတယ်။
ပထမဦးဆုံး ရူပက္ခန္ဓာ( ဖောက်ပြန်မှုအစု) အကြောင်း သိထားရမယ်။
- ရုပ်ဆိုတာဟာ လောကီအနေနဲ့ လူကြီးတွေ ပြောပြလို့ သိခဲ့ရတဲ့၊ စာသင်ရင်း သိခဲ့ရတဲ့ လူ့ခန္ဓာကိုယ်ကြီးကို ပြောနေတာ မဟုတ်ပါဘူး။ မိုးကုတ်ဆရာတော်ကြီး ဟောကြားထားတာ ရှိပါတယ်။ အလွန် ရှင်းလင်းလှတာမို့ သေသေချာချာ မှတ်ထားသင့်ပါတယ်။
"တရားရှုရမဲ့ ခန္ဓာဆိုတာ ခွေးဟောင်တဲ့ ခန္ဓာကိုယ်ကို ပြောတာ မဟုတ်ဘူး။ မျက်စိနဲ့ မြင်ရတဲ့၊ ကိုင်လို့ရတဲ့ ချိန်တွယ်လို့ရတဲ့ ခန္ဓာကိုယ်ကို ပြောနေတာမဟုတ်ဘူး "
ဒါလောက်ဆိုရင် ရိပ်မိလောက်မယ် ထင်ပါတယ်။
- ယောဂီအများစုက တရားစပြီး အားထုတ်တာနဲ့ ကိုယ်သိထားတာကို တရားလုပ်လိုက်ကြတယ်။ ခန္ဓာကို ရှုရမယ်ဆိုတာနဲ့ ခန္ဓာကို ငါသိတယ်ဆိုပြီး မြင်နေရတဲ့၊ ကိုင်တွယ်လို့ရတဲ့ ကိုယ်ကောင်ကြီးကို ရှုနေတော့တာပေါ့။ ရုပ်ရှုရမယ် ဆိုပြန်တော့လည်း ဒီအတိုင်းပါပဲ။ မှန်ကြည့်ပြီးတော့ ငါ့ရုပ်ငါရှုနေတာလို့ ပြောတဲ့လူလည်း ရှိခဲ့ဖူးတယ်။ ကိုယ်အတွေးနဲ့ကိုယ် မှန်တယ်လို့ ထင်နေကြတယ် ၊ ယုံနေကြတယ်။
- တရားအားထုတ်ရာမှာ မှန်မှန်ကန်ကန် သိရမယ့် ရုပ်ရဲ့ အဓိပ္ပါယ်က ဖောက်ပြန်ပြောင်းလဲတာကို ခေါ်တာပါ။ သေသေချာချာ မှတ်သားထားပါ။ မသေမချင်း မှတ်ထားပါ။ ဖောက်ပြန်တယ် ဆိုတာကရော ဘာကို ပြောချင်တာလဲ။ ဒါလည်း သိနေကြတာပဲ။
- ပထဝီ ၊ တေဇာ ၊ အာပေါ ၊ ဝါယော ဆိုတဲ့ ဓာတ်ကြီးလေးပါးကို ခေါ်တာပါ။ ပထဝီဆိုတာ မြေဓာတ်၊ တေဇောဆိုတာ မီးဓာတ်၊ ဝါယောဆိုတာ လေဓာတ်၊ အာပေါဆိုတာ ရေဓာတ်ဆိုပြီးဖြေကြပါတယ်။ အဲဒီမှာလည်း ခန္ဓာနဲ့ ရုပ်တုန်းကလို အမှားသိတွေ ဖြစ်ကုန်ကြတော့တာပါပဲ။
- ပထဝီဆိုတာ မာတဲ့သဘော ပျော့တဲ့သဘောလေးကိုပဲ ခေါ်တာပါ။
တေဇာဆိုတာလည်း ပူတဲ့သဘော အေးတဲ့သဘောလေး။
အာပေါဆိုတာ ဖွဲ့စည်းတဲ့သဘော ယိုစီးတဲ့သဘောလေး။
ဝါယောဆိုတာ လှုပ်ရှားတဲ့သဘော ငြိမ်သက်တဲ့သဘောလေး ။
ရူပက္ခန္ဓာ ဆိုတဲ့ ရုပ်ကိုရှုတယ် ဆိုရာမှာ ဒီဓာတ်ကြီးလေးမျိုး ဖောက်ပြန်ပြောင်းလဲ ဖြစ်ပျက်နေတာကို သတိထားပြီး ဉာဏ်နဲ့ သိနေရပါမယ်။ မြင်နိုင်တဲ့ ကိုယ်ပေါ်မှာ မှီပြီးဖြစ်ရတဲ့ တလစပ် ဖြစ်ပေါ်ပျောက်ပျက်နေတဲ့ ၊ ဉာဏ်နဲ့ သိနိုင်တဲ့ ဓာတ်ကြီးလေးပါး ကိုရှုရပါမယ်။ ဒါကိုဘယ်လို သိနိုင်မလဲ။ ဝင်လေထက်လေ ရှုတာလေး နဲ့ ပြောပြမယ်။
- လေအဝင်အထွက်မှာ လေတိုးပြီး ထိသွားတဲ့ နေရာလေးမှာ သတိနဲ့ စူးစိုက်ထားကြည့်ပါ။
