https://sites.google.com/view/vicefriend-kuya-mark-seno/home

VICEfriend KUYA MARK SEÑO, 2nd Flr. , New Municipal Building, Kasilag Street Isok 1, Boac (2026)

04/06/2026

𝗦𝗧𝗥𝗘𝗡𝗚𝗧𝗛𝗘𝗡𝗜𝗡𝗚 𝗕𝗔𝗥𝗔𝗡𝗚𝗔𝗬 𝗟𝗘𝗚𝗜𝗦𝗟𝗔𝗧𝗜𝗢𝗡: 𝗖𝗔𝗣𝗔𝗖𝗜𝗧𝗬 𝗕𝗨𝗜𝗟𝗗𝗜𝗡𝗚 𝗙𝗢𝗥 𝗦𝗔𝗡𝗚𝗚𝗨𝗡𝗜𝗔𝗡𝗚 𝗕𝗔𝗥𝗔𝗡𝗚𝗔𝗬 𝗠𝗘𝗠𝗕𝗘𝗥𝗦

𝗠𝗮𝗿𝗲𝗹𝗰𝗼 𝗙𝘂𝗻𝗰𝘁𝗶𝗼𝗻 𝗛𝗮𝗹𝗹, 𝗜𝗵𝗮𝘁𝘂𝗯, 𝗕𝗼𝗮𝗰 | Ngayong hapon po, ang inyong lingkod Vice Mayor Kuya Mark Seño ay nakibahagi ng Capacity Building for Sangguniang Barangay Members na ginanap sa Marelco Function Hall, Brgy. Ihatub, Boac, Marinduque. Isang mahalagang pagkakataon ito upang higit pang mapalawak ang kaalaman, mapaunlad ang kakayahan, at mapatatag ang liderato ng ating mga opisyal ng barangay na siyang nagsisilbing unang linya ng serbisyo publiko sa ating mga komunidad.

Sa pamamagitan ng gawaing ito, nabigyang-diin ang kahalagahan ng mabuting pamamahala, epektibong pagbuo at pagpapatupad ng mga programa at ordinansa, gayundin ang pagpapaigting ng transparency, accountability, at responsableng pamumuno sa antas ng barangay.

Ang patuloy na pagsasanay at paglinang sa kakayahan ng ating mga lingkod-barangay ay mahalagang hakbang upang matiyak na ang mga serbisyong naihahatid sa mamamayan ay may kalidad, integridad, at tunay na tumutugon sa kanilang pangangailangan.

Taos-puso po nating pinasasalamatan ang DILG, resource speakers, at lahat ng mga kalahok na naging bahagi ng makabuluhang gawaing ito. Nawa’y magsilbi itong inspirasyon at gabay sa ating patuloy na pagsusulong ng mahusay, makatao, at responsableng paglilingkod para sa ikauunlad ng bawat barangay at ng buong bayan ng Boac. Sama-sama po nating palakasin ang lokal na pamahalaan at itaguyod ang serbisyong may malasakit, pagkakaisa, at tunay na pagmamahal sa bayan.

03/06/2026

𝗜𝗞𝗔-𝟮𝟭 𝗣𝗔𝗡𝗚𝗞𝗔𝗥𝗔𝗡𝗜𝗪𝗔𝗡𝗚 𝗦𝗘𝗦𝗬𝗢𝗡 𝗡𝗚 𝗜𝗞𝗔-𝟭𝟮 𝗦𝗔𝗡𝗚𝗚𝗨𝗡𝗜𝗔𝗡𝗚 𝗕𝗔𝗬𝗔𝗡 𝗡𝗚 𝗕𝗢𝗔𝗖

𝗦𝗕 𝗦𝗲𝘀𝘀𝗶𝗼𝗻 𝗛𝗮𝗹𝗹, 𝗕𝗼𝗮𝗰, 𝗠𝗮𝗿𝗶𝗻𝗱𝘂𝗾𝘂𝗲 | Sa pangunguna ng inyong lingkod na si Vice Mayor Kuya Mark Seño, matagumpay nating naisagawa ang 21st Regular Session ng ika-12 Sang Bayan ng Bayan ng Boac.

Sa sesyong ito, muli nating tinalakay ang mga mahahalagang usapin, programa, at panukalang layuning higit pang mapabuti ang serbisyo at kalagayan ng ating mga kababayan. Patuloy po nating pinagtutulungan ang mga hakbang na makakatulong sa pag-unlad ng ating bayan at sa kapakanan ng bawat Boakeño.

