01/05/2026
1 Mey 2026 – Andron’ny Asa
Amin’izao fankalazana ny Andron’ny Asa izao, ny Masoivoho dia niara-niasa tamin’ny Minisiteran’ny Asa sy ny Fifandraisana ara-Indostria eto amin’ny Repoblikan’i Maorisy tamin’ny fanatanterahana fitsidihana ireo trano fatorian’ny mpiasa ao amin’ny Ferney Spinning Mills, ao Forrest Side.
Ny Minisitry ny Asa, Andriamatoa hajaina Reza UTEEM, dia nanamafy indray ny lanjan’ny anjara biriky entin’ireo mpiasa vahiny amin’ny toekarena maorisianina. Araka ny nambarany, dia mahatratra 50 000 eo ho eo amin’izao fotoana izao ireo mpiasa vahiny miasa eto Maorisy.
Nanao antso mazava izy ny amin’ny tokony hanajana tanteraka ny zon’ny mpiasa. Ny Minisiterany dia manamafy ny fahavononany sy ny fandraisany andraikitra mitohy amin’ny ady amin’ny endrika fanararaotana rehetra, ary manolo-tena hatrany amin’ny fanohanana ireo rehetra iharan’izany.
Manoloana ny fitomboan’ny tranga fandaozana tsy ara-dalàna ny trano fatorian’ny mpiasa, dia nanentana ireo mpiasa izy mba tsy ho voasariky ny fampanantenana diso momba ny fepetra heverina ho tsara kokoa any an-kafa, indrindra raha mifanohitra amin’ny lalàna izany.
Farany, ny Masoivoho dia nihaona tamin’ireo solontenan’ny mpiasa Malagasy ao amin’ny FSM, ka nahafahana nifanakalo hevitra sy nanao fifampizaràna tao anatin’ny tontolo mirindra sy matihanina.
