Social Democratic Party of Burma - SDP

08/08/2026

ရှစ်လေးလုံး ပြည်သူ့ဒီမိုကရေစီအရေးတော်ပုံကြီး (၃၈) နှစ်ပြည့် အထိမ်းအမှတ် သဝဏ်လွှာ

ရက်စွဲ။ ။ ၂၀၂၆ ခုနှစ်၊ ဩဂုတ်လ (၈) ရက်

ဗဟိုကော်မတီ
ဆိုရှယ်ဒီမိုကရက်တစ်ပါတီ

07/08/2026

24/07/2026

စစ်အုပ်စု၏ ဗုံးကြဲသတ်ဖြတ်နေမှုများကို ဆန့်ကျင်ကန့်ကွက်ကြရန် မေတ္တာရပ်ခံပန်ကြားချက်
ရက်စွဲ - ၂၀၂၆ ခုနှစ်၊ ဇူလိုင်လ (၂၄) ရက်
မင်းအောင်လှိုင်စစ်အုပ်စုက ဗမာတပြည်လုံး နေရာအနှံ့အပြားတွင် နေ့စဉ်နှင့်အမျှ ဗုံးကြဲတိုက်ခိုက်နေ သည်ကို ဗမာပြည်သူများ အားလုံးအသိပင် ဖြစ်ပါသည်။ မင်းအောင်လှိုင်စစ်အုပ်စုသည် တိုက်ပွဲဖြစ်ပွားရာ နေရာများသာမက ပြည်သူများနေထိုင်ရာ ကျေးရွာ၊ မြို့ပြ အဆောက်အအုံများကိုပါမချန် ဗုံးကြဲသတ်ဖြတ်နေခြင်းဖြစ်သဖြင့် ဤလုပ်ရပ်သည် ဗမာပြည် ပြည်သူများကိုပါ ပစ်မှတ်ထား၍ တိုက်ခိုက်နေခြင်း ဖြစ်သည်။ ၎င်းတို့ အထိနာသည့် စစ်မျက်နှာတိုင်းတွင် အငြိုးအတေး အာဃာတထားကာ လူထုကို ပစ်မှတ်ထား၍ ဖြတ်လေးဖြတ်လုပ်၊ ဗုံးကြဲ၊ လက်နက်ကြီးဖြင့် ပစ်၊ အစုလိုက် အပြုံလိုက်သတ်ဖြတ်၊ နေအိမ်များနှင့် ဘာသာရေးအဆောက်အအုံများအား မီးရှို့ စသည်တို့အား ပြုလုပ်နေခြင်းသည် လူ့အခွင့်အရေးအား ပြောင်ပြောင် တင်းတင်း ချိုးဖောက်နေခြင်းဖြစ်၍ ဝိုင်းဝန်းရှုတ်ချ ကန့်ကွက်ကြဖို့ လိုအပ်သည်။
ဗမာပြည် ပြည်တွင်းစစ်တွင် မင်းအောင်လှိုင်စစ်အုပ်စုသည် အလွန်အကျွံ ဗုံးကြဲတိုက်ခိုက်မှုဖြင့် လူသတ် ဝါဒကို ကမ်းကုန်အောင် ကျူးလွန်နေသည်မှာ အထင်အရှားပင် ဖြစ်သည်။ မင်းအောင်လှိုင်စစ်အုပ်စု၏ နေ့စဉ် ဗုံးကြဲ တိုက်ခိုက်မှုကြောင့် ရဟန်းသံဃာများ၊ ပြည်သူများ၊ သက်ကြီးရွယ်အိုများ၊ ကျောင်းသားကျောင်းသူများနှင့် ကလေးသူငယ်များ အပါအဝင် အရပ်သားပြည်သူများ သေဆုံးနေကြရသည်။ ကျောင်းသားအရွယ် ကလေးသူငယ်များသည် နေ့စဉ် ကျောင်းတက်ရမည့်အစား နေ့စဉ်သုသာန်မြေသို့ ရောက်နေရသည်။ ဆေးရုံများ၊ ဘာသာရေးကျောင်းများ၊ စာသင်ကျောင်းများ စသည့် ပြည်သူ့အဆောက်အအုံများကို မင်းအောင်လှိုင် စစ်အုပ်စုက ဗုံးကြဲ၍ မီးလောင်ပြာကျအောင် ဖျက်ဆီးနေခြင်းသည် ဗမာပြည်၏ အနာဂတ်ကိုပါ ပိန်းပိတ် မှောင်အောင် ဖျက်ဆီးနေခြင်း ဖြစ်ပါသည်။
မင်းအောင်လှိုင်စစ်အုပ်စု၏ စစ်ဆင်ရေးများသည် တိုက်ပွဲတိုက်ရုံသက်သက် မဟုတ်တော့ဘဲ လူသား၊ လူ့ဂုဏ်သိက္ခာ၊ လူ့အသက်များကို အညွန့်တုံးအောင် နင်းချေသတ်ဖြတ် ချေမှုန်းနေခြင်း ဖြစ်သည်။ မင်းအောင်လှိုင်စစ်အုပ်စု၏ ဤရွံရှာစက်ဆုပ်ဖွယ် လုပ်ရပ်ဆိုးကို လူသား၊ လူ့အသက်နှင့် လူ့ဂုဏ်သိက္ခာကို တန်ဖိုးထားပြီး ကာကွယ်စောင့်ရှောက်ပေးလိုသော နိုင်ငံတကာမှ ပြည်သူများ၊ နိုင်ငံတကာအဖွဲ့အစည်းများ၊ ဗမာပြည် လူထုလူတန်းစားအသီးသီးနှင့် ဘာသာပေါင်းစုံ လူမျိုးပေါင်းစုံ ပြည်သူများ၊ တရားမျှတမှုကို လိုလားသော အဖွဲ့အစည်းအသီးသီးတို့က ဝိုင်းဝန်း၍ နည်းမျိုးစုံဖြင့် ပြင်းပြင်းထန်ထန် ကန့်ကွက်ရှုတ်ချသွားကြရန် ပြည်သူလူထု အကျိုးစီးပွားအတွက် ဤမေတ္တာရပ်ခံ ပန်ကြားလွှာကို ထုတ်ပြန်လိုက်ပါသည်။
မေတ္တာရပ်ခံ ပန်ကြားလွှာကို ပူးတွဲထုတ်ပြန်သည့် အဖွဲ့အစည်းများ _
(၁) ဗမာပြည်ကွန်မြူနစ်ပါတီ - CPB
(၂) လူ့ဘောင်သစ်ဒီမိုကရက်တစ်ပါတီ - DPNS
(၃) ဆိုရှယ်ဒီမိုကရက်တစ်ပါတီ - SDP
(၄) ဗမာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် - ABFTU
(၅) ဗမာနိုင်ငံလုံးဆိုင်ရာ လယ်သမားသမဂ္ဂများအဖွဲ့ချုပ် - ABFFU
(၆) ၁၉၇၄/၇၅/၇၆ နိုင်ငံရေးအင်အားစု(အဝေးရောက်)
(၇) လူ့ဘောင်သစ်လူငယ် - YNS
(၈) အာဏာရှင်စနစ်တော်လှန်ရေးနှင့် ပြည်သူ့ကာကွယ်ရေးကွန်ရက် - DRPDN
(၉) စစ်အာဏာရှင်စနစ်တိုက်ဖျက်ရေး အထွေထွေသပိတ်ကော်မတီ - GSC
(၁၀) တာမွေမြို့နယ်သပိတ်ကော်မတီ
(၁၁) သာကေတမြို့နယ်သပိတ်ကော်မတီ
(၁၂) မင်္ဂလာတောင်ညွန့်မြို့နယ်လုံးဆိုင်ရာအထွေထွေသပိတ်ကော်မတီ
(၁၃) All Kachin Students' Federation
(၁၄) အညာ့မှတ်ဉာဏ်
(၁၅) လီဆူလူငယ်အစည်းအရုံး - LYC

