20/07/2026
विषय: सुकुना माध्यमिक विद्यालयको घटना सम्बन्धमा।
मोरङको सुन्दरहरैँचा–१० स्थित सुकुना माध्यमिक विद्यालयका छात्राहरूमाथि भएको यौनजन्य दुर्व्यवहारको आरोपमा शिक्षकसहित तीन जना पक्राउ परेको घटनाप्रति नेपाल विद्यार्थी संघ केन्द्रीय समितिको गम्भीर ध्यानाकर्षण भएको छ। यो घटना देशभरका शैक्षिक संस्थाहरूमा छात्राहरूले भोगिरहेको यौनजन्य हिंसा, मानसिक उत्पीडन र शक्ति दुरुपयोगको प्रतिनिधि चित्र हो।
नेविसंघ निष्पक्ष छानबिन गरी दोषीमाथि कडा कारबाही गर्न र पीडित छात्राहरूको गोपनीयता, सुरक्षा, मनोसामाजिक परामर्श तथा कानुनी सहयोगको पूर्ण प्रत्याभूति गराउन जोडदार माग गर्दछ।
शैक्षिक संस्थालाई सुरक्षित बनाउन यौनजन्य हिंसाविरुद्ध शून्य सहनशीलता (Zero Tolerance) को नीति आवश्यक छ। कार्यस्थलमा हुने यौनजन्य दुर्व्यवहार (निवारण) ऐन, २०७१ बमोजिम देशैभरका विद्यालय, कलेज तथा विश्वविद्यालयहरूमा अनिवार्य उजुरी व्यवस्थापन संयन्त्र, स्पष्ट आचारसंहिता र गोप्य उजुरी प्रणाली तत्काल लागू गर्न नेविसंघ सम्बन्धित सम्पूर्ण निकायको गम्भीर ध्यानाकर्षण गराउँदछ।
।
करुणा कटुवाल
अध्यक्ष
