25/09/2026
၂၅.၉.၂၀၂၆ ရက်နေ့
လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ဒုတိယဝန်ကြီး ဦးလင်းဇော်ထွန်းသည် တာဝန်ရှိသူများနှင့်အတူ စက်တင်ဘာလ (၂၅) ရက်၊ ယနေ့နံနက်ပိုင်းတွင် ရန်ကုန်တိုင်းဒေသကြီး၊ ကျောက်တံတားမြို့နယ်ရှိ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ အမျိုးသား မှတ်ပုံတင်နှင့် နိုင်ငံသားဦးစီးဌာန၊ မှတ်တမ်းဌာန (ရန်ကုန်)သို့ သွားရောက်၍ တိုင်းဒေသကြီး/ ပြည်နယ်အလိုက် နိုင်ငံသားဆိုင်ရာကိုယ်ရေးမှတ်တမ်း အချက်အလက်များ စနစ်တကျထိန်းသိမ်း ထားရှိမှုနှင့် ၎င်းအချက်အလက်များအား ဒီဂျစ်တယ်စနစ်ဖြင့် မှတ်တမ်းတင်ထိန်းသိမ်းခြင်းလုပ်ငန်း များ ဆောင်ရွက်နေမှုတို့ကို လှည့်လည်ကြည့်ရှုစစ်ဆေးပြီး နိုင်ငံသားဆိုင်ရာ ကိုယ်ရေးမှတ်တမ်း အချက်အလက်များ ပျက်စီးဆုံးရှုံးမှုမရှိစေရေးနှင့် စနစ်တကျထိန်းသိမ်းဆောင်ရွက်ထားရှိရေး၊ ပိုးမွှား များအန္တရာယ်၊ သဘာဝဘေးအန္တရာယ်နှင့် မီးဘေးအန္တရာယ်ကာကွယ်ရေးအတွက် တာဝန်ရှိသူ အဆင့်ဆင့်က စဉ်ဆက်မပြတ် စစ်ဆေးကြပ်မတ်ဆောင်ရွက်ရေးတို့ကို မှာကြားပြီး တာဝန်ရှိသူများ၏ လိုက်လံရှင်းလင်းတင်ပြချက်များအပေါ် လိုအပ်သည်များ ညှိနှိုင်းဆောင်ရွက်ပေးသည်။
ထို့နောက် ဒုတိယဝန်ကြီးသည် အဆိုပါ မှတ်တမ်းဌာန (ရန်ကုန်)မှ ဝန်ထမ်းများအား တွေ့ဆုံ ၍ နိုင်ငံသားဆိုင်ရာ ကိုယ်ရေးမှတ်တမ်းများ စနစ်တကျထိန်းသိမ်းထားရှိရေး၊ ဒီဂျစ်တယ်စနစ်ဖြင့် ထိန်းသိမ်းနိုင်ရေးဆောင်ရွက်နေသည့်လုပ်ငန်းကိုလည်း သတ်မှတ်ကာလအတွင်း လျာထားချက် အတိုင်း ပြီးစီးအောင် တာဝန်ရှိသူများက ကြပ်မတ်ဆောင်ရွက်ကြရေး၊ ဝန်ထမ်းအချင်းချင်း စည်းစည်းလုံးလုံး ညီညီညွတ်ညွတ်ဖြင့် တာဝန်ကို ကျေပွန်စွာထမ်းဆောင်နိုင်ရေးတို့နှင့်စပ်လျဉ်း၍ ရှင်းလင်းပြောကြားကာ လိုအပ်သည်များ ညှိနှိုင်းဆောင်ရွက်ပေးသည်။
ဆက်လက်၍ ဒုတိယဝန်ကြီးသည် ကျောက်တံတားမြို့နယ်ဦးစီးမှူးရုံးသို့ သွားရောက်၍ မြို့နယ်ဦးစီးမှူးရုံးဝန်ထမ်းများက အိမ်ထောင်စုလူဦးရေစာရင်းနှင့် နိုင်ငံသားစိစစ်ရေးကတ်ပြား ပျောက်ဆုံး/ ပျက်စီးသူများ၊ အကြောင်းအမျိုးမျိုးကြောင့် နိုင်ငံသားစိစစ်ရေးကတ်များ မရရှိသေးသည့် ပြည်သူများအား လမင်းစီမံချက်ဖြင့် ဥပဒေနှင့်အညီ စိစစ်ဆောင်ရွက်ပေးနေမှုနှင့် နိုင်ငံသားကတ်ပြား ရရှိပြီးသူများအား e-ID စနစ်ဖြင့် UID နံပါတ် ထုတ်ပေးဆောင်ရွက်နေမှုများကို လှည့်လည် ကြည့်ရှုအားပေးကာ ဒေသခံပြည်သူများအား ရင်းရင်းနှီးနှီးနှုတ်ဆက်သည်။
ယင်းနောက် ဒုတိယဝန်ကြီးသည် ရန်ကုန်အပြည်ပြည်ဆိုင်ရာလေဆိပ်သို့ သွားရောက်၍ လေဆိပ်တာဝန်ကျဝန်ထမ်းများက လေဆိပ်သို့ ရောက်ရှိလာသည့် ပြည်တွင်း/ပြည်ပ ခရီးသွား များအား ဥပဒေနှင့်အညီ လူဝင်မှုကြီးကြပ်ရေးဆိုင်ရာလုပ်ငန်းများ၊ မည်သူမည်ဝါဖြစ်ကြောင်း သက်သေခံလက်မှတ် (CI) ဖြင့် ပြည်ပနိုင်ငံများမှ ပြန်လည်ဝင်ရောက်လာသည့် မြန်မာနိုင်ငံသားများ အား e-ID စနစ်ဖြင့် Biographic/ Biometric ကောက်ယူကာ UID နံပါတ်ထုတ်ပေးနေမှုအခြေအနေ များကို လှည့်လည်ကြည့်ရှုစစ်ဆေးပြီး တာဝန်ရှိသူများ၏ လိုက်လံရှင်းလင်းတင်ပြချက်များအပေါ် လိုအပ်သည်များ ညှိနှိုင်းဆောင်ရွက်ပေးခဲ့ပါသည်။
