08/07/2026
#ЖИРЭМСЛЭХЭЭС СЭРГИЙЛЭХ АРГА ХЭРЭГСЭЛ сэдэвт цахим хурал зохион байгууллаа.
Эрүүл мэндийн сайдын 2024 оны 01 дүгээр сарын 09-ний өдрийн А/11 дүгээр тушаалын хэрэгжилтийг хангах хүрээнд 2026 оны 07 дугаар сарын 07-ны өдөр “Жирэмслэхээс сэргийлэх арга хэрэгсэл” сэдэвт цахим хурлыг зохион байгууллаа.
Цахим хуралд Эх, хүүхдийн эрүүл мэндийн үндэсний төвийн Тандалт, судалгаа, статистикийн алба, Нөхөн үржихүйн зөвлөх поликлиник, улсын болон орон нутгийн эрүүл мэндийн байгууллагын нөхөн үржихүйн эрүүл мэнд хариуцсан нийт 215 эмч, эмнэлгийн мэргэжилтэн оролцов.
Хурлын үеэр ЭХЭМҮТ-ийн Тандалт, судалгаа, статистикийн албаны эрүүл мэндийн нийгмийн ажилтан Б.Бүрэнжаргал “Жирэмслэхээс сэргийлэх арга хэрэгслийн тандалтын тогтолцоо: 2026 оны эхний хагас жилийн эргэн мэдээлэл, А/11 дүгээр тушаалын хэрэгжилт” сэдвээр, Нөхөн үржихүйн зөвлөх поликлиникийн тасгийн эрхлэгч Б.Алтанцэцэг “Гэр бүл төлөвлөлтийн аргуудаар үр дүнтэй зөвлөгөө өгөх зарчим” сэдвээр тус тус илтгэл тавьж, мэдээлэл хүргэлээ.
2026 оны эхний хагас жилийн тайлангийн дүнгээр нөхөн үржихүйн кабинетээр үйлчлүүлж, жирэмслэхээс сэргийлэх арга хэрэгслийн тусламж, үйлчилгээ авсан иргэдийн мэдээлэл өмнөх оны мөн үетэй харьцуулахад 63.4 хувиар өссөн сайн үзүүлэлттэй байна.
Мөн хурлын үеэр жирэмслэхээс сэргийлэх арга хэрэгслийн талаарх эмч, эх баригч, нийгмийн ажилтан болон бусад эрүүл мэндийн мэргэжилтний мэдлэг, ур чадварыг тогтмол бэхжүүлэх, мэдээллийн бүртгэл, тайлагналын чанарыг сайжруулах, нөхөн үржихүйн насны хүн амд чанартай зөвлөгөө, үйлчилгээг хүртээмжтэй хүргэхэд онцгой анхаарч ажиллах шаардлагатайг онцлон тэмдэглэлээ.
Цахим хуралд идэвхтэй оролцож, үнэтэй санал, туршлагаа хуваалцсан нөхөн үржихүйн эмч, эх баригч, сувилагч, эрүүл мэндийн нийт мэргэжилтнүүддээ талархал илэрхийлье.
