27/08/2026
Narito ang mga mahalagang detalye mula sa Malacañang Press Briefing ngayong Agosto 26, 2026 kasama si Palace Press Officer Undersecretary Claire Castro:
- Nilagdaan noong Agosto 25 ang kasunduan sa pagitan ng St. Luke’s Medical Center-Global City at PhilHealth upang mas gawing accessible ang serbisyong medikal sa mga pribadong ospital para sa mga pasyenteng nangangailangan ng espesyal na gamutan ngunit walang sapat na kakayahang magbayad. Sa ilalim ng batas, kailangang magtalaga ang mga ospital ng k**a para sa kanilang basic wards: 10% sa mga pribadong ospital, 70% sa mga GOCC (Government-Owned and Controlled Corporations) hospitals, at 90% sa mga pampublikong ospital ng pamahalaan.
- Bunsod ng mataas na dagsa ng mga pasyente sa San Lazaro Hospital at Ospital ng Maynila, nagpatupad ang DOH ng leptospirosis fast lane o express lane sa 33 DOH hospitals sa Metro Manila, Region 1, 2, 3, at CAR upang agarang magamot ang mga pasyente. Tiniyak din ng DOH ang sapat na kapasidad ng mga k**a at mga gamot sa pamamagitan ng search capacity management.
- Inutusan ni Pangulong Ferdinand R. Marcos Jr. ang Department of Budget and Management na itaas sa P8.67 bilyon ang pondo para sa mga scholarship program ng DOST sa ilalim ng panukalang 2027 National Budget. Mula rito, P7.55 bilyon ang ilalaan sa undergraduate at graduate scholarships ng DOST Science Education Institute, habang P1.12 bilyon naman ang mapupunta sa Philippine Science High School System. Inaasahang aabot sa 67,504 na mga scholars ang makikinabang dito, mas mataas ng 2,407 kumpara sa 65,097 na scholars noong 2026.
- Ipinanukala ang halagang P58.532578 bilyon para sa Local Government Support Fund (LGSF), na kumakatawan sa humigit-kumulang na 1.14% na pagtaas kumpara sa alokasyon noong FY 2026 na P57.872578 bilyon. Gagamitin ang pondo para sa mga lokal na imprastraktura tulad ng farm-to-market roads, tulay, water systems, libreng bigas para sa mga mamamayan, at tulong sa mga marginalized groups. Ito ay patuloy na imomonitor ng pamahalaan.
- Iniutos ng Pangulo na agarang ayusin ang malalang pagbaha sa Davao City. Ayon sa pagsisiyasat, may proyekto mula pa noong 2019 na hindi naaayos at walang ginawang dredging sa nakalipas na 10 taon. Iimbestigahan din ng Ombudsman ang malaking pondo para sa mga flood control projects sa Davao, kung saan titingnan ng pamahalaan at ng DPWH kung tunay na umiiral ang tinukoy na 13,917 flood control projects (mula sa ulat noong May 2022) o kung ang mga ito ay mga "ghost projects" lamang.
- Matapos makatanggap ang Anti-Red Tape Authority (ARTA) ng reklamo mula sa mga senior citizen na hindi pa nakakatanggap ng kanilang P10,000 cash gift sa ilalim ng Expanded Centenarian Act, inaksyunan ito ng pamahalaan. Nakatakda ang isang clarificatory meeting sa Agosto 28, 2026 sa pagitan ng ARTA, National Commission of Senior Citizens (NCSC), at mga lokal na pamahalaan upang resolbahin ang isyu.
- Malugod na tinanggap ng Pangulo ang pag-aaral ng Philippine Institute for Development Studies (PIDS) na nagpapakita ng lumalagong bigat sa ekonomiya at estratehiya ng ASEAN. Bilang taga-pangulo ngayong taon, magpapatuloy ang Pilipinas sa pagpapalakas ng integrasyon ng rehiyon. Kaugnay ng pahayag ni Defense Secretary Gibo Teodoro ukol sa mga politikong posibleng sinusuportahan ng Tsina upang palaganapin ang propaganda sa West Philippine Sea, iginiit ng Palasyo na kinakailangan ang masinsinang imbestigasyon at nanawagan na huwag magpagamit ang mga lider sa dayuhang interes.
