27/07/2026
ОРОН НУТАГТ САНХҮҮГИЙН ЭРХ МЭДЛИЙГ ОЛГОЖ, ИТХ ХЯНАЛТ ТАВИХ ЭРХ ЗҮЙН ОРЧНЫГ БҮРДҮҮЛНЭ
Монгол Улсын Шадар сайд, Улсын Онцгой Комиссын дарга Н.Номтойбаяр Завхан аймагт ажиллаж байна.
Завхан аймгийн төрийн захиргааны болон нутгийн захиргааны байгууллагын удирдлагууд, төрийн албан хаагчидтай уулзав. Энэ үеэр Завхан аймгийн Засаг дарга Г.Өнөрбаяр аймгийн өвөлжилтийн бэлтгэл ажил, тулгамдаж буй асуудлын талаар танилцууллаа.
✅Аймагт баригдаж буй Дулааны станцын барилга угсралтын ажлыг яаралтай эхлүүлэх тал дээр тодорхой шийдвэр гаргах,
✅Зүүн аймгаас байгалийн хадлан бэлтгэхэд зориулж, хадлан бэлтгэх газар олгох,
✅Алдархаан, Завханмандал, Тосонцэнгэл, Яруу сумын Засаг Даргын Тамгын Газар, Асгат, Ургамал, Завханмандал, Цагаанчулуут, Идэр сумын эрүүл мэндийн төв болон аймгийн Эрүүл мэндийн газарт шаардлагатай автомашиныг шийдвэрлэж өгөхийг хүслээ.
Монгол Улсын Шадар сайд, Улсын Онцгой Комиссын дарга Н.Номтойбаяр бүсчилсэн хөгжлийн хүрээнд төрөөс хэрэгжүүлж буй эдийн засгийн бодлогыг танилцуулж, орон нутагт санхүүгийн эрх мэдлийг олгож, ИТХ хяналт тавих эрх зүйн орчныг бүрдүүлнэ хэмээв.
Түүнчлэн шадар сайд төвийн болон зүүн бүсээс хадлан бэлтгэхэд тулгамдаж буй зах зээл, эдийн засагтай холбоотой асуудлыг газар дээр нь шийдвэрлэнэ гэв.
Мөн төмөр замын анхны бодлого Арцсуурь боомтоос эхэлж байгааг дурдаж, хэрэгцээ шаардлагатай газруудад туулах чадвар сайтай автомашиныг цаашид шийдвэрлэнэ гэдгийг хэллээ.
Уулзалтад Монгол Улсын Шадар сайдын Ахлах зөвлөх бөгөөд Ажлын албаны дарга Б.Мөнх-Оргил болон бусад албаныхан оролцов.
