10/07/2026
Ny høyløe veks fram på Longaneset! 🌲🪓
I vår har det vore stor aktivitet i skogen på Longaneset ved Nordvatnet. Der er arbeidet med å reise opp att ei tradisjonell høyløe godt i gang – ei løe som skal vere ei tru kopi av ei gammal løe som ein gong stod i området.
Og for ein innsats som er lagt ned! Flinke elevar frå skulane i Strand kommune har teke på seg arbeidshanskane og vist imponerande dugleik med både øks, sag og godt humør. Her har det vore hogging, tilpassing og ekte handverk på høgt nivå. Dersom dette er framtida for handverksfaga i kommunen, ser ho verkeleg lys ut!
Bak prosjektet står Longanesets Venner, ei foreining der skulane i Strand kommune samarbeider med NIVO – veteranar med erfaring frå internasjonale oppdrag. Saman med Jan Gunnar Helmikstøl har elevane fått lære tradisjonelt handverk slik det vart gjort før i tida. Kunnskap, samarbeid og arbeidslyst har gått hand i hand gjennom heile våren.
Men det har ikkje berre vore arbeid. Det har òg vore tid til bålkos, gode samtalar og mange kjekke stunder ute i naturen. Slik skal det vere!
No tek elevane ein velfortent sommarferie, medan tømmeret får liggje og tørke seg godt. Når skuleklokkene ringjer inn til hausten, tek arbeidet til att, og då ventar den spennande reisninga av sjølve løa.
Strand kommune stiller med grunn, medan veneforeininga står for bygging og framtidig vedlikehald. Målet er å skape eit flott og levande kulturminne som passar naturleg inn i landskapet rundt Nordvatnet. Når løa står ferdig, skal ho vere open og til glede for alle som tek turen til dette vakre området i «bakhagen» til Tau.
Ei stor takk til alle dei unge arbeidsfolka, veteranane, rettleiarane og eldsjelene som gjer dette mogleg. De har gjort ein strålande jobb – og resultatet kjem til å bli rett og slett kjempebra! 👏🌿🏡
Foto: Olav Fiskå og Ammy Østbø
