08/04/2026
🔵ОХУ-ЫН САНКТ-ПЕТЕРБУРГ ХОТНОО ОЛОН УЛСЫН ТЭЭВЭР,
ЛОГИСТИКИЙН ФОРУМД ОРОЛЦЛОО.
🔵Хилийн боомтын захиргааны дарга Б.Батхишиг тэргүүтэй төлөөлөгчид ОХУ-ын Санкт-Петербург хотод 2026 оны 04 дүгээр сарын 01-нээс 03-ны өдрийн хооронд ажиллаж, Олон улсын тээвэр, логистикийн форумд оролцлоо. Тус форумд нийт 82 орны 6000 мянга гаруй төлөөлөгч оролцож, Логистикийн шинэ геометр: Тээврийн шинэ гарцууд, Цахим шилжилт ба технологи: Ухаалаг тээвэр, Дэд бүтцийн хөрөнгө оруулалт зэрэг сэдвээр хэлэлцүүлэг өрнүүллээ.
🔵“Хилийн боомтын үр ашигтай удирдлагад зориулсан дижитал шийдлүүд” сэдэвт салбар хуралдаанд Хилийн боомтын захиргааны дарга Б.Батхишиг “ Монгол Улсын хилийн боомтын үр ашигтай удирдлагад зориулсан дижитал шийдлүүд” илтгэл тавьж хэлэлцүүллээ.
🔵Манай улс хилийн боомтууд тээврийн хэрэгслийн улсын дугаарыг автоматаар таних, бүртгэх системийг нэвтрүүлж, авто замын 8 боомтод бүрэн ашиглаж байна. Тухайлбал, Алтанбулаг боомтод 33 ухаалаг гарц ажиллаж байна.
🔵Мөн RFID технологийг нэвтрүүлснээр бүртгэл, хяналт илүү шуурхай, нарийвчлалтай болж, хүний оролцоо багассан. Үүний үр дүнд нэг тээврийн хэрэгслийн хил нэвтрэх хугацаа 3–5 минутаар богиносож, боомтын хүчин чадал 1.5–2 дахин нэмэгдэх боломж бүрдсэн.
🔵Монгол Улс БНХАУ-тай хамтран Гашуунсухайт, Шивээхүрэн, Ханги боомтуудад ухаалаг, жолоочгүй тээврийн технологийг үе шаттайгаар нэвтрүүлж байна. Ингэснээр өдөрт 400–500 тээврийн хэрэгслээр 25–30 мянган тонн ачааг илүү үр ашигтай тээвэрлэх боломж бүрдсэн. Цаашид Монгол, Орос, Хятад гурван улсын эдийн засгийн коридорын хүрээнд боомтын салбарын хамтын ажиллагааг шинэ шатанд гарган хөгжүүлэн, тээвэр логистикийн оновчтой шийдлийг үе шаттайгаар нэвтрүүлэн ажиллах болно.
🔵Харин ОХУ-ын тээврийн дэд сайд Валентин Иванов өөрийн илтгэлдээ ОХУ-ын хилийн 361 боомтынхоо 87 боомтыг 2030 он хүртэл шинэчлэхээр төлөвлөснөөс одоогоор 18 боомтын бүтээн байгуулалт шинэчлэлийн ажил бүрэн дууссан талаар мэдээлсэн. Цаашид ОХУ нь өөрийн улсын зүүн болон өмнөд боомтуудыг тэргүүлэх чиглэлдээ хөгжүүлэх бодлого барьж байгаа болно. Тус улс БНХАУ-тай хиллэх боомтуудаар хийсэн 2024 онд худалдаа 47 сая тоннд хүрсэн нь сүүлийн 5 жилийн хугацаанд 5 дахин өссөн үзүүлэлт юм.
🔵Мөн Монгол Улстай хиллэх боомтуудын ачаа тээвэр сүүлийн жилүүдэд 60%-иар нэмэгдсэн учир Монгол Улстай хиллэх тэргүүлэх 7 боомтуудад 2030 он хүртэл бүтээн байгуулалт, шинэчлэл хийгдэхээр болж Монгол, Оросын хилийн боомтуудыг хөгжүүлэх үйл ажиллагааны төлөвлөгөө (замын зураглал)-гөө байгуулан харилцан уялдаа төлөвлөн хөгжүүлэхэд анхаарч ажиллаж байна.
🔵Цаашид ОХУ өөрийн хилийн боомтууддаа цахим дарааллын систем (одоогоор 5 боомтод), биометрийн хяналт (2030 он гэхэд бүх боомтод), автомат шалгалтын цогц систем, “нэг цонх”-ны цаасгүй үйлчилгээ дижитал технологийг нэвтрүүлж, “Ирээдүйд хил нэвтрэхэд зөвхөн паспорт л цаасан баримт хэвээр үлдэж бусад баримт, деклараци зэрэг бусад баримтыг бүрэн цахим хэлбэр шилжүүлэх болно хэмээн ОХУ-ын Тээврийн дэд сайд Валентин Иванов онцоллоо.
🔵Тус салбар хуралдааны модератороор “Росгранстрой” төрийн өмчит компанийн захирлын зөвлөх Алексей Володин, илтгэгчээр ОХУ-ын Төрийн Думын гишүүн Евгений Москвичев, Алс Дорнод ба Арктикийн хөгжлийн асуудал эрхэлсэн Оросын Холбооны Улсын Тээврийн дэд сайд Виталий Алтабаев, Оросын Холбооны Улсын Тээврийн дэд сайд Валентин Иванов, Бүгд Найрамдах Хятад Ард Улсын Гаалийн Ерөнхий Газрын Улсын боомтын захиргааны дэд захирал Ше Фан болон бусад төлөөлөгчид оролцлоо.
