16/12/2024
ХӨРӨНГӨ ОРУУЛАЛТ, ХУДАЛДААНЫ ГАЗРААС "ГАДААДЫН ХӨРӨНГӨ ОРУУЛАЛТЫН ТУХАЙ ХУУЛЬ"-ИЙН ТӨСЛИЙН ХЭЛЭЛЦҮҮЛЭГ ЗОХИОН БАЙГУУЛЛАА.
Хэлэлцүүлэгт хөрөнгө оруулагчид, олон улсын байгууллага, төрийн бус байгууллага болон бизнес эрхлэгчдийн төлөөлөл оролцож, санал бодлоо солилцлоо.
Хэлэлцүүлгийн эхэнд Хөрөнгө оруулалт худалдааны газрын дарга В.Энхбаатар хуулийн төслийн танилцуулга хийж, оролцогчдод мэдээлэл хүргэлээ.
Үүний дараа панел хэлэлцүүлэг болсон бөгөөд тус хэлэлцүүлэгт Монгол Улсын Шадар сайдын зөвлөх Б.Мөнхдөл, Дэфакто Институтын гүйцэтгэх захирал Д.Жаргалсайхан, Монгол дахь Америкийн худалдааны танхимын гүйцэтгэх захирал О.Адьяа нар оролцож, хуулийн төслийн талаар оролцогчдын асуултад хариулж, санал хүсэлт авсан юм. Панелистууд хөрөнгө оруулалтын орчны шинэчлэлийг хэрхэн хэрэгжүүлэх, хөрөнгө оруулагчдын эрх ашгийг хамгаалах асуудлыг яаж шийдвэрлэх талаар өөрийн туршлага, үзэл бодлоо хуваалцлаа.
Хуулийн шинэчлэлээр дараах гол өөрчлөлтүүдийг хийхээр зорьж байна:
1. Хөрөнгө оруулалтын эрх зүйн орчны тогтвортой байдал:
Хөрөнгө оруулалтын орчин нь тогтвортой байх нь хөрөнгө оруулагчдын итгэлийг нэмэгдүүлж, урт хугацааны хөрөнгө оруулалтыг татахад чухал нөлөө үзүүлдэг. Шинэчилсэн хуулиар хөрөнгө оруулалтын эрх зүйн орчныг илүү тодорхой, тогтвортой болгож, өөрчлөлт, шинэчлэлүүдийг зөвхөн хөрөнгө оруулагчдын эрх ашгийг хамгаалах
2. Хууль дээдлэх зарчмыг тусгах:
Хуулийн шинэчлэл нь хууль тогтоомжийг ёс зүйн өндөр стандартад хэрэгжүүлж, хуулийг нэг мөр, хэлбэрэлтгүй хэрэгжүүлэх зарчмыг чухалчилж байна. Энэ нь хууль хэрэгжүүлэх байгууллагуудын ажилтнуудад хуулийн сахилга бат, үндэсний болон олон улсын хууль эрх зүйн шаардлагад нийцсэн байдлыг хангах зорилготой.
3. Хөрөнгө оруулагчдын эрх ашгийг хамгаалах:
Хуулийн шинэчлэлийн нэг чухал заалт нь хөрөнгө оруулагчдын эрх ашгийг хамгаалах юм. Хөрөнгө оруулагчийн эрх ашгийг дордуулж, өөрчлөлт оруулах хуулийн заалтыг буцаан хэрэглэхгүй байх зарчмыг баримтлах нь хөрөнгө оруулалтын орчныг илүү баталгаатай болгоно.
4. Гэрээний үүргийн биелэлт:
Хуулийн шинэчлэлээр хөрөнгө оруулалтын гэрээний үүргийг хатуу биелүүлэх шаардлага тавьж, гэрээний талыг хүлээж авсан бүх асуудлыг шийдвэрлэх шаардлагатай болгох юм. Ингэснээр хөрөнгө оруулагчид гэрээгээ шударгаар, тодорхой нөхцлөөр хэрэгжүүлэх боломжтой болно.
5. Нээлттэй, ил тод, шуурхай, цахим үйл ажиллагаа:
Хуулийн шинэчлэлийн зорилго нь цахим хэлбэрийг ашиглан ил тод, шуурхай үйл ажиллагаа явуулах боломжийг бүрдүүлэхэд оршино. Цахим системийг нэвтрүүлснээр хөрөнгө оруулалтын үйл явц илүү нээлттэй, хялбар болно. Энэ нь хөрөнгө оруулагчдын итгэлийг нэмэгдүүлж, хөрөнгө оруулалтын үйл явцыг илүү хурдан, шуурхай болгож чадах юм.
Хуулийн төсөл нь хөрөнгө оруулалтын орчныг сайжруулж, олон улсын хөрөнгө оруулалтыг татах, улс орны эдийн засгийг хөгжүүлэхэд чухал үүрэг гүйцэтгэх болно. Хуулийн шинэчлэл нь хөрөнгө оруулагчдын эрх ашгийг хамгаалах, хөрөнгө оруулалтын орчинд ил тод байдал, тогтвортой байдлыг бий болгоход чиглэсэн бөгөөд энэ нь Монгол Улсад бизнесийн орчныг сайжруулахад томоохон алхам болно гэж үзэж байна.