20/07/2026

"ဘုံရန်သူဦးတည်တိုက်ရေးနှင့် ညီညွတ်ရေးဆီသို့" နိုင်ငံရေးဆွေးနွေးပွဲကို ကရင်နီပြည်တွင် အင်အားစု စုံလင်စွာဖြင့် အောင်မြင်စွာ ကျင်းပပြုလုပ်
​[ကရင်နီပြည်၊ ဇူလိုင် ၂၀]

မြန်မာ့နိုင်ငံရေး အကူးအပြောင်းကာလအတွင်း ဘုံရန်သူကို ဟန်ချက်ညီညီ တိုက်ဖျက်နိုင်ရေးနှင့် အနာဂတ် ဖက်ဒရယ်ဒီမိုကရေစီနိုင်ငံတော် တည်ဆောက်ရေးအတွက် အင်အားစုများအကြား ညီညွတ်ရေးကို ရည်ရွယ်၍ ကျင်းပပြုလုပ်သည့် "ဘုံရန်သူဦးတည်တိုက်ရေးနှင့် ညီညွတ်ရေးဆီသို့" နိုင်ငံရေးဆွေးနွေးပွဲ ကို ၂၀၂၆ ခုနှစ်၊ ဇူလိုင်လ ၁၉ ရက် တနင်္ဂနွေနေ့တွင် ကရင်နီပြည် တစ်နေရာ၌ အောင်မြင်စွာ ကျင်းပပြုလုပ်ခဲ့သည်။

​အဆိုပါ ဆွေးနွေးပွဲကို နံနက် ၉:၀၀ နာရီမှ မွန်းလွဲ ၄:၀၀ နာရီအထိ ကျင်းပခဲ့ပြီး နိုင်ငံရေးပါတီများ၊ တိုင်းရင်းသားလူငယ်/ကျောင်းသားသမဂ္ဂများနှင့် မြေပြင်တော်လှန်ရေးအင်အားစုများ ဖြစ်ကြသည့် ဆိုရှယ်ဒီမိုကရက်တစ်ပါတီ (SDP)၊ ကရင်နီပြည်ကျောင်းသားများသမဂ္ဂ (KSSU)၊ ကရင်နီပြည် ကျောင်းသားနှင့်လူငယ်သမဂ္ဂ (UKSY)၊ ရှမ်းတောင်လူမျိုးစုများလွတ်မြောက်ရေးအဖွဲ့ချုပ် (SSNLO) နှင့် အောင်ပန်းမြို့ပြတော်လှန်ရေးအင်အားစု (UTF) တို့မှ ကိုယ်စားလှယ်များ တက်ကြွစွာ စုံလင်စွာ တက်ရောက်ခဲ့ကြသည်။

