19/09/2026
सुकुम्बासीको वर्षौंदेखिको सपना बालेनले गरिदिए पूरा, तनहुँका १० सुकुम्बासी परिवार बने जग्गाधनी
बालेन शाह नेतृत्वको सरकारले भूमिहीन दलित, भूमिहीन सुकुम्बासी तथा अव्यवस्थित बसोबासीको समस्या समाधानलाई उच्च प्राथमिकतामा राखेको छ। यसैअन्तर्गत तनहुँको देवघाट गाउँपालिका–१ का १० भूमिहीन दलित तथा भूमिहीन सुकुम्बासी परिवारलाई जग्गाधनी प्रमाणपुर्जा वितरण गरिएको छ। जिल्ला भूमि समस्या समाधान समिति तनहुँमार्फत उनीहरूलाई लालपुर्जा उपलब्ध गराइएको हो।
लामो समयदेखि आफूले भोगचलन गर्दै आएको जग्गाको कानुनी स्वामित्व नपाएका ती परिवारले प्रमाणपुर्जा पाएसँगै अब आफ्नो नाममा जग्गाको अधिकार प्राप्त गरेका छन्। यसअघि देवघाटमा भूमिहीन परिवारको विवरण प्रमाणीकरण, स्थलगत निरीक्षण र दाबी–विरोधको प्रक्रिया अघि बढाइएको थियो।
भूमिहीन दलित, भूमिहीन सुकुम्बासी तथा अव्यवस्थित बसोबासीलाई कानुनी रूपमा जग्गाधनी बनाउने उद्देश्यअनुसार सरकारले देशका विभिन्न क्षेत्रमा जग्गा व्यवस्थापन र प्रमाणपुर्जा वितरणको प्रक्रिया अघि बढाइरहेको छ। देवघाटमा भएको पछिल्लो वितरणले वर्षौंदेखि जग्गाको स्वामित्वको प्रतीक्षामा रहेका १० परिवारलाई प्रत्यक्ष लाभ पुगेको छ।
