25/07/2025
ကိုသန်းထွန်းအမှာ ဆာမွန်ဝေးကဗျာ
(၁)
ဟိုချီမင်း ဟာ
နယ်ချဲ့ရဲ့ အကျဥ်းထောင်ထဲမှာ
ကဗျာတွေကိုရေးခဲ့တာပေါ့ကွာ လို့ငါကပြောရင်
အဲဒါ ကဗျာအကြောင်းပြောနေတာလို့မထင်နဲ့ ညီလေး
ငါက ဟိုချီမင်းအကြောင်းပြောနေတာ...
(၂)
သူ့လူရွယ်ဘဝတခုလုံး
စစ်မြေပြင်မှာ ကုန်ဆုံးခဲ့တဲ့ ဘုရင်ရစ်ချတ်ဟာ
သူ့နောက်ပိုင်းကာလတွေကို
ထောင်ထဲမှာဘဲအချိန်ကုန်ခဲ့ရတယ် တဲ့
အဲဒီအချိန်တွေမှာ
သူ ကဗျာတွေရေးခဲ့တာပေါ့
အဲဒါ ငါကဘုရင်ရစ်ချတ်အကြောင်းပြောနေတာမဟုတ်ဘူး ညီလေး
ငါက ကဗျာနဲ့ဘဝရဲ့ အဆက်အစပ်အကြောင်း
ပြောမလို့ပါ
(၃)
ကဗျာဆိုတာမျိုးက
ကိုယ့်ကိုယ်ကိုယ်ပြန်လှည့်ကြည့်လို့
အကောင်းဆုံးအနုပညာ
ပြီးတော့ ကိုယ့်ကိုယ်ကိုယ်လှည့်ဖြားလို့အကောင်းဆုံးအနုပညာ
(၄)
သီချင်းတပုဒ်ကိုနားထောင်တဲ့အခါ
ပျော်ရွှင်နေချိန် သံစဥ်ကိုခံစားပြီး
ဝမ်းနည်းချိန်မှာ စာသားကိုခံစားကြတယ် တဲ့
မင်းအခုဘာသီချင်းတွေဆိုနေဖြစ်လဲညီလေး
(၅)
ဗန်းမော်တင်အောင်အုတ်ဂူပေါ်ကစာ
ကဗျာထဲကူးရေးဖို့မမေ့တဲ့ကောင်က
သူ့ပုခုန်းပေါ်ကတာဝန်ကျ ရူးချင်ယောင်ဆောင်လို့...
အဲ့လို ငါရေးခဲ့ဖူးရဲ့
ဘဝခက်ခက်ကြီးထဲ
ဘာသီချင်းကိုဆိုမလဲ
ငါတို့ ဘာသီချင်းတွေရေးကြမလဲ
( ၆)
ဟင်နရီဒေးဗစ်သော်ရိုးရဲ့စာတပုဒ်ကြောင့်
တော်လ်စတွိုင်း ဖြစ်ခဲ့
တော်လ်စတွိုင်းကြောင့်ဂန္ဒီဖြစ်ခဲ့
ဂန္ဒီကြောင့် မာတင်လူသာကင်းဖြစ်ခဲ့
မာတင်လူသာကင်းရဲ့ အိပ်မက်ကြောင့်
လူမဲတွေ လွတ်မြောက်ခဲ့ကြရ..
ညီလေး မင်းဘာအိပ်မက်တွေမက်နေလဲ
(7)
တကယ်ဆို ငါကအိုပါပြီကွာ
မင်းတို့ခေတ်ရဲ့ပုစ္ဆာတွေကို
ငါတို့ခေတ်ကအဖြေတွေနဲ့ တိုက်မကြည့်ချင်တော့ပါဘူး
ဘာလို့လဲဆိုတော့
ငါတို့ကဗမာပြည်မှာမွေးဗမာပြည်မှာကြီးလာကြတာဖြစ်ပြီး
မင်းတို့က
ကမ္ဘာ့ကြီးထဲနေထိုင်နေကြတာဖြစ်လို့ပါဘဲ
(8)
နားသန်သီးနဲ့ တက်တူးနဲ့
ရက်ပ်ဂီတနဲ့
ကမ္ဘာသစ်ကြီးထဲတိုးဝင်လာတဲ့လူငယ်တယောက်ကို
ဆီးကြိုဖို့
ငါတို့"ကဗျာ"ဟာအသင့်နေထားရှိပါရဲ့လား
(9)
ကဗျာဆိုတာ
ပလီပလာရေးချင်ရေးလို့ရတဲ့ အကွက်အကွင်းတွေနဲ့
ဇရပ်ခါးပန်းမှာ ပတ်ကြမ်းတိုက်သူတိုက်ကြချစ်သူရှေ့ခုန်ပြခဲ့ဖူးတဲ့မြင်းမိုရ်တောင်
မိဘကျေးဇူးရှေ့သွားထောင်ပြသူပြကြ
ပြီးတော့လည်း
ကဗျာဆိုတာ
ပလီပလာမလုပ်ချင်မလုပ်ဘဲနေလို့ရတဲ့
အခင်းအကျင်းတွေလည်းရှိတာပေါ့ကွာ
(10)
ကဗျာဆိုတာ
မင်းလက်နဲ့မင်း ယက်ဆင်းသွားလို့ရသလို
မင်းသာဆန္ဒရှိရင်
မင်းစိတ်နဲ့မင်း ကြယ်ကိုတက်ဆွတ်မယ်ဆိုလည်း
မင်းမှာ
မိုးထိမြင့်တဲ့လှေကားရှိလို့ဖြစ်မှာပဲလို့
ငါတွေးဖို့အသင့်ပဲညီလေး
