06/08/2026
मिति २०८३ श्रावण २१ गते राष्ट्रिय मानव अधिकार आयोगको आयोजनामा धनगढी, कैलालीमा आयोगले तयार गरेको मानव बेचबिखन विरुद्धको राष्ट्रिय प्रतिवेदनको सार्वजनिक तथा मानव बेचबिखनका वर्तमान प्रवृति र उदयमान चुनौतीहरु बारे छलफल कार्यक्रम सम्पन्न भएको छ। उक्त कार्यक्रमको अध्यक्षता आयोगको सुदूरपश्चिम प्रदेश कार्यालयका नि. प्रमुख मान बहादुर कार्कीले गर्नु भएको थियो भने प्रमुख अतिथि जिल्ला समन्वय समिति, कैलालीको प्रमुख टीका कुमारी चौधरी (भुल) रहनु भएको थियो। विशिष्ट अतिथिको रुपमा आयोगका सचिव मुरारिप्रसाद खरेल रहनु भएको थियो। अतिथिहरुमा धनगढी उपमहानगरपालिकाको उपप्रमुख कन्दकला राना, कैलाली जिल्लाका प्रमुख जिल्ला अधिकारी हिरालाल रेग्मी र कैलाली जिल्लाका सुरक्षा निकायका प्रमुखहरु रहनु भएको थियो। उक्त कार्यक्रममा विभिन्न सरकारी निकायका प्रमुख तथा प्रतिनिधी, विभिन्न गैरसरकारी संस्थाका प्रमुख तथा प्रतिनिधि, कानून व्यवसायी, सञ्चारकर्मी नागरिक समाज, विद्यार्थीसहित करिब ७० जनाको सहभागिता रहेको थियो। आयोगले तयार पारेको उक्त प्रतिवेदनमाथि मानव अधिकार अधिकृत कुमारी महाराले प्रस्तुती राख्नु भएको थियो भने छलफलको क्रममा विभिन्न सहभागीहरु मानव बेचबिखनका क्षेत्रमा देखिएका नविनत प्रवृति, न्यायिक प्रणालीलगायतका विषय उठाउनु भएको थियो।
