25/01/2023
G 12 သင်ရိုးသစ်၊ မြန်မာစာ
မြန်မာကဗျာရွေးချယ်ချက်
ပဒေသာလက်ရာ ( သံပေါက်)
**************************
တက္ကသိုလ်တောသား ( ဦးအောင်သောင်း)
ယမနေသား၊ ထင်းဖြတ်ထား
ဉာဏ်သွားသူက၊ စျာန်များဝင်ခါ
သစ်သားပန်းပု၊ အရုပ်ထု
ရှုမဝတဲ့ မင်းသားဖြစ်လာ။
ဆေးစုံခြယ်သ၊ ခုံးမျက်စ
ပြုံးပြင်ပြတဲ့၊ပန်းချီ့လက်ရာ
နောက်ခံတေးက၊ စည်းချက်ချ
တီးကွက်လှတဲ့ ဂီတဆရာ။
ကော့ညွတ်ကွေးညက်၊ ပျော်တော်ဆက်
တော်တော်မက်ဖွယ့်၊ ကြိုးဆွဲပညာ
ရွှေမျှင်ငွေမျှင်၊ ဘော်ကြယ်ငင်
ဝတ်ဆင်စေတဲ့ ရွှေချည်ထိုးပါ။
အရုပ်လေးက၊ ဆိုငိုပြ
ငိုရရယ်ရ၊ သဘင့်ပညာ
နိပါတ်တော်မှ၊ ဇာတ်ခင်းပြ
အပ်နှင်းကြတဲ့ ဘဝသင်ခန်းစာ။
လက်ရာပေါင်းစု၊ ကောင်းအောင်ပြု
သုခုမတဲ့၊ မြန်မာ့စဥ်လာ
စေတနာဓာတ်၊ လက်ရာတတ်
ပေါင်းစပ်ထားလို့ ဖိုးမဖြတ်သာ။
ကမ္ဘာပေါ်တွင်၊ ကိုယ်စီထွင်
မယှဥ်နိုင်ကြ၊ မြန်မာ့လက်ရာ
ရှေးလက်ရာကောင်း၊ ရိုးရာဟောင်း
ဟောင်းငြားပေမယ့်၊ မဆွေးစေရာ။
ထွေးပါ နွေးစွာ။
Credit
