26/08/2026
वि.सं. २०८३ भदौ १०
विज्ञप्ति
चीनको तिब्बततर्फबाट भोटेकोशीमा आएको बाढीका कारण रसुवा, नुवाकोट, धादिङ, गोरखा, नवलपरासी लगायतका जिल्लाका तटीय क्षेत्रमा भएको ठूलो जनधनको क्षतिप्रति राष्ट्रिय स्वतन्त्र पार्टी गहिरो दुःख व्यक्त गर्दछ। यो विषम परिस्थितिले निम्त्याएको असहजताको गम्भीर समीक्षा गर्न आज बसेको राष्ट्रिय स्वतन्त्र पार्टी (रास्वपा) को पार्टी सचिवालयको बैठकले देहायका निर्णयहरू गर्दै यो आधिकारिक वक्तव्य तथा अपिल जारी गरेको छ:
१. भावपूर्ण श्रद्धाञ्जली तथा गहिरो समवेदना
बाढी, पहिरो र डुबानका कारण अकालमै ज्यान गुमाउनुभएका सम्पूर्ण नागरिकहरूप्रति गहिरो दुःख व्यक्त गर्दै भावपूर्ण श्रद्धाञ्जली अर्पण गर्दछौँ। विपद्को यस शोकाकुल घडीमा मृतकका परिवारजनमा हार्दिक समवेदना प्रकट गर्दै, घाइते हुनुभएका सम्पूर्ण नागरिकहरूको शीघ्र र पूर्ण स्वास्थ्य लाभको कामना गर्दछौँ।
२. तत्काल उद्धार, राहत तथा आर्थिक सहयोग
विपद् प्रभावित क्षेत्रमा फसेका स्वदेशी तथा विदेशी नागरिकहरूको तत्काल उद्धार गर्नुका साथै सुरक्षित बासस्थान, शुद्ध पिउने पानी, औषधि र खाद्यान्न लगायतका राहत सामग्रीको अविलम्ब व्यवस्थापन गर्नु राज्यको पहिलो दायित्व र अहिलेको प्रमुख आवश्यकता हो। विपद्को यस संवेदनशील घडीमा सरकारको राहत प्रयासमा हातेमालो गर्न राष्ट्रिय स्वतन्त्र पार्टीको तर्फबाट रु. ५०,००,०००/- (अक्षरेपी पचास लाख रुपैयाँ) आर्थिक सहयोग प्रदान गर्ने निर्णय गरिएको छ। जोखिममा परेका नागरिकलाई सुरक्षित स्थानमा स्थानान्तरण गर्न र मानवीय सहयोग जुटाउन सम्पूर्ण नागरिकमा अपिल गर्दै, सहयोग वितरणलाई पारदर्शी र प्रभावकारी बनाउन सरकारको एकद्वार प्रणालीमार्फत् मात्र आर्थिक तथा भौतिक सहयोग प्रदान गर्न हामी सम्बन्धित सबैमा अनुरोध गर्दछौँ।
३. पार्टी पङ्क्तिको सक्रिय परिचालन
विपद्को यस घडीमा राज्य संयन्त्रलाई सघाउनु हामी सबैको साझा राष्ट्रिय दायित्व हो। तसर्थ केन्द्र, प्रदेश, जिल्ला र स्थानीय तहमा रहेका पार्टीका सम्पूर्ण समिति, सदस्य तथा शुभचिन्तकहरूलाई स्थानीय प्रशासन र सुरक्षा निकायसँगको समन्वयमा उद्धार र राहत कार्यमा अनुशासित एवं सक्रिय रूपमा र्याट (R.A.T.) मार्फत् खटिन पार्टी सचिवालय निर्देश गर्दछ। साथै, यसको संयोजनको जिम्मा पूर्व र्याट संयोजक आशिष थापालाई दिइएको छ।
४. सही सूचना सम्प्रेषण र अफवाह नियन्त्रण
विपद्को समयमा फैलिन सक्ने भ्रामक समाचार र अफवाहले जनमानसलाई थप त्रसित र अन्योलग्रस्त बनाउन सक्छ। तसर्थ, आधिकारिक सरकारी निकायबाट जारी हुने सूचनालाई मात्र आधार मान्न, सामाजिक सञ्जालमा तथ्यपरक सूचना मात्र सम्प्रेषण गर्न र नदी तटीय तथा पहिरोको उच्च जोखिमयुक्त क्षेत्रका नागरिकलाई विशेष सतर्कता अपनाउन विनम्र अनुरोध गर्दछौँ।
५. महामारी नियन्त्रण र दीर्घकालीन पुनःस्थापना
बेपत्ता नागरिकहरूको खोजी तथा उद्धार कार्यलाई थप तीव्रता दिँदै प्रभावित क्षेत्रमा सम्भावित महामारी फैलन नदिन तत्काल विशेषज्ञ स्वास्थ्य टोली परिचालन गर्न हामी नेपाल सरकारको गम्भीर ध्यानाकर्षण गराउँछौँ। साथै, विपद्का कारण घरबारविहीन भएका पीडित परिवारलाई उचित क्षतिपूर्ति र उनीहरूको स-सम्मान एवं दीर्घकालीन पुनःस्थापनाको ठोस कार्ययोजना अविलम्ब सुरु गर्न सरकारसमक्ष जोडदार माग गर्दछौँ।
६. पार्टीका सम्पूर्ण साङ्गठनिक गतिविधि स्थगित
यस संवेदनशील घडीमा हाम्रो सम्पूर्ण ध्यान र ऊर्जा विपद् व्यवस्थापन, उद्धार र राहत कार्यमा मात्र केन्द्रित गर्नुपर्ने भएकाले, विपद् प्रभावित नागरिकहरूलाई पूर्ण रूपमा साथ दिन राष्ट्रिय स्वतन्त्र पार्टीका पूर्वनिर्धारित सम्पूर्ण आधिकारिक, राजनीतिक तथा साङ्गठनिक गतिविधिहरू अर्को सूचना जारी नभएसम्मका लागि स्थगित गर्ने निर्णय गरिएको छ।
अन्त्यमा,
प्राकृतिक विपत्तिको यस असहज घडीमा उच्च राष्ट्रिय एकता प्रदर्शन गर्दै प्रभावित नागरिकहरूको उद्धार, राहत र पुनःस्थापनाका लागि सरकार, अन्य राजनीतिक दल, नागरिक समाज, अन्तर्राष्ट्रिय निकाय र सम्पूर्ण सरोकारवालाहरूसँग हातेमालो गर्दै हरसम्भव सहयोग गर्न राष्ट्रिय स्वतन्त्र पार्टी दृढ सङ्कल्पित छ। साथै, सरकारले देखाएको तदारुकताको स्वागत गर्दै यस कठिन परिस्थितिमा पार्टी सधैं सबैको साथमा रहने प्रतिबद्धता पनि व्यक्त गर्दछ।
विपिन कुमार आचार्य
महामन्त्री