Naniniwala po tayo na sa pamamagitan ng bukas na talakayan at sama-samang pagkilos, mas marami pa tayong magagawang makabuluhang programa para sa ating bayan.

02/06/2026

𝗣𝗮𝗴𝗽𝗮𝗽𝗮𝘁𝗶𝗯𝗮𝘆 𝗻𝗴 𝗕𝗼𝗮𝗰 𝗜𝗻𝘁𝗲𝗴𝗿𝗮𝘁𝗲𝗱 𝗭𝗼𝗻𝗶𝗻𝗴 𝗢𝗿𝗱𝗶𝗻𝗮𝗻𝗰𝗲 𝗮𝘁 𝗣𝗮𝗻𝗴𝗮𝗻𝗴𝗮𝗹𝗮𝗴𝗮 𝘀𝗮 𝗞𝗮𝗹𝗶𝗸𝗮𝘀𝗮𝗻, 𝗧𝗶𝗻𝗮𝗹𝗮𝗸𝗮𝘆 𝘀𝗮 𝗣𝗮𝗴𝗽𝘂𝗽𝘂𝗹𝗼𝗻𝗴 𝗻𝗴 𝗜𝗸𝗮-𝟭𝟮 𝗦𝗮𝗻𝗴𝗴𝘂𝗻𝗶𝗮𝗻𝗴 𝗕𝗮𝘆𝗮𝗻

𝗦𝗕 𝗦𝗲𝘀𝘀𝗶𝗼𝗻 𝗛𝗮𝗹𝗹, 𝗕𝗼𝗮𝗰, 𝗠𝗮𝗿𝗶𝗻𝗱𝘂𝗾𝘂𝗲 | Ngayong araw po ay nagsagawa tayo ng isang pagpupulong kasama ang mga miyembro ng ika-12 Sangguniang Bayan kaugnay ng Boac Integrated Zoning Ordinance at ng implementasyon ng isinagawang tree planting activity sa Brgy. Duyay, Boac. Layunin ng pagpupulong na higit pang mapagtibay ang mga programang nakatuon sa maayos na pagpaplano ng bayan, pangangalaga sa kalikasan, at pagsusulong ng tuloy-tuloy at inklusibong kaunlaran para sa ating komunidad.

Nakiisa rin sa naturang pagpupulong ang mga kawani ng lokal na pamahalaan bilang katuwang sa pagbuo at pagpapatupad ng mga programang makatutulong sa mas maayos na pamamahala at pangangalaga sa ating kapaligiran. Sa pamamagitan ng sama-samang pagkilos, maayos na koordinasyon, at pagkakaisa ng bawat sektor, patuloy nating isinusulong ang mga inisyatibong maghahatid ng pangmatagalang benepisyo at mas maliwanag na kinabukasan para sa bayan ng Boac at sa bawat mamamayang Boakeño.

02/06/2026

𝗦𝗘𝗦𝗦𝗜𝗢𝗡 𝗥𝗘𝗣𝗢𝗥𝗧 I 𝟮𝟬𝘁𝗵 𝗥𝗲𝗴𝘂𝗹𝗮𝗿 𝗦𝗲𝘀𝘀𝗶𝗼𝗻 𝗼𝗳 𝘁𝗵𝗲 𝟭𝟮𝘁𝗵 𝗦𝗮𝗻𝗴𝗴𝘂𝗻𝗶𝗮𝗻𝗴 𝗕𝗮𝘆𝗮𝗻

Narito ang mga panukalang ordinansa at resolusyon na naipasa sa ginanap na ika-20 Pangkaraniwang Sesyon ng ika-12 Sangguniang Bayan noong Mayo 26, 2026, na pinangunahan ng inyong lingkod, Vice Mayor Kuya Mark Seño bilang Presiding Officer.

