17/08/2026
ЭМГЭНЭЛ
ХАЛЬБИН ОВОГТ ДАНЗАНЫ БАТСАЙХАН
/1958–2026/
Улаанбаатар хот дахь Дорнод аймгийн Дашбалбар сумын нутгийн зөвлөлийн зөвлөх, Монгол Улсын “Соёлын тэргүүний ажилтан”, “Хэвлэл мэдээллийн тэргүүний ажилтан”, Иргэний Зориг Ногоон намын ахмад гишүүн Хальбин овогт Данзаны Батсайхан 2026 оны 08 дугаар сарын 16-ны өдөр өвчний учир таалал төгслөө.
Тэрээр 1958 оны 05 дугаар сарын 27-ны өдөр Дорнод аймгийн Чойбалсан хотод төрсөн бөгөөд цэцэрлэгт хүмүүжин,
-1966-1974 онд Дорнод аймгийн Дашбалбар сумын дунд сургууль,
-1975–1976 онд Улаанбаатар хотод Дүрслэх урлагийн дунд сургуульд суралцаж байгаад 1976 онд Монголын Ардын Армийн 013 дугаар ангийн Холбооны тусгай батальоны сургуулийн ротыг “Радио холбоо”-ны мэргэжлээр төгсөж, Улиастайн 016 дугаар нэгтгэлийн Зенитийн 121 дүгээр ангид алба хааж, 1979 оны 04 дүгээр сард Батлан хамгаалах яамны офицерын курсыг тус тус төгссөн юм.
Улмаар Дорнод аймгийн Нийгмийг аюулаас хамгаалах газарт 1979 оноос Сэргийлэн хамгаалах албанд сэргийлэгч, тусгай холбооны оператор, шинжээч гэрэл зурагчнаар ажиллаж байсан билээ.
1989 оноос Монголын Ардчилсан Холбооны Дорнод аймгийн Хэвлэл мэдээллийн албанд ажиллаж, Монгол Улсад ардчилсан хувьсгал өрнөх үйл хэрэгт манлайлан оролцсож байсан юм. Дорнод аймагт 1989–1990 онд өрнөсөн ардчиллын үйл явдлыг гэрэл зурагт бүрэн буулган түүхэнд үлдээж, ардчилсан хувьсгалын 10 жилийн ойн хүрээнд зарласан гэрэл зургийн уралдаанд баялаг үзэсгэлэнгээрээ тэргүүн байр эзэлж, Монголын Ардчилсан Холбооны даргын шагналыг гардан авсан юм.
1999 оноос “Улаанбаатар” сонины гэрэл зургийн сурвалжлагч, Улсын Их Хурлын дэд даргын комиссар, Улсын Их Хурлын “Экспрейс таймс” сонины сурвалжлагчаар 13 жил ажиллаад цэргийн тусгай тэтгэвэрт гарсан юм.
Тэрбээр Монголын Ардчилсан Холбоо, Ардчилсан нам, Иргэний Зориг Нам болон төр, олон нийтийн байгууллагуудын арга хэмжээг олон жилийн турш гэрэл зургаар тэмдэглэж, 1990 оноос хойшхи Монголын шинэ үеийн түүхийг фото зурагт мөнхөрүүлэн үлдээсэн.
Мөн Буриад соёл, өв уламжлалыг хөгжүүлэх сангийн бүхий л арга хэмжээ, Дэлхийн “Алтаргана” их наадмыг гэрэл зургаараа амилуулж, Буриад түмний хүндэт ах, фото зургийн их мастер, түүхийн амьд гэрч гэсэн үнэлэлтийг нутаг нэгтнүүдээсээ хүлээсэн билээ.
Буриад түмнийхээ нэр төр, өв соёл, уламжлал, эв нэгдлийг эрхэмлэн дээдэлж, “Амин тоонто” Төрийн бус байгууллагын буриад залуучуудын санаачилсан бүхий л ажил, үйлсийг цаг үргэлж дэмжин тусалж, шаардлагатай хүмүүстэй холбон гүүр болж, арвин мэдлэг, туршлага, ухаанаараа тэдний зөвлөгч, “нэвтэрхий толь” нь болж явсан билээ.
Улаанбаатар хот дахь Дорнод аймгийн нутгийн зөвлөлд 1999 оноос эхлэн идэвхтэй ажиллаж, аймгийн нутгийн зөвлөлийн олон ажил, арга хэмжээнд биечлэн оролцсож насан эцэслэх хүртлээ Улаанбаатар хот дахь Дашбалбар сумын нутгийн зөвлөлийн дарга асан И.Гончигбат, дарга Б.Оюунбилэг нарын Зөвлөхөөр үүрэгт ажлаа гүйцэтгэж, нутгийн зөвлөлийн хамт олонтой нутаг орон, иргэдийнхээ төлөө хамтран тууштай ажилласан юм.
Түүний хөдөлмөр зүтгэлийг төр, засгаас өндрөөр үнэлж Монгол Улсын төрийн дээд шагнал “Хөдөлмөрийн гавьяаны улаан тугийн одон”, “Цэргийн гавьяаны одон”, “Алтан гадас одон”, “Эрх чөлөөний одон”, “Тусгаар тогтнолын одон”, “Хөдөлмөрийн хүндэт медаль”, “Ардчилсан хувьсгалын 20 жилийн ойн медаль”, “Ардчилсан хувьсгалын 90 жилийн ойн медаль”, Оросын Холбооны Улсын Буриад Улсын “80 жилийн ойн медаль”, Оросын Холбооны Улсын “Германыг ялсны 70 жилийн ойн медаль”, Монгол Улсын “Соёлын тэргүүний ажилтан”, “Хэвлэл мэдээллийн тэргүүний ажилтан” цол, “Иргэний Зориг” медалиар тус тус шагнаж урамшуулсан билээ.
Хальбин овогт Данзаны Батсайхан бүхий л амьдралаа төр, ард түмэн, нутаг орныхоо төлөө зориулж, шударга, хичээнгүй, олон хүнд тус нэмэртэй, нутаг нэгтнүүдийнхээ хүндэтгэлийг хүлээсэн эрхэм хүмүүн байлаа. Түүний хийж бүтээсэн ажил, авсан гэрэл зураг, үлдээсэн сайхан дурсамж нутгийн зөвлөлийн хамт олон, нутаг нэгтнүүдийн зүрх сэтгэлд үүрд хоногшин үлдэх болно.
Хальбин овогт Данзаны Батсайханы гэр бүл, төрөл төрөгсдөд Иргэний Зориг Ногоон намын дарга, удирдлагууд, гишүүд, журмын нөхдөөс гүн эмгэнэл илэрхийлж байна.
Ум ма ни бад мэ хум
Иргэний Зориг Ногоон нам
