11/05/2026
ЭКО ХАТАГТАЙ САРАНЧИМЭГ
Батсүхийн Саранчимэгийг би манай Дундговийнх гэдгийг мэддэггүй байлаа. Мэдэх ч боломжгүй юм. Намайг 1976 онд аймгийн төвийн 10 жилийн дунд сургууль дүүргэж ахуйд Сараа Мандалговийн Боржигон гудамжнуудын нэгэнд байх хашаандаа анх удаа нутгийн өвгөнтэй шатар нүүж эхний хожлоо авч хөөрөн баясаж байжээ.
Сараагийн аав Батсүх гуайг бол би гадарлана. Дундговийн Хөдөө аж ахуйг удирдах газарт дарга хийдэг, дуу цөөтэй, их тохитой байрын өндөр хүн санаанд үлджээ.
Ээж Сэржмядагийг нь бүр илүү танина. Танихаас ч аргагүй. Мандалговь хотод уртаашаа нэг л төв эмийн сан байдаг, тэнд эм авахаар очиход инээд алдсан царайлаг эмэгтэй найрсаг угтдаг байсан нь Сараагийн ээж юм.
Миний найз Мажигийн Тунгалаг нэгэнтээ надад За Ганбаа, цаана чинь Их улс төрд цахиур хагалах нэг сүрхий бүсгүй Дундговиос төрж байна даа. Саранчимэг гэдэг юм. Математикч, гавал толгой гэхэд нь яахаараа заавал чам шиг математикчид илүүрхэх ёстой юм, сэтгүүлчид ч бас улс төрч болж чадна шүү дээ, намайг харахгүй юу гэж хэрэндээ томорсон удаатай.
Дараахан нь 10 жилийн нэг ангийн минь найз Норовын Мөнхжаргал, Ганболд чи Нийслэлийн цэцэрлэгт хүрээлэнгийн захирал Саранчимэгийг таних уу? Ёстой нэг ажил анхиатай бүсгүй байнаа. Хэдэн мянган мод тариулаад Цэцэрлэгт хүрээлэнг ногоон диваажин болгочихсон байна шүү дээ гэж гайхуулав.
Тэгэнгүүт сониуч зан төрж, төдөлгүй Саранчимэг судлаач болон хувирлаа.
Нийслэлийн Иргэдийн хурлын төлөөлөгч юмсанж. Хийж бүтээсэн ажлынх нь тайлан зөндөө. Гэхдээ хамгийн анхаарал татсан нь дандаа нов ногоон өнгөтэй хувцсаар гангардаг аж.
Ийнхүү би эко хатагтай Саранчимэгтэй танилцлаа.
Түүнээс хойш төдийлөн удалгүй Сараа Баянзүрх дүүргээс Улсын Их Хуралд сонгогдоод гараад ирэв.
Улс төрчид ер нь сонин сонин характертай байдаг. Жишээ нь ихэнх улс төрчид өөрийнхөө зурагтай айрагны аяга сэлтийг сонгогчдод бэлэглэж тэдэнд танигдахыг хичээдэг бол Баянхонгорын Ганбат гишүүн дандаа бидон тараасаар хэдэн ч удаа Их хуралд залрав даа.
Тэгтэл Сараа шатар, шатрын хөлөг сонгогчдодоо тараадаг хоббигоороо бусад гишүүдээс илт ялгарсан юм. Баянзүрх дүүрэгт шатрын “Ногоон бэрс” клуб байгуулан хэдэн мянган хүүхдэд шатрын анхан шатны боловсрол эзэмшүүлжээ.
Товчхондоо олонхи гишүүн сонгогчдын ходоодтой ажилладаг бол Дундговийн Сараа тэдний тархи толгойг шинэ мэдлэг мэдээллээр цэнэглэхэд түлхүү анхаарсан нь яриангүй цоо шинэ зарчим, хандлага байлаа.
Их хуралд хоёр удаа сонгогдон ажиллахдаа Сараагийн брэнд сэдэв нь Ногоон хөгжил, ногоон ирээдүй болсон.
Ногоон даашинзтай ногоон үзэлтэн. Төр түмэндээ зүтгэх их ажлынхаа зэрэгцээ тэр хэзээ ч 7 настай анх сурсан шатрын спортоо орхиогүй.
Гомбожавын Занданшатар тун удахгүй Хонконгт болох түргэн тоглолтын дэлхийн аварга шалгаруулах тэмцээнд дэлхийн шилдэг багийн бүрэлдэхүүнд уригдан тоглох гэж буй бол Монголын эмэгтэй улс төрчдөөс Батсүхийн Саранчимэг шатрын ертөнцөд ямар ч маргаангүй Number one шилдгийн шилдэг тоглогч хэмээн зүй ёсоор хүлээн зөвшөөрөгджээ.
Сараа Олон улсын парламентын холбооны гишүүдийн дунд 2019 онд зохион байгуулагдсан шатрын тэмцээнд түрүүлж орон орны эмэгтэй парламентчдын аварга болж байжээ.
Сараа одоо Хөшигийн хөндийн эдийн засгийн чөлөөт бүсийн Захирагчийн албатай.
Би ч бас цагтаа Шадар сайд Өлзийсайханы Энхтүвшингийн чөлөөт бүсүүд хариуцсан зөвлөхөөр ажиллаж, энэ талын чамгүй мэдлэг мэдээлэл хуримтлуулсан давуу талтай тул Сараа намайг өнгөрсөн баасан гарагт оффистоо урьж, нүдэнд нь цог золбоо, хийж бүтээх урам зориг илт гэрэлтсэн хэдэн хөөрхөн залуу ажилтнуудтай цуг Монголд анхны хуурай замын боомтыг Хөшигийн хөндийд яаж амилуулах талаар баахан зөвлөлдлөө.
Гайхалтай нь Хөшигийн хөндийн чөлөөт бүсийн Захирагчийн Ажлын алба байрладаг цамхаг нь Эко тауэр нэртэй юм.
Эко таурын 21 давхарт эко хатагтай Саранчимэг, түүний командтай уулзалт хийгээд өндөрлөх үед Сараа надад өөрийн бичсэн “Шийдэмгий нүүдэл” нэртэй номоо дурсгав.
Гэртээ ирээд Шийдэмгий нүүдлийг шийдэмгий хурдан гялс манс уншаад дуусгачихлаа.
Гайхалтай уран бичлэгтэй, гүнзгий санаанууд шигтгэсэн тэрхүү номоос шатар гэж ямар гайхамшигт ид шидэт тоглоом болохыг, амьдрал гэж ямар олон адармаатай нүүдэл, эрэл хайгуул шаардсан талбар болохыг олж мэдээд эко Сараа, математикч Сараа, төрийн зүтгэлтэн Сараа, шатарчин Сараа маань бас зохиолч Сараа болох нигууртай юм байна гэсэн гэгээн бодол төрлөө.
2026.05.10.