​ဆွေးနွေးပွဲတွင် ဒေသတွင်း လုံခြုံရေးနှင့် မြေပြင်အခြေအနေများအရ မဟာမိတ်ခေါင်းဆောင်ကြီးများနှင့် အချို့သော တော်လှန်ရေးအင်အားစု ခေါင်းဆောင်များက အွန်လိုင်း (Online Zoom) စနစ်မှတစ်ဆင့် ဗီဒီယိုဖြင့် တက်ရောက်ကာ တော်လှန်ရေးအရှိန်အဟုန် မြှင့်တင်နိုင်ရေး၊ ရှေ့လုပ်ငန်းစဉ်များနှင့် ပတ်သက်၍ ဘုံသဘောထား ရပ်တည်ချက်များ အဖြေထုတ်နိုင်ရေးတို့ကို အလေးအနက် လမ်းညွှန်ဆွေးနွေးခဲ့ကြသည်။

​ဆွေးနွေးပွဲတွင် စစ်အာဏာရှင်စနစ်အောက်၌ ဖိနှိပ်ခံနေရသည့် ပြည်သူလူထု၏ ဘဝအခြေအနေများ၊ တန်းတူညီမျှမှုနှင့် လူမှုတရားမျှတမှု မရှိခြင်းများကို အမြစ်ပြတ်ချေမှုန်းရန်အတွက် နိုင်ငံရေးမူဝါဒပိုင်းဆိုင်ရာ စည်းလုံးမှုနှင့် ဘုံရန်သူကို ဦးတည်ပြီး ဟန်ချက်ညီညီတိုက်ပွဲဝင်နိုင်ရေးကို အဖွဲ့အစည်းအသီးသီးမှ ကိုယ်စားလှယ်များက ပွင့်လင်းမြင်သာစွာ အမြင်ချင်းဖလှယ် ဆွေးနွေးခဲ့ကြသည်။

​ဆိုရှယ်ဒီမိုကရက်တစ်ပါတီ (SDP)၏ ကရင်နီပြည် ပါတီတာဝန်ခံ ရဲဘော်အိမွန်ခင်က ဆွေးနွေးပွဲတွင် ပြောကြားရာ၌ - “ကျမတို့ရဲ့ ဘုံရန်သူဟာ စစ်အာဏာရှင်စနစ်တင်မကဘဲ၊ လူထုကို မညီမျှမှုတွေနဲ့ ဖိနှိပ်နေတဲ့ စနစ်ဆိုးကြီးဖြစ်ပါတယ်။ ဒီစနစ်ဆိုးကို ဖြိုဖျက်ဖို့ဆိုရင် အင်အားစုတွေအကြား ‘စည်းလုံးညီညွတ်မှု (Solidarity)’ က အဓိက သော့ချက်ဖြစ်ပြီး ဘယ်သူ့ကိုမှ ချန်မထားခဲ့တဲ့ လူ့အဖွဲ့အစည်းသစ်ဆီကို အတူတူ ချီတက်သွားကြရမှာ ဖြစ်ပါတယ်” ဟု အလေးအနက် ထည့်သွင်းပြောကြားခဲ့သည်။

​ယခု တွေ့ဆုံဆွေးနွေးပွဲမှတစ်ဆင့် ရှေ့ဆက်လုပ်ဆောင်မည့် မဟာဗျူဟာမြောက် ဘုံလုပ်ငန်းစဉ်များကို ထိရောက်စွာ အကောင်အထည်ဖော်ရန် သဘောတူညီချက်များ ချမှတ်နိုင်ခဲ့ကြသည်။

​တက်ရောက်လာကြသည့် မဟာမိတ်အဖွဲ့အစည်း (၆) ဖွဲ့လုံးမှ ကိုယ်စားလှယ်များနှင့် တော်လှန်ရေးရဲဘော်များသည် ဘုံရန်သူကို အပြတ်တိုက်ထုတ်ရန် စည်းလုံးစွာ သန္နိဋ္ဌာန်ပြုခဲ့ကြပြီး၊ အနာဂတ်တွင် ပြည်သူ့အာဏာ ပြည်သူ့ထံ ပြန်လည်အပ်နှင်းမည့် တရားမျှတသော လူ့အဖွဲ့အစည်း ပေါ်ထွန်းလာသည်အထိ လက်တွဲတိုက်ပွဲဝင်သွားကြမည်ဖြစ်ကြောင်း ကတိပြုကာ ဆွေးနွေးပွဲကို အောင်မြင်စွာ ရုပ်သိမ်းခဲ့ကြောင်း သတင်းရရှိသည်။

18/07/2026

"ဘုံရန်သူဦးတည်တိုက်ရေးနှင့် ညီညွတ်ရေးဆီသို့ " နိုင်ငံရေးဆွေးနွေးပွဲ

​"လေးစားအပ်ပါသော လူထုအခြေပြု အင်အားစုများနှင့် တော်လှန်ရေးရဲဘော်များခင်ဗျာ..."

