09/11/2021
An kaluskos han hangin ha magdiru dilain nga parte han kabalayan, an tagaktak han uran ha mga atop han yerohan, dalugdog didto, kidlat ha kahitas an, in pipira nga nagpamatuod nga ungod man nga di gudla pakalaksihun an bangungot nga dara han YOLANDA an hain pa man. Sugad sugad hin an mga katawhan nagigipagdigma han tuna ngan kalangitan , swertihay nala kung baga an masasalin ngan matatalwas hadto nga kasugaran. Manhin uraw an kabataan, manhin dalagan an kalalakin han panimalay pagmilaka tatalwas han mga kagamitan ngan an mga iroy in manhin tima manhin asikaso nga waray bis hin o han mga anak in masul-an han manhin bagsak nga kasagingan, manhin lupad nga atop, manhin ruspag nga kabalayan ngan manhin tumba nga kalubian. Hadto nga adlaw in sugad sugad hin waray paglalauman pero salamat paman han Ginoo ha kahitas-an nga dinatong an kinabuwasan in kami an tawon inabat han katalwasan. Tanan sugad sugad na hin mga humoy nga katamsi-an, waray na balay nga sisirungan, waray pa pagkaon ha butnga han kagutuman ngan an pinakamasaklap nga ginhihinugaran in kami gud in nanngita han mga pag aranyaw nga namatayan nga duro gud hin kasuol ha dughan pero pag-aan un taman kun asya man an ginbilin nga alaala han Yolanda ha mga katawhan.
An sisirum han adlaw han Nobyembre otso nabalyuan hin kalamrag pagdatong han Nobyembre nuybe. Dida ko napamalandong nga bisan paman di unano an kakuri ngan kasubo han amon mga dughan, pagkita ko han adlaw nga sinirak ha sinirangan akon nahinumduman nga ha urhi han kakurian mayda gihap pag usbong hin PAG-ASA nga masasalbar han mga katawhan. Waray ako pagsala, an ESTE nag urusa, nagbinubligay ngan nagkarapit-kamay han pagbangon. Waray gihap nira kalimti hin pagbuligi an mga HERNANINHON. Ha kaluyo han amon kasubo han mga panhitabo, an amon kasing-kasing in nagrayhak pasasalamat han mga tawo nga amon nadaupan, inugop ngan binulig ha amon nga utro magpakatigdong kami taas noo ha panibag-o nga umaga. Tinuod nga ha panahon hit kakurian mas lalo nakusog it mga katawhan, sugad han mga tiga Hernani, imbis nga kami in magpakamatay han suol nga am inabat, sumuko dara han am ginkasugaran, kami in naningkamot, namiling hin paagi nga matalwas ha kada adlaw, nagburubligay makatigdong hin masisirungan, manuroy hin pagkaon nga matalwas han am kagutoman. Ungod man nga basta Hernaninhon waray bisan ano nga maraot nga panahon ug makagirimbal nga unos nga madatong nga dire namon kakayahun. Sugad hin adlaw ha sinirangan, waray makakapugong hit pagsirak. Bisan di-unano nga kakusog, kaiha hit maging uuran, ha kaurhian an adlaw mapakita at mapakita ha mga katawhan, magpapahinumdom nga ha bawat problema may solusyon, ha kada pagtumba may mabulig pamadpad nga pagtigdong, ha kada uraw may kabalyo nga kalipayan, ha kada pagsubok mayda madatong nga pag-asa ngan ha panahon han kasisidman mayda gihap kalamrag ha kaurhian. Salit usa la akon masisiring, waray YOLANDA nga matibag ha mga HERNANINHON nga may huna-huna ngan kasing-kasing nga matatag.
Prepared by : ALAN LARIOQUE
BRGY. CARMEN, HERNANI EASTERN SAMAR