28/05/2026

𝗦𝗮𝗻𝗴𝗴𝘂𝗻𝗶𝗮𝗻𝗴 𝗕𝗮𝘆𝗮𝗻 𝗻𝗴 𝗕𝗼𝗮𝗰, 𝗧𝗶𝗻𝗮𝗹𝗮𝗸𝗮𝘆 𝗮𝗻𝗴 𝗦𝗲𝗿𝗯𝗶𝘀𝘆𝗼, 𝗞𝗮𝘂𝗻𝗹𝗮𝗿𝗮𝗻, 𝗮𝘁 𝗣𝗿𝗼𝘁𝗲𝗸𝘀𝘆𝗼𝗻 𝗻𝗴 𝗟𝗶𝗸𝗮𝘀-𝗬𝗮𝗺𝗮𝗻

𝗦𝗕 𝗦𝗲𝘀𝘀𝗶𝗼𝗻 𝗛𝗮𝗹𝗹, 𝗕𝗼𝗮𝗰, 𝗠𝗮𝗿𝗶𝗻𝗱𝘂𝗾𝘂𝗲 | Sa pangunguna ng inyong lingkod, Vice Mayor Kuya Mark Seño, isinagawa ang ika-20 Regular Session ng 12th Sangguniang Bayan ng Bayan ng Boac noong Mayo 26, 2026, kung saan muling pinagtibay ng lokal na pamahalaan ang layunin nitong maisulong ang mga programang nakatuon sa kapakanan, kaayusan, at patuloy na pag-unlad ng ating bayan.

Sa Privilege Hour ay nagbigay ng kanyang pahayag si Konsehal Macoy Jinang, habang sa Question Hour naman ay tinalakay ang suliranin hinggil sa araw-araw na pagkawala ng suplay ng kuryente sa pansamantalang fish stall ng Pamilihang Bayan, na ipinaliwanag ni Market Supervisor Luisito M. Navarro.

Kabilang sa mahahalagang usaping natalakay sa sesyon ang mga komunikasyon at panukalang may malaking epekto sa pamamahala at serbisyo publiko. Isa rito ang kahilingan para sa pagbibigay ng HMO services sa mga empleyado ng LGU-Boac sa pamamagitan ng pakikipagkasundo sa Kaiser International Health Group, Inc., gayundin ang pakikipagtulungan sa Marinduque State University para sa implementasyon ng programang KALAHI-CIDSS.

Inilahad din sa kapulungan ang ilang mahahalagang dokumento mula sa Tanggapan ng Punong Bayan, kabilang ang Supplemental Investment Program No. 1 para sa CY 2026, Annual Investment Program para sa CY 2027, Comprehensive Development Plan 2026–2031, at Local Development Investment Program 2026–2028 na magsisilbing gabay sa patuloy na pag-unlad ng bayan. Ang mga ito ay itinukoy sa Committee on Finance, Budget and Appropriation para sa kaukulang pagtalakay.

Para naman sa unang pagbasa, iniharap ang mahahalagang panukalang ordinansa ukol sa pangangalaga ng yamang-dagat at pangisdaan ng Boac, kabilang ang pagtatatag ng komprehensibong coastal and fisheries management framework at institutionalization ng Bantay Dagat upang higit na maprotektahan ang municipal waters at likas-yaman ng bayan.

Tinalakay rin ng iba’t ibang komite ang mga usapin kaugnay ng pondo ng mga barangay, regulasyon sa mga ambulant at informal vendors, supplementary feeding program ng DSWD, at mga ordinansang may kaugnayan sa patubig at curfew hours sa ilang barangay.

Samantala, naipasa sa ikatlo at pinal na pagbasa ang dalawang mahahalagang ordinansa: ang institutionalization ng community service bilang alternatibo sa pagkakakulong para sa mga kwalipikadong indibidwal, at ang pagtatatag ng educational at livelihood programs sa loob ng BJMP-Boac Jail katuwang ang DepEd-ALS, TESDA, at lokal na pamahalaan.

Patuloy na isinusulong ng Sangguniang Bayan ng Boac ang mga hakbangin at programang magbibigay ng mas maayos, makatao, at progresibong serbisyo para sa bawat mamamayang Boakeño.

28/05/2026

Mainit na pagbati sa lahat ng mga nagsipagtapos mula sa Marinduque State University!

Hindi naging madali ang paglalakbay ninyo para marating ang araw na ito. Maraming puyat, sakripisyo, at pagsubok ang inyong hinarap, kaya naman karapat-dapat lamang na ipagdiwang ninyo ang tagumpay na ito kasama ang inyong pamilya at mga mahal sa buhay na naging katuwang ninyo sa bawat hakbang.

