30/06/2025
“Public service is not about holding a position—it’s about making a difference.”
Maraming Salamat, Pinablin Dagupan
Mula sa kaibuturan ng aking puso, isang taos-pusong pasasalamat ang nais kong ipabatid sa bawat Dagupeñong naging bahagi ng aking tatlong taong paglilingkod bilang Konsehal ng Dagupan.
Sa bawat araw ng aking panunungkulan, dala ko ang inyong tiwala, pagmamahal, at walang sawang suporta. Hindi man tayo pinalad sa nakaraang halalan, buong puso kong tinatanggap ang pasya ng taumbayan—sapagkat ang pagbibigay ninyo sa akin ng buong termino ay isa nang malaking karangalang habang-buhay kong babaunin.
Sa loob ng anim na taon, mula 2019 kahit Hindi pa po tayo nakaupo sa posisyon, hanggang 2022-2025 nang tayo po ay manalo, ako’y lubos na pinagpala na makapaglingkod sa ating kapwa Dagupeños—mula sa mga bata, kababaihan, kalalakihan, senior citizens, hanggang sa mga sektor na madalas hindi nabibigyan ng sapat na atensyon.
Sa ilalim ng aking personal na adhikain bilang doktor at personal na pondo, naipamahagi natin ang mahigit 51,000 libreng dental services, 3,000 vitamins para sa mga bata at nakatatanda, at naisakatuparan ang apat na medical at dental missions na umabot sa mga barangay families na higit na nangangailangan.
Bilang pinuno ng Committee on Health, Committee on Women and Children, at Committee on Arts, Culture and Heritage, nagkaroon ako ng pagkakataong itaguyod ang mga panukalang makatao at makabuluhan. Sa kabuuan, ako’y nakibahagi, nanguna at nakiisa sa mahigit 200 resolusyon, ordinansa, at committee hearings na nagsilbing tulay upang mas mapalawak ang ating serbisyong may kalinga at puso.
Isang malaking pasasalamat din ang nais kong ipaabot sa Lim Family, lalo na kay Manang Celia Lim, na hindi nagsawang umalalay at magbigay ng inspirasyon sa Team LIFE at sa Majority 7. Ang kanyang wagas at tapat na pagmamahal bilang aming ina ay nagsilbing ilaw at gabay sa aming layuning maglingkod nang tapat sa bayan. Hindi matutumbasan ng salita ang bawat ngiti, yakap, at salitang binitiwan ninyo sa panahon ng kampanya. Sa bawat sandali ng pakikibaka at pag-asa, naging higit pa kayo sa kaibigan—kayo ay naging pamilya.
Hanggang sa huling araw ng aking termino, mananatili akong handang tumulong at magsilbi sa anumang paraan na kaya ko. Sapagkat sa puso ko, ang paglilingkod ay hindi natatapos sa panunungkulan—ito ay panghabambuhay.
“Though the journey ends for now, the mission to serve never stops.”
Maraming salamat po and may God bless Dagupan City!