​လက်ရှိ မြန်မာ့နိုင်ငံရေး အကူးအပြောင်းကာလတွင် ဘုံရန်သူကို ဟန်ချက်ညီညီ တိုက်ဖျက်နိုင်ရေးနှင့် အနာဂတ် ဖက်ဒရယ်ဒီမိုကရေစီနိုင်ငံတော် တည်ဆောက်ရေးအတွက် အင်အားစုများအကြား ညီညွတ်ရေးသည် အရေးကြီးဆုံးသော သော့ချက်ဖြစ်ပါသည်။

​သို့ဖြစ်ပါ၍ တော်လှန်ရေးအရှိန်အဟုန် မြှင့်တင်နိုင်ရန်နှင့် ရှေ့လုပ်ငန်းစဉ်များအပေါ် ဘုံသဘောထားရပ်တည်ချက်များ အဖြေထုတ်နိုင်ရန် ရည်ရွယ်၍ ကျင်းပပြုလုပ်မည့် ဤနှီးနှောဖလှယ်ပွဲသို့ မိမိတို့နှင့်အတူ လက်တွဲပူးပေါင်းပါဝင်ဆွေးနွေးပေးပါရန် လေးစားစွာဖြင့် ဖိတ်ကြားအပ်ပါသည်။

ဆိုရှယ်ဒီမိုကရက်တစ်ပါတီ

07/07/2026

✊ ဘုံရန်သူဦးတည်တိုက်ရေးနှင့် ညီညွတ်ရေးဆီသို့ 🤝

​သမိုင်းက ပေးအပ်ထားတဲ့ တော်လှန်ရေးတာဝန်ကို ရဲရဲဝံ့ဝံ့ ပခုံးထမ်းထားကြတဲ့ ရဲဘော်တွေ....

ဒီနေ့ ဇူလိုင်လ (၇) ရက်နေ့မှာ ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ် (ဗကသ) နဲ့ ကရင်နီပြည်ကျောင်းသားများသမဂ္ဂ (KSSU) တို့ ပူးပေါင်းကျင်းပတဲ့ "7 July" အောက်မေ့ဖွယ်အခမ်းအနားမှာ ကျနော်တို့ ဆိုရှယ်ဒီမိုကရက်တစ်ပါတီ (SDP) ရဲဘော်တွေဟာ မဟာမိတ် လူ့ဘောင်သစ်လူငယ် (YNS) ရဲဘော်တွေနဲ့အတူ လက်တွဲပြီး... တော်လှန်ရေးရဲ့ အဓိကမောင်းနှင်အားဖြစ်တဲ့ လူငယ်ထုကြား အရှိန်အဟုန်မြှင့်တင်ဖို့ "ဘုံရန်သူဦးတည်တိုက်ရေးနှင့် ညီညွတ်ရေးဆီသို့" ကမ်ပိန်း နှိုးဆော်ချက် ပန်းဖလက်တွေကို ရဲဘော်ရဲဘက်စိတ်အပြည့်နဲ့ ဖြန့်ဝေခဲ့ကြပါတယ်။

အခမ်းအနားမှာလည်း ကျနော်တို့ပါတီရဲ့ ကရင်နီဒေသ ပါတီတာဝန်ခံ ရဲဘော် အိမွန်ခင်က ပါတီရဲ့ သဝဏ်လွှာကို ဖတ်ကြားတင်သွင်းခဲ့ပါတယ်။

​ဒီကနေ့ ကျနော်တို့ရင်ဆိုင်နေရတဲ့ ဖက်ဆစ်စစ်တပ်ဟာ အားလုံးရဲ့ ဘုံရန်သူဖြစ်ပါတယ်။ ဒီရန်သူကို အမြစ်ပြတ်ချေမှုန်းဖို့ဆိုရင် ကျနော်တို့ တော်လှန်ရေးအင်အားစုအားလုံး၊ အထူးသဖြင့် လူငယ်ထုကြားမှာ ခိုင်မာတဲ့ သွေးစည်းညီညွတ်မှု ရှိဖို့က အသက်တမျှ အရေးကြီးပါတယ်။

​သမိုင်းပေးတာဝန်ကို ပခုံးထမ်းထားကြတဲ့ ကျောင်းသားလူငယ်တွေအနေနဲ့ မိမိတို့ရဲ့ အတွေးအခေါ်၊ ယုံကြည်ချက်တွေ မတူညီကြပေမယ့် "ဘုံရန်သူ" ကို တိုက်ထုတ်ဖို့ရာမှာတော့ လက်တွဲမဖြုတ်တမ်း ညီညီညွတ်ညွတ်နဲ့ ချီတက်ကြဖို့ ကျနော်တို့ ဆိုရှယ်ဒီမိုကရက်တစ်ပါတီက တိုက်တွန်းနှိုးဆော်လိုက်ပါတယ်။

​အဖိနှိပ်ခံလူထုအားလုံး လွတ်မြောက်ဖို့နဲ့ စစ်အာဏာရှင်စနစ် အပြီးတိုင်ချုပ်ငြိမ်းဖို့အတွက်...
"ညီညွတ်ကြ... ဟေ့... ညီညွတ်ကြ"

