16/10/2025
📰 | Pormal na Inilunsad ang Project BABA: Bridging Access to Basic Assistance sa Datu Odin Sinsuat
Datu Odin Sinsuat, Maguindanao del Norte — Isang makabuluhang araw para sa mga mamamayan ng Datu Odin Sinsuat ang paglulunsad ngayong araw Oktubre 16, 2025 ng Project BABA: Bridging Access to Basic Assistance, na ginanap sa Don Antonio Martinez Sr. Elementary School, Barangay Badak.
Bilang miyembro ng Sangguniang Bayan, buong pusong ipinahayag ni Konsehal Sheng Druz-Ali ang kanyang suporta sa nasabing proyekto na pangunahing inisyatiba ng Lokal na Pamahalaan ng Datu Odin Sinsuat sa pamumuno ni Mayor Abdulmain “Baba” Abas Sr. Alhadj.
Ayon kay Konsehal Druz-Ali, ang Project BABA ay malinaw na patunay ng malasakit ng lokal na pamahalaan sa mamamayan, partikular sa mga nasa laylayan ng lipunan. Aniya, “Ang proyekto ay konkretong hakbang tungo sa mas inklusibo, tapat, at epektibong serbisyo publiko, isang modelo ng pamahalaang tunay na lumalapit sa tao.”
Ang programa ay naglalayong ilapit ang mga pangunahing serbisyo sa mga barangay, gaya ng:
🩺 Libreng Medikal Check-up at Gamot
🆔 Libreng ID para sa Senior Citizen, PWD, at Solo Parent
💇♂️ Libreng Gupit
📑 Rehistrasyon ng Birth Certificate
💼 Konsultasyon at Aplikasyon para sa mga Negosyante
🌾 Libreng Binhi ng Gulay
🐓 Livestock Livelihood Assistance
📦 Negosyo Package at Family Food Packs
🎒 School Supplies at Feeding Program para sa mga mag-aaral.
Higit 200 pamilya at mga mag-aaral mula sa Barangay Badak ang direktang nakinabang sa unang yugto ng proyekto.
Dagdag pa ni Konsehal Druz-Ali, ang Project BABA ay hindi lamang programa ng pamahalaan, kundi isang simbolo ng pagkakaisa at malasakit sa bawat pamilyang Bangsamoro. “Bawat serbisyo na hatid ng proyektong ito ay bunga ng pagtutulungan ng liderato, ng mga ahensya, at ng mismong komunidad,” aniya.
Dumalo rin sa naturang aktibidad sina Vice Mayor Hon. Bobsteel Sinsuat, Konsehal Hon. Sophia Abas, Punong Barangay Datu Dodie Rojas Sinsuat, at Barangay Kagawad Lubaida P. Candao, kasama ang mga katuwang na ahensya tulad ng IPHO-Maguindanao, Rural Health Unit ng DOS, 35th MC MBLT-5 sa pamumuno ni Maj. Victor D. Donque, PN(M), at mga Municipal Offices ng MAFAR at MSSD-DOS.
“Ang Project BABA ay simula ng isang mas sistematikong paraan ng paghahatid-serbisyo isang pangako na sa bawat barangay ng Datu Odin Sinsuat, mararamdaman ang tunay na malasakit ng pamahalaan,” pagtatapos ni Konsehal Sheng Druz-Ali.
- Admin