Nawa’y magsilbing inspirasyon ang inyong pagtatapos upang mas lalo pa kayong mangarap at magsikap para sa inyong kinabukasan. Dalhin ninyo saan man kayo dalhin ng buhay ang sipag, kababaang-loob, at pagmamahal sa bayan na inyong natutunan.

Muli, pagbati sa inyong lahat! Nawa’y maging makabuluhan at matagumpay ang susunod ninyong yugto sa buhay.

Congratulations! Graduates of Class of 2026!

26/05/2026

𝗣𝗮𝗴𝗯𝗮𝘁𝗶 𝘀𝗮 𝗣𝗮𝗴𝗱𝗶𝗿𝗶𝘄𝗮𝗻𝗴 𝗻𝗴 𝗘𝗶𝗱’𝗹 𝗔𝗱𝗵𝗮

Sa ngalan ng Tanggapan ng Pangalawang Punong Bayan at ng inyong mga katuwang sa serbisyo publiko, taus-puso po naming ipinapaabot ang aming maligayang pagbati sa kapistahan ng Eid’l Adha, ang Pista ng Sakripisyo at Pananampalataya ng ating mga kapatid na Muslim.

Nawa’y magsilbing paalala ang Eid al-Adha ng kahalagahan ng malasakit, katapatan, at walang pag-iimbot na paglilingkod sa kapwa. Patuloy nating isabuhay ang pagkakaisa at respeto sa lahat ng pananampalataya at kultura sa ating komunidad.

Nawa’y ang diwa ng kapayapaan at pagkakawanggawa ay manatiling gabay sa ating pamahalaan at mamamayan, lalo na sa patuloy na pag-unlad ng ating bayan.

Eid Mubarak!

26/05/2026

Happy Birthday sa aming nag-iisang Vicefriend Kuya Mark Seño! 🎉🥳

From your OVM Family, maraming salamat po sa pagiging lider na laging game makinig, umalalay, at makisama sa tao. 💚

Hindi lang po good leader, kundi certified people’s person talaga. 🙌 Isa po kayong inspirasyon sa amin dahil sa inyong sipag, malasakit, at genuine na pagmamahal sa serbisyo publiko.

Wishing you more blessings, good health, happiness, at syempre more successful projects para sa Boac! Deserve na deserve po ang lahat ng good things in life. ✨

Enjoy your day, Vice Mayor Kuya Mark Seño! 💚💚💚

26/05/2026

𝗧𝗮𝗼𝘀-𝗣𝘂𝘀𝗼𝗻𝗴 𝗣𝗮𝗴𝗽𝘂𝗽𝘂𝗴𝗮𝘆 𝘀𝗮 𝗺𝗴𝗮 𝗠𝗮𝗴𝘀𝗮𝘀𝗮𝗸𝗮 𝗮𝘁 𝗠𝗮𝗻𝗴𝗶𝗻𝗴𝗶𝘀𝗱𝗮: 𝗛𝗮𝗹𝗶𝗴𝗶 𝗻𝗴 𝗞𝗮𝗯𝘂𝗵𝗮𝘆𝗮𝗻 𝗮𝘁 𝗦𝗲𝗴𝘂𝗿𝗶𝗱𝗮𝗱 𝘀𝗮 𝗣𝗮𝗴𝗸𝗮𝗶𝗻 𝗻𝗴 𝗕𝗮𝘆𝗮𝗻

𝗠𝗼𝗿𝗶𝗼𝗻𝗲𝘀 𝗔𝗿𝗲𝗻𝗮, 𝗕𝗼𝗮𝗰, 𝗠𝗮𝗿𝗶𝗻𝗱𝘂𝗾𝘂𝗲 | Sa pagdiriwang ng Ika-8 Farmers and Fisherfolks Month Celebration na may temang “Pagbibigay-pugay sa mga Magsasaka’t Mangingisda sa Gitna ng Hamon at Krisis,” buong puso pong inihahatid ng inyong lingkod ang taos-pusong pagpupugay at pasasalamat sa ating mga magsasaka at mangingisda na patuloy na nagsisilbing haligi ng kabuhayan at seguridad sa pagkain ng ating bayan.