​

06/07/2026

ဆဲဗင်းဇူလိုင်နေ့သို့ ဆိုရှယ်ဒီမိုကရက်တစ်ပါတီမှ ပေးပို့သောသဝဏ်လွှာ

ရက်စွဲ။ ။ ၂၀၂၆ ခုနှစ်၊ ဇူလိုင်လ ၇ ရက်

ဒီနေ့ဟာ ဇူလိုင်လ (၇) ရက်နေ့ ဖြစ်တယ်။
ဗမာပြည်ရဲ့ သမိုင်းဝင် တက္ကသိုလ်ရင်ပြင်ထက်မှာ ကျောင်းသားထု သွေးချောင်းစီးခဲ့ရတဲ့နေ့၊ မိခင်ပေါင်းများစွာ သွေးမျက်ရည် မိုးလိုရွာခဲ့ရတဲ့နေ့ ၊ မတရားမှုကို ခေါင်းငုံ့မခံခဲ့တဲ့ ခွပ်ဒေါင်းအလံတော်အောက်မှာ အာဇာနည်ကျောင်းသား တရာကျော် အသက်ပေးသွားခဲ့ရတဲ့နေ့ဖြစ်တယ်။

ဖက်ဆစ်ဗိုလ်ချုပ်တွေနဲ့ မိစ္ဆာစစ်ဘီလူး အာဏာရူးအဆက်ဆက်ဟာ လက်နက်မဲ့ကျောင်းသားများ၏ အလောင်းပုံပေါ်မှာ သူတို့ရဲ့ အာဏာပလ္လင်ကို တည်ဆောက်ခဲ့ကြတယ်။ သမိုင်းဝင် ကျောင်းသားသမဂ္ဂအဆောက်အအုံ (တကသ) ကို ရက်စက်စွာ ဗုံးခွဲဖျက်ဆီးပစ်ခဲ့တဲ့ ကမ္ဘာမကျေနိုင်တဲ့ ရာဇဝတ်မှုကြီးဟာ ဒီမြေကြီးထက်မှာ အမှန်တကယ် ဖြစ်ပျက်ခဲ့တယ်။ သမဂ္ဂရင်ပြင်နီနှင့် ဗိုလ်အောင်ကျော်ကျောက်တိုင်ရှေ့မှာ ကျောင်းသားရဲဘော် ရာကျော်တို့ရဲ့ ရုပ်အလောင်းများကို တန်းစီချထားခဲ့ရတဲ့ ဖြစ်ရပ်ဆိုးကြီးကို ပြည်သူ့နှလုံးသားမှာ ဘယ်သောအခါမှ မမေ့ပျောက်နိုင်ခဲ့ပါ။

အို... အသက်ပေးလှူသွားကြသည့် ဆဲဗင်းဇူလိုင် အာဇာနည် ကျောင်းသားသူရဲကောင်းတို့...

သင်တို့ဟာ ဘယ်သောအခါမျှ သေဆုံးသွားကြမည်မဟုတ်။ သင်တို့ ရေးထိုးသွားခဲ့တဲ့ တော်လှန်ရေး သမိုင်းဟာ ယနေ့တိုင် အသက်ဝင် လှပနေဆဲ ဖြစ်တယ်။ သင်တို့ လဲလျောင်းသွားခဲ့ရသော မြေဆီလွှာဟာ ယနေ့ခေတ် စစ်အာဏာရှင်စနစ်ကို အမြစ်ဖြတ်ချေမှုန်းမယ့် အာဇာနည်အထောင်အသောင်းကို ထပ်မံမွေးဖွားပေးလိုက်တဲ့ ဗဟိုချက်မ ဖြစ်လာခဲ့ပြီ။ သင်တို့၏ သွေးမြေကျမှုကနေ ယနေ့ နွေဦးတော်လှန်ရေးအထိ တော်လှန်ပန်းတွေ အပြိုင်းအရိုင်း ဖူးပွင့်ခဲ့ကြပြီ။

ပြည်သူလူထုက သင်တို့ရဲ့ ပေးဆပ်မှုကို ဘယ်သောအခါမှ မေ့လျော့မည်မဟုတ်။ တနိုင်ငံလုံးကိုယ်စား ရှေ့တန်းမှ မားမားမတ်မတ် ရပ်တည်ကာ ဖက်ဆစ်စစ်အာဏာရှင်စနစ်ကို အသက်စွန့် တော်လှန်သွားခဲ့တဲ့ ရဲဘော်တို့၏ လင်းလက်သော ဝိညာဉ်များဟာ ယနေ့ တိုက်ပွဲဝင်နေသော လူထုနှင့် လက်နက်ကိုင် ရဲဘော်များအတွက် လမ်းပြကြယ်တွေဖြစ်ပါတယ်။

နာကြင်နေတဲ့ပြည်သူတွေကို ရှေ့ဆက်ဖို့ ခွန်အားတွေ သင်တို့က ပေးသွားခဲ့ပါပြီ။
အိပ်မောကျနေတဲ့ လူတချို့ကို မျက်စိစုံပွင့်လာဖို့ သင်တို့က လှုပ်နှိုးခဲ့ပြီးပြီ။

