12/04/2026
DR. SIRAJO YAKUBU BATAGARAWA YA AYYANA ANIYARSA NA TAKARAR KUJERAR ƊAN MAJALISSAR TARAYYA BATAGARAWA/RIMI/CHARANCHI A ZAƁEN 2027 A ƘARƘASHIN JAM’IYYAR APC
Bayan tuntuba da neman shawarwari da kuma kiraye-kirayen da aka yi masa a dukkan ƙananan hukumomi uku, Dr. Sirajo Yakubu ya bayyana aniyarsa a gaban shugabannin jam’iyya, kansiloli, masu ba da shawara da magoya baya a sakatariyar APC ta Batagarawa.
Gabanin babban zaɓen 2027, Dr. Sirajo Yakubu Batagarawa, yau 12 ga Afrilu, 2026, ya ayyana aniyarsa ta tsayawa takarar kujerar ɗan Majalisar Wakilai ta Tarayya mai wakiltar mazabar Batagarawa/Rimi/Charanchi a ƙarƙashin jam’iyyar All Progressives Congress (APC). Wannan sanarwa ta gudana a sakatariyar jam’iyyar APC da ke Batagarawa.
Da yake jawabi a wajen taron, Dr. Sirajo ya bayyana cewa matakin da ya ɗauka ya samo asali ne daga irin gagarumar goyon baya da karɓuwa da ya samu daga shugabannin al’umma, matasa, da ’ya’yan jam’iyya a faɗin ƙananan hukumomin uku (3). Ya jaddada aniyarsa ta samar da wakilci nagari mai tasiri, wanda zai mayar da hankali kan haɗin kai, kusanci da al’umma, da kuma kawo ci gaba mai ɗorewa da zai amfanar da matasa da kuma al’umma baki ɗaya.
Taron ayyana takarar ya samu halartar shugabannin jam’iyyar APC, kansilolin ƙaramar hukumar Batagarawa masu ci, masu ba da shawara (S.A.s), tare da dimbin magoya baya da masu fatan alheri. Shugabannin jam’iyyar sun yaba da yadda ya bi matakan shawarwari kafin ayyana takararsa, tare da jaddada aniyar jam’iyyar na tabbatar da adalci a dukkan matakai, yayin da masu sa ido kan harkokin siyasa ke ganin shigowarsa zai ƙara sauya fasalin siyasar Batagarawa/Rimi/Charanchi.
Gwagware Online Vanguards
12 ga Afrilu, 2026