အေးတဲ့သဘော ပူနွေးတဲ့သဘော သိနိုင်ပါတယ်။ ဝင်လေနဲ့ ထွက်လေနှိုင်းယှဥ်ရင် ဝင်လေက ပိုအေးပါတယ်။ ကိုယ်ခန္ဓာ အထဲရောက်ပြီးပြန်ထွက်လာတဲ့ လေက ပိုပူနေပါတယ်။
အခုပဲ ဝင်လေထွက်လေ ရှုကြည့်လိုက်ပါ။ လှုပ်ရှားတဲ့ သဘော နဲ့ ငြိမ်နေတဲ့ သဘောလဲ တွေ့နိုင်ပါလိမ့်မယ်။ တရားထိုင်ရာမှာ မာတဲ့သဘော ၊ တောင့်တင်းတဲ့သဘော ၊ ပူအေးတဲ့သဘော ၊ လှုပ်ရှားတဲ့ သဘောတွေ တွေ့တယ်ဆိုရင် တရားဖြစ်နေပါပြီ။ ဝင်လေ ထွက်လေလို့ စိတ်ထဲကနေအမြဲတမ်း တွေးပြီး လိုက်မှတ်နေရမှာ မဟုတ်ပါဘူး။ မှတ်တယ်ဆိုတာ သညာပါ။
- ကိုယ့်ပါးကို ကိုင်ကြည့်လိုက်ပါ။ အေးတဲ့သဘော နွေးတဲ့သဘော တွေ့နိုင်ပါတယ်။ မာတဲ့သဘော ပျော့ပျောင်းတဲ့သဘောလဲ တွေ့နိုင်ပါတယ်။ တရားအားထုတ်ရာမှ ထင်ရှားတာကို ရှုပါ။
ပူတဲ့သဘောက ထင်ရှားရင် ပူတာ၊ မာတဲ့သဘောက ထင်ရှားရင်မာတာ၊ တောင့်တင်းတဲ့သဘောက ထင်ရှားရင် တောင့်တင်း၊ ထင်ရှားတာကိုပဲ ရှုပါ။ ခန္ဓာကိုယ် တခုလုံးမှာ ဆံပင် ၊အမွှေး ၊ ခြေသည်းလက်သည်းက လွဲပြီး ရှုနိုင်ပါတယ်။
- စကားကပ်ပြီး ပြောကြလို့ ဆံပင်အဆွဲခံရရင် လက်သည်း ခြေသည်း အနာတရ တခုခုဖြစ်ရင် ခံစားသိနိုင်လို့ တရားရှုလို့ ရပါတယ်။ ဘုရားရှင်ကလဲ အချိန်မရွေး နေရာမရွေး အနေအထားမရွေး (အိပ်၊ ထိုင် ၊ ရပ် ၊သွား) အားထုတ်နိုင်တယ်လို့ ဟောထားခဲ့တါပါ။ အခုလောက်ဆိုရင် ရုပ်ကိုရှုတဲ့ ရူပက္ခန္ဓာအကြောင်း သိသင့်သလောက် သိပြီလို့ ယူဆမိပါတယ်။
- တချို့က ဝေဒနာ(ခံစားမှု) ထင်ရှားပါတယ်။ ဒုက္ခဝေဒနာ ထင်ရှားကြတာ များပါတယ်။ ခါးနာတာ် ၊ ဖင်နာတယ် ၊ ခေါင်းကိုက်တယ် ၊ ခြင်ကိုက်တယ် ယားတယ် ပေါ့။ တရားသဘော မသိခင်တော့ အဲဒီ ဒုက္ခဝေဒနာ ပေါ်လာတာကို ကြောက်တတ်ကြပါတယ်။ ဂိမ်းဆော့တာ ၊ဇာတ်ပွဲ ၊ ဗီဒီယို တီဗီ ကြည့်တဲ့အခါမျိုး ကြတော့ခြင်ကိုက်တာလဲ ခံနိုင်တယ်။ ခါးတောင့်တာလဲ ခံနိုင်တယ်။ ဇက်ညောင်းတာလဲ ခံနိုင်ကြတယ်။ အဆာတောင် အငတ်ခံနိုင်ကြသေးတယ်။ ပေတေတေ နေနိုင်ကြတယ်။ ဒါတွေက ခံစားမှုတွေ ဆိုတော့ ဝေဒနက္ခန္ဓာနဲ့ ဆိုင်သွားပါပြီ ။ ဒါကို နောက်မှ ပြောပြပါတော့မယ်။
- တရားကို မှန်မှန်ကန်ကန် လက်တွေ့ အားထုတ်ရင် မုဆိုးစိုင်သင် ဆိုတာလို တရားအသိဉာဏ် တိုးတက်လာမှာ သေချာပါတယ်။ ကိုယ့်ကိုယ်ကိုယ် မညှာဖို့နဲ့ မညာဖို့တော့ အထူးပဲ လိုအပ်ပါတယ်။
အသိဉာဏ် တိုးတက်ကြပါစေ။
လပ်ကီးချမ်း အခမဲ့ စာကြည့်တိုက် မန္တလေး
Friday , 24 January 2020. Mandalay
