20/06/2024
BATAMPASIG STATEMENT ON SARA DUTERTE’S RESIGNATION
Bago pa man maluklok si Sara Duterte sa posisyon bilang kalihim ng DepEd, walang duda na tanaw natin ang kahahantungan ng sistema ng edukasyon sa Pilipinas. Matapos ang eleksyon pagkayari ng pagkapanalo ng tambalang Marcos-Duterte, nagluklok ang administrasyong ito ng walang kredibilidad at hindi kuwalipikado na kalihim. Kaya imbes na matugunan at solusyunan ang kinakaharap na krisis, nakapag-ambag pa ito sa nakakapangamba at lumalalang krisis sa edukasyon. Matatandaang napabalita ang Pilipinas na naitala bilang pinakamababa sa creative thinking assessment ng PISA. Ang mean score ng Pilipinas ay 14, malayo sa average score na 33 na itinakda ng Organization for Economic Cooperation and Development (OECD). Mahina na nga ang Pilipinas sa math, science, at reading, bagsak pa sa creative thinking. Pinagkait ng mismong ahensiya ng gobyerno ang kinabukasan ng edukasyon sa ilalim ng panunungkulan ni Sara Duterte.
Ang masaklap din dito, ang pagkaluklok ni Sara Duterte sa posisyon ay naging instrumento ng tambalang Marcos-Duterte sa pagbaluktot ng kasaysayan at pagpapalaganap ng walang humpay na kasinungalingan. Ginawang pangunahing lundayan ni Sara Duterte ang DepEd upang makapagdarambong ng milyon-milyong confidential funds mula sa buwis ng mamamayan habang nagkukulang ang mga klasrum at pinagkakaitan ang pagtaas ng sahod ng mga g**o at kawani ng edukasyon. Walang humpay rin ang pagsupil at pangreredtag sa mga progresibong organisasyon gamit ang pagpopondo sa NTF-ELCAC, na siyang tumatak na legasiya ng kanyang panunungkulan bilang kalihim. Dito pa lang ay maitatantos na natin ang prayoridad ng gobyernong ito sa gitna ng lumalalang krisis.
Ngayong nasa punto tayo ng hiwalayang Marcos-Duterte tandem, patunay ito ng pagbabalat-kayo para sa pampulitikang kapangyarihan ng dalawang paksyon ng reaksyunaryong gobyerno. Sa gitna ng krisis pampulitika, nagtulak ito para bitawan ni Sara Duterte ang kanyang pagiging kalihim. Repleksyon ito na hindi interesado at walang pakialam ang mga nasa posisyon na tugunan ang krisis na kinakaharap ng mga Pilipino. Unity na nga lang ang tanging plataporma ng administrasyong ito, nabigo pa itong tuparin.
Sa pagbakante ng posisyong binitawan ni Sara Duterte na dapat noon pa niya ginawa, kalampagin natin ang mga nasa posisyon na magluklok ng kalihim para sa departamento ng edukasyon na may kredibilidad at kakayahan na siyang nauunawan ang danas at hirap ng g**o, kawani at mag-aaral sa institusyon. Humango tayo ng aral na kailanman ay hindi mabibigyan ng tunay na representasyon kung hindi ito magmumula sa mga sektor na nakararanas ng mismong kalagayan nito. Tumungo dapat ito sa pagtataguyod ng isang makamasa, makabayan at siyentipikong edukasyon na tunay na magpapaunlad at maglilingkod sa sambayanan.
Sa lahat ng ito, huwag rin nating kakalimutan ang legacy of impunity ni Sara Duterte sa kanyang termino bilang kalihim. Marapat na panagutin at singilin si Sara Duterte sa kanyang malalang korupsyon sa confidential funds at masahol na panunupil sa mamamayan.
