07/09/2026
VG FRITZ DIAZ, NAGHANGYO SA MGA LGU NGA IPATUMAN ANG PRICE CEILING SA BABOY.
NAGHANGYO si Negros Oriental Vice Governor Fritz Diaz sa mga mayor ug mga Local Government Units o LGU sa lalawigan nga motabang sa estriktong pagpatuman sa gitakdang price ceiling sa baboy.
Matod ni Diaz, dako ang papel sa mga LGU, ilabi na sa mga Sangguniang Bayan ug Sangguniang Panlungsod, sa pag-regulate sa mga negosyante ug comprador nga dili motuman sa gitakdang presyo.
Gi-awhag usab niya ang mga lokal nga konseho nga i-adopt ang Executive Order nga ipaguwa Negros Oriental Governor Manuel "Chaco" Sagarbarria ug mahimo kining lokal nga resolusyon aron mabutang ang angay nga mga silot o penalties batok sa mga mosupak sa price ceiling.
Sumala ni Diaz, mahimo usab nga maghimo og mga lakang ang LGU, lakip na ang pagdili o pag-ban sa mga comprador nga magpadayon sa pagpalit o pagbaligya nga supak sa gitakdang price ceiling.
Gipasiugda sa Bise Gobernador nga kinahanglan ang panaghiusa ug kooperasyon sa provincial government ug mga LGU aron epektibong mapatuman ang polisiya ug maprotektahan ang mga hog raisers ug konsumidor sa Negros Oriental.
[with reports from ]