ဒီနေ့တော်လှန်စစ်မှာ မွန်းကြပ်နေတဲ့ နေ့ရက်တွေကြားထဲ တော်လှန်ပြည်သူတွေဟာ ဆဲဗင်းဇူလိုင် စိတ်ဓာတ်ကို ကိုင်စွဲပြီး ရှေ့ဆက်နေကြပါတယ်။

တရားမျှတမှုအတွက် ကြွေးကြော်စူးရဲ တော်လှန်ရဲတဲ့ သမိုင်းဝင် ဆဲဗင်းဇူလိုင် ရဲဘော်များအပါအဝင် ခေတ်အဆက်ဆက် သမိုင်းအဆက်ဆက် အသက်သွေးချွေး ပေးဆပ်ခဲ့တဲ့ တော်လှန်ပြည်သူအပေါင်းကို မိမိတို့ ဆိုရှယ်ဒီမိုကရက်တစ်ပါတီဝင် ရဲဘော်ထုတရပ်လုံးက အလေးအနက် ဦးညွတ်ပြီး အလေးပြုလိုက်ပါတယ်။

* ဘုံရန်သူ စစ်သုံးစစ် ကျရှုံးရမည်။
* ပြည်သူ့အရေးတော်ပုံ အောင်ရမည်။

ဗဟိုကော်မတီ
ဆိုရှယ်ဒီမိုကရက်တစ်ပါတီ

29/06/2026

SD Institute မှ ထုတ်ဝေသည့် ဤသုတေသနစာတမ်းသည် ၂၀၂၁ ခုနှစ်နောက်ပိုင်း မြန်မာ့နွေဦးတော်လှန်ရေးကာလအတွင်း အများပြည်သူသိကြသည့် "ဒလန်"ဟုခေါ်သော အရပ်သားသတင်းပေးများကို ပစ်မှတ်ထားလုပ်ကြံမှုများအကြောင်း ဆန်းစစ်ဖော်ပြထားသည်။

အဆိုပါစာတမ်းတွင် ဤကဲ့သို့သော လုပ်ဆောင်ချက်များ၏ နောက်ကွယ်မှ နိုင်ငံရေးနှင့် လူမှုရေးဆိုင်ရာ အကြောင်းအရင်းများကို ခွဲခြမ်းစိတ်ဖြာထားပြီး၊ စစ်ဘက်နှင့် အရပ်ဘက် နယ်ပယ်များအကြား စည်းခြားထားမှု ဝေဝါးလာခြင်းက လူမှုအသိုင်းအဝိုင်းအတွင်း စနစ်တကျ မုန်းတီးမှုများကို ပိုမိုမီးထိုးပေးနေကြောင်း ထောက်ပြထားသည်။

တော်လှန်ရေးအင်အားစုအချို့၏ အမြင်

ဤသို့ ရှင်းလင်းမှုများကို လုံခြုံရေးအရ မဖြစ်မနေ လုပ်ဆောင်ရမည့် ကိစ္စရပ်တစ်ခုအဖြစ် ရှုမြင်ကြသည်။

အစီရင်ခံစာ၏ သတိပေးချက်

ဤလုပ်ရပ်များသည် အပြစ်မဲ့ပြည်သူများ၏ အသက်ပေါင်းများစွာကို ဝေဒနာဆိုးရွားစွာ ဆုံးရှုံးရစေရုံမက၊ ပြည်သူလူထု၏ ထောက်ခံမှုကိုပါ ကျဆင်းစေသည့် ဆိုးကျိုးများကို သတိပေးထားသည်။

ဆိုရှယ်ဒီမိုကရက်တစ်ပါတီ (SDP) ၏ သုံးသပ်ချက်

ယင်းကဲ့သို့ အကြမ်းဖက်မှုများသည် ကြားနေပြည်သူများကို စစ်ကောင်စီဘက်သို့ တွန်းပို့သကဲ့သို့ ဖြစ်စေပြီး၊ ရေရှည်တွင် တော်လှန်ရေးလှုပ်ရှားမှုကို အားနည်းသွားစေသည်ဟု ထောက်ပြထားသည်။

ထို့ကြောင့် စာတမ်းပြုစုသူများက တရားလက်လွတ် လုပ်ကြံသတ်ဖြတ်မှုများအပေါ် မှီခိုနေမည့်အစား နိုင်ငံရေးအသိတရားကို မြှင့်တင်ရန်နှင့် အတွင်းပိုင်းလုံခြုံရေးကို ပိုမိုတင်းကျပ်ရန် တိုက်တွန်းထားသည်။

စာတမ်း၏ နိဂုံးတွင် ရေရှည်တည်တံ့သော အောင်ပွဲကို ဖော်ဆောင်နိုင်ရန်အတွက် အဖွဲ့အစည်းအချင်းချင်း ညီညွတ်မှုနှင့် ဗျူဟာမြောက် စဉ်းစားတွေးခေါ်မှုတို့ လိုအပ်ကြောင်း အလေးအနက် မီးမောင်းထိုးပြထားသည်။

This research paper from the SD Institute examines the targeted killing of civilian informants, known as dalan, within the context of Myanmar’s post-2021 revolution.

