13/03/2026
SHUGABAN ƘARAMAR HUKUMAR SOBA A JIHAR KADUNA YA ƘADDAMAR DA RABON KAYAN AZUMI DA NA SALLAH
A cikin yanayin da ake ciki na ibadar watan Ramadan, da kuma tunkarar bikin ƙaramar Sallah, shugaban ƙaramar hukumar Soba Hon. Muhammad Shehu Molash ya ƙaddamar da gagarumin rabo na musamman, da ya haɗa da shinkafa, da kuma zannuwa ga iyayen mu Mata, wanda ya gudana a ɗakin taro na sakateriyar ƙaramar hukumar Soba dake Maigana.
Rabon ya gudana ne bisa kyakkyawar jagorancinsa da yake gudanarwa na bai ɗaya, wanda hakan ke ba da damar kowa ya amfana ba tare da nuna bambancin jam'iya ko kuma gida-gida na siyasa ba. Mutane da dama sun amfana da s**a haɗa da; shuwagabannin jam'iya na kowane mataki, masu riƙe muƙaman gwamnati, 'yan siyasa, ƙungiyoyin Mata da Matasa, da sauran mutane daban-daban daga dukkanin lungu da saƙo na faɗin ƙaramar hukumar Soba.
Taron ya sami halartar mataimakin shugaban ƙaramar hukumar Soba, shugaban ma'aikata / Kansilar ayuka na ƙaramar hukumar Soba, Kakakin Majalisar Kansiloli na ƙaramar hukumar Soba da sauran Kansilolin sa, dattawan jam'iyar APC na ƙaramar hukumar Soba, shugaban jami'ar APC na ƙaramar hukumar Soba da mataimakin sa, shuwagabannin jam'iyar APC na gundumomi da mambobin su, ƙungiyoyin Mata da Matasa daga dukkanin lungu da saƙo na ƙaramar hukumar Soba.
“A yayin jawabin shugaban ƙaramar hukumar na Soba, ya nuna jin daɗin sa, bisa ganin dandazon mutanen da za su amfana a dalilin wakilcin sa, kuma ya bayyana cewa in shaa Allahu wannan ba zai zama ƙarshe ba, kamar yadda ba shine farko ba. Bugu da ƙari, ya janyo hankulan mahalarta taron, da su mai da hankali wajen gudanar da addu'o'i ga ƙaramar hukumar, jihar Kaduna da Ƙasa baki ɗaya, cikin waɗannan kwanakin na goman ƙarshe cikin wannan wata mai albarka”.
13th March, 2026
