31/08/2026
အမှတ်(၃)ရပ်ကွက်တွင် အုပ်မှူးနှင့် ရာအိမ်မှူး ၊ဆယ်အိမ်မှူးတို့ ပူးပေါင်း၍ စစ်မှုထမ်းကြေး ငွေညှစ်ခြင်းနှင့် တရားမဝင် လောင်ကစားဝိုင်းများပြုလုပ်နေ
ဩဂုတ် ၃၁ ရက်၊၂၀၂၆
ဧရာဝတီတိုင်း၊ပုသိမ်မြို့၊ အမှတ် (၃) ရပ်ကွက်၊ သရက်ပင်မောင်နှမဝင်းအတွင်း၌ ရပ်ကွက်အုပ်ချုပ်ရေးမှူးနှင့် ဆယ်အိမ်ခေါင်းတို့က ပြည်သူများထံမှ နည်းမျိုးစုံဖြင့် ငွေကြေးကောက်ခံနေသည့်အပြင် တရားမဝင် လောင်းကစားဖဲဝိုင်းများ ပေါ်ပေါ်ထင်ထင် ဖွင့်လှစ်ထားကြောင်း ဒေသခံများထံမှ သိရသည်။
အမှတ် (၃) ရပ်ကွက် အုပ်ချုပ်ရေးမှူး တင်လှိုင်သည် လူငယ်ရှိသည့် အိမ်ထောင်စုများထံမှ စစ်မှုထမ်းကြေးဟူ၍ တစ်အိမ်လျှင် ကျပ် ၂၀,၀၀၀ (နှစ်သောင်း) စီ မဖြစ်မနေ ကောက်ခံနေပြီး စစ်ဘေးရှောင် လာရောက်နေထိုင်သည့် အိမ်များကိုလည်း အကြောင်းအမျိုးမျိုးပြကာ ငွေကြေးအတင်းအဓမ္မ တောင်းခံလျက်ရှိသည်။
ထို့ပြင် အမှတ် (၃) ရပ်ကွက်၊ တောရကျောင်းလမ်းအတွင်းရှိ ဆယ်အိမ်ခေါင်း မင်းမင်းထွဋ် (ခ) ဂေါင်းကြီး၏ နေအိမ်၌ နေ့စဉ် တရားမဝင် ဖဲဝိုင်းများ ဖွင့်လှစ်ထားပြီး တစ်ရက်လျှင် အကောက်ကြေး ကျပ် ၁ သိန်းမှ ၁ သိန်းခွဲအထိ ရရှိနေကြောင်း သိရသည်။
၎င်းလောင်းကစားဝိုင်းများကြောင့် မိသားစုအဆင်မပြေမှုများ ဖြစ်ပေါ်ကာ အမျိုးသမီးများနှင့် ဒေသခံအချို့ ဘဝပျက်သည်အထိ ဒုက္ခရောက်နေကြရပြီး သက်ဆိုင်ရာက လာရောက်ဖမ်းဆီးခြင်းမရှိဘဲ လစ်လျူရှုထားကြောင်း ရပ်ကွက်နေပြည်သူများက ပြောကြားသည်။
အမှတ် (၃) ရပ်ကွက်တွင် ရာအိမ်မှူး တင်တင်ခိုင် အပါအဝင် ရပ်ကွက်အုပ်ချုပ်ရေး အဖွဲ့ဝင်အချို့က ရပ်ကွက်အတွင်း လာရောက်တည်းခိုသည့် အခြားဒေသမှ ပြည်သူများထံမှ ဧည့်စာရင်းတိုင်ကြားရာ၌ ငွေကြေး မတရားတောင်းခံမှုများ ပြုလုပ်နေကြောင်း ဒေသခံပြည်သူများထံမှ သိရသည်။
ရာအိမ်မှူး တင်တင်ခိုင် သည့် ရပ်ကွက်အတွင်း အခြားအရပ်ဒေသမှ လာရောက်တည်းခိုသူများထံမှ ဧည့်စာရင်းတစ်ကြိမ် တိုင်ကြားလျှင် ငွေကျပ် ၅,၀၀၀ မှ ၁၀,၀၀၀ အထိ ပုံမှန်တောင်းခံလျက်ရှိကြောင်း သိရသည်။
ထို့ပြင် ဧည့်စာရင်း မတိုင်မိသည့် ပြည်သူများကိုလည်း ရပ်ကွက်အုပ်ချုပ်ရေးမှူးရုံးသို့ ခေါ်ယူကာ "တရားရုံးသို့ တရားစွဲဆို အမှုဖွင့်လှစ်ပါက ကျပ် ၁၃၀,၀၀၀ (တစ်သိန်းသုံးသောင်း) မက ပေးဆောင်ရမည်" ဟု ခြိမ်းခြောက်ပြောဆိုပြီး ရပ်ကွက်ရုံးတွင်ပင် ဒဏ်ငွေအဖြစ် လက်မှတ်ထိုးခိုင်းကာ ငွေကျပ် ၁၀ဝ,၀ဝ၀ (တစ်သိန်း) အထိ ပေးဆောင်ခိုင်းနေကြောင်း ဒေသခံများက ပြောဆိုသည်။
အဆိုပါ မတရားတောင်းခံရရှိသည့် ငွေကြေးများကို မည်သို့ခွဲဝေကြောင်း အုပ်ချုပ်ရေးမှူးတင်လှိုင်က ပြောဆိုရာတွင် မြို့နယ်အထွေထွေအုပ်ချုပ်ရေးဦးစီးဌာန (ထွေအုပ်) အတွက် ကျပ် ၅၀,၀၀၀၊ ရုံးစာရေးအတွက် ကျပ် ၁၀,၀၀၀ နှင့် အုပ်ချုပ်ရေးမှူးကိုယ်တိုင် ကျပ် ၄၀,၀၀၀ ခွဲဝေယူကြကြောင်း ပြောဆိုကာ ငွေတောင်းခံခဲ့ခြင်း ဖြစ်သည်။
စစ်ကောင်စီက ၂၀၂၁ ခုနှစ်တွင် ပြင်ဆင်ပြဋ္ဌာန်းခဲ့သည့် "ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဥပဒေ "အရ ဧည့်စာရင်း တိုင်ကြားခြင်း မပြုပါက ပုဒ်မ ၁၇(ဃ)ဧည့်စာရင်း တိုင်ကြားရန် ပျက်ကွက်ပါက သက်ဆိုင်ရာ ပြစ်ဒဏ် သတ်မှတ်ချက်များအရ ပြစ်ဒဏ်ကျခံရမည် ဖြစ်သည်။
ပုဒ်မ၂၇ ဧည့်စာရင်းမတိုင်မိပါက ငွေဒဏ် ၁၀၀၀၀ကျပ် သို့မဟုတ် ထောင်ဒဏ် (၇)ရက် အထိသာ သတ်မှတ်ထားခြင်း ဖြစ်သည်။ သို့သော်လည်း အမှတ် (၃) ရပ်ကွက်အုပ်ချုပ်ရေး အဖွဲ့သည် ဥပဒေပါ သတ်မှတ်ချက်များထက် အဆပေါင်းများစွာ ပိုမိုကာ တရားမဝင် ဒဏ်ငွေအမည်တပ်၍ ကျပ်တစ်သိန်းအထိ မတရားကောက်ခံနေသည့်အတွက် လာရောက်တည်းခိုသူများနှင့် ရပ်ကွက်နေ ပြည်သူများမှာ ငွေကြေး အခက်အခဲနှင့် စိုးရိမ်ထိတ်လန့်မှုများ ကြုံတွေ့နေရကြောင်း သိရသည်။