The document analyzes the political and social causes behind these actions, noting that the blurring of lines between military and civilian spheres has fueled systemic hatred. While some revolutionary groups view these eliminations as a security necessity, the report warns of severe negative consequences, including the tragic loss of innocent lives and the erosion of public support.

The Social Democratic Party argues that such violence ultimately weakens the revolutionary movement by driving neutral citizens toward the military.

To address this, the authors advocate for higher political consciousness and stronger internal security rather than relying on extrajudicial killings.

The text concludes by emphasizing the need for organizational unity and strategic thinking to achieve a sustainable victory.

Download Link

https://drive.google.com/file/d/1CUBqDFNoc-RDzDoTzZwlt8QxVHlrK2j4/view?usp=drivesdk

28/06/2026

“ဘုံရန်သူဦးတည်တိုက်ရေးနှင့် ညီညွတ်ရေးဆီသို့” ပူးတွဲနှိုးဆော်ချက်နှင့် ဖိတ်ခေါ်လွှာ

​🗓️ ရက်စွဲ - ၂၀၂၆ ခုနှစ်၊ ဇွန်လ (၂၈) ရက်

​နွေဦးတော်လှန်ရေးကြီး အမြစ်ပြတ်အောင်ပွဲဆီသို့ အရှိန်အဟုန်ဖြင့် လျှောက်လှမ်းနိုင်ရန်အတွက် တော်လှန်ရေးအင်အားစုများအားလုံး အချင်းချင်းကြား သဘောထားကွဲလွဲမှုများကို လက်နက်အားကိုးဖြင့် မဖြေရှင်းဘဲ “ညီညွတ်ရေးကို အခြေခံသည့် နိုင်ငံရေးအရ တန်းတူရည်တူ ညှိနှိုင်းဆွေးနွေးခြင်း” နည်းလမ်းဖြင့်သာ ဖြေရှင်းသွားကြရန် အလေးအနက် တိုက်တွန်းနှိုးဆော်အပ်ပါသည်။

​တော်လှန်ရေးရဲဘော်များ၊ နိုင်ငံရေးအင်အားစုများနှင့် မိဘပြည်သူတစ်ရပ်လုံးအနေဖြင့် “ဘုံရန်သူဦးတည်တိုက်ရေးနှင့် ညီညွတ်ရေးဆီသို့” လှုပ်ရှားမှုတွင် မိမိတို့ တတ်စွမ်းသည့် ကဏ္ဍအသီးသီးမှ တက်ကြွစွာ ပူးပေါင်းပါဝင်ပေးကြပါရန် လေးစားစွာဖြင့် ဆော်ဩဖိတ်ခေါ်အပ်ပါသည်။

​👇 အသေးစိတ်ထုတ်ပြန်ချက်နှင့် ပူးပေါင်းပါဝင်သည့် အဖွဲ့အစည်းများစာရင်းကို အောက်ပါဓာတ်ပုံများတွင် ဖတ်ရှုနိုင်ပါသည်။

[edited- ဘုံရန်သူဦးတည်တိုက်ရေးနှင့်ညီညွတ်ရေးဆီသို့ ပူးတွဲနှိုးဆော်ချက်နှင့်တိုက်တွန်းလွှာထုတ်ဝေပြီး နောက်ဆက်တွဲ ထပ်တိုးစာရင်းပေးလာသောအဖွဲ့များ ထပ်မံတိုးချဲ့ဖော်ပြထားပြီး ယခုအချိန်ထိ အဖွဲ့ပေါင်း ၁၅၆ ဖွဲ့ရှိသွားပါပြီ။]

​ #ဘုံရန်သူဦးတည်တိုက်ရေးနှင့်ညီညွတ်ရေးဆီသို့ #နွေဦးတော်လှန်ရေး #ညီညွတ်ရေးဟာအစွမ်းထက်ဆုံးလက်နက်

https://drive.google.com/drive/folders/1oFV-uYnX-WlzuJt2wgt5tkeZfdIvC0yo?usp=sharing

အထက်ပါ DRIVE ထဲမှာ Statement File နှင့် ကြွေးကြော်သံ Design များကို​ပါ ဖော်ပြပေးထါးပါတယ်။

13/06/2026

ဒီပို့စ်မှာ ပါတဲ့ အချက်အလက်တွေကို စစ်ဆေးကြည့်ရင် တချို့အချက်တွေက တကယ်ဖြစ်ခဲ့တဲ့ သတင်းအပေါ် အခြေခံထားပေမယ့် အရေးကြီးတဲ့ အပိုင်းများမှာ သက်သေမရှိတဲ့ စွပ်စွဲချက်တွေ၊ သတင်းမှားတွေ ရောနှောထားတာ တွေ့ရပါတယ်။