Kasama ang mga miyembro ng Ika-12 Sangguniang Bayan, kinikilala po natin ang mahalagang ambag ng sektor ng agrikultura at pangisdaan sa tuloy-tuloy na pag-unlad ng ating bayan.Sa kabila ng iba’t ibang hamon tulad ng kalamidad, pabago-bagong klima, at patuloy na pagtaas ng gastusin, kayo ay nananatiling matatag, masipag, at walang sawang nagsasakripisyo para sa kapakanan ng bawat pamilyang Boakeño at Marinduqueño.

Bilang inyong lingkod, buong pagpapahalaga kong kinikilala ang inyong napakahalagang papel sa pagpapatatag ng ating ekonomiya at komunidad. Ang inyong sipag at tiyaga ang dahilan kung bakit may sapat na pagkain sa ating hapag at patuloy na nabubuhay ang kabuhayan ng maraming pamilya. Dahil dito, patuloy nating isusulong ang mga programang magbibigay ng suporta, oportunidad, at tulong upang higit pang mapalakas ang sektor ng agrikultura at pangisdaan sa ating bayan.

Nawa’y magsilbing inspirasyon ang pagdiriwang na ito upang lalo nating pahalagahan at kilalanin ang sakripisyo ng ating mga magsasaka at mangingisda. Sama-sama nating ipagpatuloy ang pagkakaisa at malasakit tungo sa mas maunlad at matatag na kinabukasan para sa lahat.
Muli, taos-puso pong pagbati at pagpupugay sa ating mga magsasaka at mangingisda.

25/05/2026

𝗦𝗮 𝗕𝗮𝘄𝗮𝘁 𝗣𝗹𝗮𝘁𝗼 𝗻𝗴 𝗣𝗮𝗻𝘀𝗶𝘁: 𝗞𝘄𝗲𝗻𝘁𝗼 𝗻𝗴 𝗧𝗿𝗮𝗱𝗶𝘀𝘆𝗼𝗻 𝗮𝘁 𝗣𝗮𝗴𝗸𝗮𝗸𝗮𝗶𝘀𝗮 𝘀𝗮 𝗟𝗮𝘆𝗹𝗮𝘆

𝗟𝗮𝘆𝗹𝗮𝘆, 𝗕𝗼𝗮𝗰, 𝗠𝗮𝗿𝗶𝗻𝗱𝘂𝗾𝘂𝗲 | Lubos pong ikinagagalak ng inyong lingkod, Vicefirend Kuya Mark Seño, ang masaksihan ang Pansit Cooking Contest na bahagi ng pagdiriwang ng Pansitan Festival ng Barangay Laylay. Ang nasabing okasyon ay hindi lamang pagpapakita ng husay at malikhaing paraan sa pagluluto ng pansit, kundi isa ring pagbibigay-pugay sa mayamang tradisyon at natatanging identidad ng Barangay Laylay bilang tahanan ng masarap at kilalang pansit sa ating bayan.

Ang pagdiriwang na ito ay patunay na buhay at patuloy na pinagyayaman ang ating kultura at lokal na industriya sa pamamagitan ng pagkakaisa ng mamamayan. Bilang bahagi ng lokal na pamahalaan, tinitiyak natin ang patuloy na suporta sa mga susunod pang Pansitan Festival, alinsunod sa MUNICIPAL ORDINANCE NO. 2021-312 na nagdedeklara sa Barangay Laylay bilang “Pancit Capital of Boac, Marinduque.”

Nagpapasalamat din po ang inyong lingkod sa aking mga naging kasamahan noon sa 10th Sangguniang Bayan ng Boac, sa pangunguna noon ni Konsehal Aurelio “Jojo” Leva III, na ngayo’y miyembro na ng Sangguniang Panlalawigan, sa pagsusulong ng ordinansang nagbigay ng karangalan at pagkilala sa industriya ng pansit ng Laylay. Sa bawat plato ng pansit, nakapaloob ang kwento ng sipag, tradisyon, at pagmamahal ng mga taga-Laylay sa kanilang komunidad, nawa’y patuloy itong magsilbing simbolo ng pagkakaisa, kabuhayan, at pagmamalaki ng bawat Boakenyo.

Mabuhay ang Barangay Laylay! Mabuhay ang Pansitan Festival!

VICEfriend KUYA MARK SEÑO

04/06/2026

03/06/2026

02/06/2026

02/06/2026

28/05/2026

28/05/2026

26/05/2026

26/05/2026

26/05/2026

25/05/2026

Address

Telephone

Website

Alerts

Contact The Organization

Shortcuts

Share

Category