14/05/2026
НЭЭЛТТЭЙ МЭДЭЭЛЛИЙН СИСТЕМ (shilen.gov.mn)-Д “ШИЛЭН ИНДЕКС”-ИЙН МЭДЭЭЛЭЛ ХҮЛЭЭН АВАХ 2026 ОНЫ 2 ДУГААР УЛИРАЛ ЭХЭЛЛЭЭ
Нээлттэй мэдээллийн систем (shilen.gov.mn)-д “Шилэн индекс”-ийн мэдээлэл илгээх 2026 оны 2 дугаар улирал албан ёсоор эхэллээ
Иймд, төрийн болон орон нутгийн өмчит, төрийн өмчийн оролцоотой хуулийн этгээд, хуульд заасан бусад мэдээлэл хариуцагч байгууллагууд www.shilen.gov.mn системд бүртгэлээ баталгаажуулж, 2026 оны 2 дугаар улирлын "Шилэн индекс"-ийн мэдээллээ тогтоосон хугацаанд буюу 06 дугаар сарын 30-ний өдрийн 18:00 цагаас өмнө багтаан илгээхийг уриалж байна.
Монгол Улсын Засгийн газраас авлигатай тэмцэх хүрээнд хэрэгжүүлж буй “5Ш” ажиллагааны хүрээнд төрийн байгууллагын ил тод, нээлттэй байдлыг хангах, иргэдийн мэдээлэл авах эрхийг бодитоор хэрэгжүүлэх зорилгоор “Шил ажиллагаа”-г хэрэгжүүлж байгаа бөгөөд энэ хүрээнд shilen.gov.mn системийг 2023 оны 03 дугаар сарын 27-ны өдөр ашиглалтад оруулсан.
Тус систем нь мэдээлэл хариуцагч байгууллагуудын үйл ажиллагаа, төсөв санхүү, хүний нөөц, худалдан авах ажиллагаа, төрийн үйлчилгээ болон хуульд заасан бусад нээлттэй мэдээллийг нэгтгэн олон нийтэд ил тод хүргэх үндсэн платформ юм.
Цахим хөгжил, инновац, харилцаа холбооны яам