၁။ "လူသန်းချီ ဆန္ဒပြနေတယ်" ဆိုတာ
တောင်ကိုရီးယားမှာ ၂၀၂၆ ရွေးကောက်ပွဲအပြီး မဲစာရွက်မလုံလောက်တဲ့ ပြဿနာကြောင့် ဆန္ဒပြပွဲတွေ ဖြစ်ခဲ့တာ မှန်ပါတယ်။ ဒါပေမယ့် Reuters အပါအဝင် ယုံကြည်စိတ်ချရတဲ့ သတင်းဌာနတွေက ဖော်ပြထားတာက "ထောင်ပေါင်းများစွာ" (thousands) သို့မဟုတ် "သောင်းချီ" (tens of thousands) အဆင့်ဖြစ်ပြီး "လူသန်းချီ" ဆိုတာကို အတည်ပြုထားတာ မတွေ့ရပါ။

၂။ "မဲလိမ်လည်မှု (Election Fraud) တွေ့ရှိတယ်" ဆိုတာ မဲစာရွက်မလုံလောက်ခြင်း၊ စီမံခန့်ခွဲမှုအမှားတွေ ရှိခဲ့တာ မှန်ပါတယ်။ NEC ဥက္ကဋ္ဌတောင် နုတ်ထွက်ခဲ့ပါတယ်။ ဒါပေမယ့် ယခုအချိန်ထိ တရားဝင် စုံစမ်းစစ်ဆေးမှုတွေက "ရွေးကောက်ပွဲလိမ်လည်မှု သက်သေ" ကို မတွေ့ရသေးပါဘူး။ မဲလိမ်တယ်ဆိုတဲ့ စွပ်စွဲချက်များကို သက်သေမရှိသော conspiracy theory များအဖြစ် ဖော်ပြထားကြပါတယ်။

၃။ "လူအများကြီး မဲမရခဲ့ဘူး" ဆိုတာ
ဒီအချက်က အချို့အတိုင်းအတာအထိ မှန်ပါတယ်။ မဲစာရွက်ကုန်သွားတဲ့ မဲရုံအချို့မှာ မဲပေးသူတွေ စောင့်ဆိုင်းရတာ၊ အချို့ မဲမပေးနိုင်တာတွေ ဖြစ်ခဲ့ပါတယ်။ ဒါပေမယ့် ဒါဟာ စီမံခန့်ခွဲမှုအမှား (ballot shortage) ဖြစ်ပြီး မဲခိုးမှု သက်သေအဖြစ် မသတ်မှတ်နိုင်သေးပါ။

၄။ "တရုတ်ရဲတွေ ကိုရီးယားရဲအသွင်ဆောင်ပြီး ဆန္ဒပြသူတွေကို နှိမ်နင်းတယ်" ဆိုတာ
ဒီအချက်အတွက် ယုံကြည်စိတ်ချရတဲ့ သက်သေ မတွေ့ရပါဘူး။

AFP Fact Check က ယခင်ကလည်း "တရုတ်သူလျှိုတွေ၊ တရုတ်ရဲတွေ ကိုရီးယားရဲအသွင်ဆောင်ထားတယ်" ဆိုတဲ့ ဓာတ်ပုံများ၊ ဗီဒီယိုများကို စစ်ဆေးပြီး မှားယွင်းဖော်ပြထားခြင်းဖြစ်ကြောင်း ဖော်ထုတ်ထားပါတယ်။

၅။ "ကိုရီးယားလူငယ်တွေ တရုတ်အလံ မီးရှို့နေတယ်" ဆိုတာ တရုတ်ဆန့်ကျင်ရေး ဆန္ဒပြသူအချို့ ရှိနိုင်ပေမယ့် ဒီပို့စ်ထဲကလို နိုင်ငံတစ်ဝန်း ကျယ်ပြန့်စွာ ဖြစ်နေတယ်ဆိုတဲ့ အချက်ကို အတည်ပြုနိုင်တဲ့ ယုံကြည်ရသော သတင်းရင်းမြစ် မတွေ့ရပါဘူး။

အဆုံးသတ် အကဲဖြတ်ချက်

ဒီပို့စ်ကို "Mostly False / Misleading" (အများအားဖြင့် မှားယွင်း သို့မဟုတ် လှည့်ဖြားဖော်ပြထားသော ပို့စ်) လို့ သတ်မှတ်နိုင်ပါတယ်။

✅ မှန်တဲ့အပိုင်း

မဲစာရွက်မလုံလောက်မှု ဖြစ်ခဲ့တယ်။
ဆန္ဒပြပွဲတွေ ဖြစ်ခဲ့တယ်။
ရွေးကောက်ပွဲ စီမံခန့်ခွဲမှုအပေါ် ဝေဖန်မှုတွေ ရှိခဲ့တယ်။

❌ သက်သေမရှိတဲ့အပိုင်း

လူသန်းချီ ဆန္ဒပြနေတယ်။
မဲလိမ်လည်မှု သက်သေတွေ တွေ့ရှိပြီးပြီ။
တရုတ်ရဲတွေ ကိုရီးယားရဲအသွင်ဆောင်ထားတယ်။
တရုတ်က ရွေးကောက်ပွဲကို ထိန်းချုပ်နေတယ်။

အကျဉ်းချုပ်ပြောရရင် တကယ့် ဖြစ်ရပ် (ballot shortage) ကို အခြေခံပြီး နိုင်ငံရေးဆိုင်ရာ စွပ်စွဲချက်တွေ ထပ်ဖြည့်ထားတဲ့ ပို့စ် လို့ မြင်နိုင်ပါတယ်။