31/03/2026
မကွေးဒေသ(ပခုက္ကူခရိုင်)အတွင်း ဖြစ်ပွားနေသော သဘာဝသယံဇာတစီမံခန့်ခွဲမှုဆိုင်ရာ ဒေသတွင်းပဋိပက္ခနှင့်ပတ်သက်၍ ပူးတွဲထုတ်ပြန်ကြေညာချက်
ရက်စွဲ။ ။၂၀၂၆ခုနှစ် ၊ မတ်လ (၃၁) ရက်
၁။ ၂၀၂၁ခုနှစ် စစ်အာဏာသိမ်းမှုကြောင့် ဖြစ်ပေါ်လာသော နွေဦးတော်လှန်ရေး၏ အန္တိမပန်းတိုင်သည် အာဏာရှင်စနစ်ချုပ်ငြိမ်းရေးနှင့်အတူ ဖယ်ဒရယ်ဒီမိုကရေစီပြည်ထောင်စု တည်ဆောက်ရန်ဖြစ်ပြီး တော်လှန်ရေးမျိုးဆက်အသီးအသီးကလည်း ဖက်ဒရယ်ဒီမိုကရေစီရရှိရန် ဟူသည့်ယုံကြည်ချက်ဖြင့် လက်နက်ကိုင်လမ်းစဥ်နှင့်အတူ တော်လှန်ရေးနည်းနာအသီးသီးကို ကိုင်စွဲကာ အသက်ပေးတိုက်ပွဲဝင်နေကြခြင်း ဖြစ်ပါသည်။ နွေဦးတော်လှန်ရေး(၅)နှစ်တာ ကာလကြာမြင့်ခဲ့ပြီးနောက် "ပြည်နယ်များအားကောင်းရေးမှသည် တစ်ပြည်လုံးအားကောင်းရေး" ဆိုသည့် ဖက်ဒရယ်မူဖြင့် မန္တလေးဒေသ၊ စစ်ကိုင်းဒေသ နှင့် မကွေးဒေသတို့တွင် ဖက်ဒရယ်စနစ်၏ မျိုးစေ့ဖြစ်သော ဒေသအလိုက် ဖက်ဒရယ်ယူနစ်အစိုးရများ အသီးသီးဖွဲ့စည်းနိုင်ခဲ့ပြီဖြစ်ပါသည်။
၂။ မကွေးဒေသ၊ ပခုက္ကူခရိုင်အတွင်း သဘာဝသယံဇာတရင်းမြစ်နှင့်ပတ်သက်၍ တော်လှန်ရေးအင်အားစုများကြား ပွတ်တိုက်မှုများ ဖြစ်ပွားနေသည်ကို ဝမ်းနည်းဖွယ် သိရှိရပါသည်။ လက်ရှိဖြစ်ပွားနေသော မိတ်ဖက်ပဋိပက္ခသည် အမျိုးသားညီညွတ်ရေးအစိုးရနှင့် မကွေးဖက်ဒရယ်ယူနစ်အစိုးရအဖွဲ့ တို့အကြား အကြေအလည် ဆွေးနွေးညှိနှိုင်းမှု ပြုလုပ်ကြရမည့်ကိစ္စဖြစ်သည်ဟု ရှုမြင်ပါသည်။ အကြေအလည် ဆွေးနွေးညှိနှိုင်းမှုများ မပြုလုပ်နိုင်ပါက အောက်ခြေတွင် ရေတိုပဋိပက္ခမကဘဲ ရေရှည်လက်နက်ကိုင်ပဋိပက္ခ အသွင်ဆောင်ရန် တာစူနိုင်ပါသဖြင့် သက်ဆိုင်ရာဦးဆောင်အဖွဲ့များအချင်းချင်း အမြော်အမြင်ရှိရှိ စကားဝိုင်းတွင် ဆွေးနွေးအဖြေရှာကြရန် အလေးအနက်တိုက်တွန်းအပ်ပါသည်။
