15/08/2026
आज मिति २०८३ साउन ३० गते गाउँपालिकाको कभर्ड हल, माछीखोलामा आ.व. २०८२/०८३ मा सम्पादित योजना, कार्यक्रम तथा सेवा प्रवाहको वार्षिक समीक्षा तथा सार्वजनिक सुनुवाइ कार्यक्रम सम्पन्न भएको छ।
गाउँपालिका अध्यक्ष श्री लक्ष्मण गुरुङ ज्यूकाे अध्यक्षतामा सम्पन्न कार्यक्रममा गाउँपालिकाका सातवटै वडाका वडासचिवज्यूहरूले आ आफ्नो वडाबाट गत आर्थिक वर्षमा सम्पन्न योजना, कार्यक्रम तथा सेवा प्रवाहको अवस्था र उपलब्धिहरू प्रस्तुत गर्नुभएको थियो। त्यसैगरी गाउँ कार्यपालिकाको कार्यालयअन्तर्गतका विभिन्न शाखा प्रमुखज्यूहरूले समेत आ आफ्नो शाखाबाट सम्पन्न भएका कार्य तथा प्रमुख उपलब्धिहरूको स्लाइड प्रस्तुतिकरण गर्नुभएको थियो।
कार्यक्रममा गत आर्थिक वर्षमा गाउँपालिकाले हासिल गरेका प्रमुख उपलब्धि, सम्पन्न महत्वपूर्ण योजना तथा सेवा प्रवाहका विषयमा समीक्षा तथा छलफल गरिएको थियो। सो अवसरमा गाउँपालिका अध्यक्ष श्री लक्ष्मण गुरुङ ज्यूले गत आ.व.का योजना तथा कार्यक्रम सफलतापूर्वक सम्पन्न गर्न योगदान पुर्याउने सम्पूर्ण जनप्रतिनिधि तथा राष्ट्रसेवक कर्मचारीहरूलाई धन्यवाद व्यक्त गर्दै चालु आ.व. २०८३/०८४ का स्वीकृत योजना तथा कार्यक्रमहरू रेडबुक प्रकाशनपश्चात् समयमै सञ्चालन तथा प्रभावकारी रूपमा कार्यान्वयनमा लैजान निर्देशन दिनुभयो।
सोही अवसरमा सम्पन्न सार्वजनिक सुनुवाइ कार्यक्रममा स्थानीय नागरिक तथा सरोकारवालाहरूबाट गाउँपालिकाको सेवा प्रवाह, विकास निर्माण, योजना तथा कार्यक्रम, बजेट कार्यान्वयन, सुशासन तथा आगामी प्राथमिकताका सम्बन्धमा जिज्ञासा, सुझाव, प्रतिक्रिया तथा गुनासाहरू प्राप्त गरिएको थियो। नागरिकबाट उठाइएका प्रश्न तथा जिज्ञासाहरूको सम्बन्धित जनप्रतिनिधि तथा कर्मचारीहरूबाट आवश्यक जवाफ तथा जानकारी प्रदान गर्दै गाउँपालिकाको सेवा प्रवाहलाई थप पारदर्शी, जवाफदेही, प्रभावकारी र नागरिकमैत्री बनाउने प्रतिबद्धता व्यक्त गरिएको थियो।
सार्वजनिक सुनुवाइ कार्यक्रमले स्थानीय सरकार र नागरिकबीच प्रत्यक्ष संवाद, सहभागिता र उत्तरदायित्व अभिवृद्धि गर्दै आगामी दिनमा गाउँपालिकाका योजना, कार्यक्रम तथा सेवा प्रवाहलाई थप प्रभावकारी बनाउन महत्वपूर्ण आधार प्रदान गरेको छ।
सार्वजनिक सुनुवाइ कार्यक्रमको सहजीकरण भिमसेन मिडिया एण्ड एड्भर्टाइजिङ प्रा.लि., गोरखाले गरेको थियो।