၃။ ညီညွတ်ရေးကိုရှေ့ရှုပြီး စကားဝိုင်းတွင် ဆွေးနွေးအဖြေရှာရမည့်ကိစ္စကို အောက်ခြေညီညွတ်ရေးပျက်ပြားစေနိုင်သည်ကိုပင် ဂရုမပြုဘဲ လက်နက်ဖြင့်အဖြေရှာရန် ကြိုးပမ်းသူအားလုံးကို ကန့်ကွက်ပြီး ညီညွတ်ရေးကိုရှေ့ရှုကာ ဆွေးနွေးညှိနှိုင်းအဖြေရှာရန် အမျိုးသားညီညွတ်ရေးအစိုးရနှင့် မကွေးဖက်ဒရယ်ယူနစ်အစိုးရအား ထပ်လောင်း တိုက်တွန်းအပ်ပါသည်။
၄။ မိမိတို့တော်လှန်ရေးအင်အားစုများအနေဖြင့် အမျိုးသားညီညွတ်ရေးအစိုးရ(NUG)၊ အမျိုးသားညီညွတ်ရေးအတိုင်ပင်ခံကောင်စီ(NUCC)၊ ပြည်ထောင်စုလွတ်တော် ကိုယ်စားပြု ကော်မတီ(CRPH)၊ မကွေးဖက်ဒရယ်ယူနစ်လွှတ်တော်(CRMH)၊ ကာကွယ်ရေးဝန်ကြီးဌာန(MOD)နှင့် မကွေးဖက်ဒရယ်ယူနစ် ကြားကာလအစိုးရ(MFUIG) တို့ထံလည်း ယခုဖြစ်စဥ်နှင့်ပတ်သက်၍ အိတ်ပိတ်စာပေးပို့ထားရှိပြီး ဒေသတွင်းတော်လှန်ရေးအကျိုးနှင့် ညီညွတ်အားကောင်းရေးကို ရှေ့ရှု၍ လျင်မြန်စွာ ဆွေးနွေးညှိနှိုင်းအဖြေရှာကြပါရန် ကျွန်ုပ်တို့က အလေးအနက် ထပ်လောင်း တိုက်တွန်းအပ်ပါသည်။
ပူးပေါင်းထုတ်ပြန်သော အဖွဲ့အစည်းများ
- အမှတ်(၂) တပ်ရင်း၊ ပခုက္ကူခရိုင်
- အမှတ်(၆) တပ်ရင်း၊ ပခုက္ကူခရိုင်
- အမှတ်(၇) တပ်ရင်း၊ ပခုက္ကူခရိုင်
- အမှတ်(၁၄) တပ်ရင်း၊ ပခုက္ကူခရိုင်
- အမှတ်(၁၅) တပ်ရင်း၊ ပခုက္ကူခရိုင်
- အမှတ်(၁၇) တပ်ရင်း၊ ပခုက္ကူခရိုင်
- မြိုင်မြို့နယ် အခြေခံပညာ အထွေထွေသပိတ်ကော်မတီ
- မြိုင်မြို့နယ် ပညာရေးဘုတ်အဖွဲ့
- ပေါက်မြို့နယ် ပညာရေးဘုတ်အဖွဲ့
- မြိုင်မြို့နယ် CDM ကျန်းမာရေးအင်အားစုများ
- ပေါက်မြို့နယ် CDM ကျန်းမာရေးအင်အားစုများ
- ရေစကြိုမြို့နယ် CDM ကျန်းမာရေးအင်အားစုများ
- ကမ္မလူငယ်အသင်း
- ပခုက္ကူကဗျာဆရာသမဂ္ဂ
- ၈၈ငြိမ်းချမ်းရေးနှင့်ပွင့်လင်းလူ့အဖွဲ့အစည်း(ပခုက္ကူ)
- အညာတောအိမ် (အရပ်ဖက်လူမှုကူညီရေးအဖွဲ့)
- မြိုင်မြို့နယ် ပြည်သူ့အုပ်ချုပ်ရေးအဖွဲ့
- ပေါက်မြို့နယ် ပြည်သူ့အုပ်ချုပ်ရေးအဖွဲ့
- ကြားကာလပြည်သူ့အုပ်ချုပ်ရေးအဖွဲ့(ကမ္မဒေသ)
- ကမ္မဒေသတော်လှန်ရေးတပ်ပေါင်းစု
- အညာမြေ အရပ်ဖက် လူမှုအဖွဲ့အစည်း(မြိုင်မြို့နယ်)
