Nagcarlan PIO

01/09/2026

PABATID SA PUBLIKO

Ipinababatid sa publiko na ang personal na Facebook account ni Mayor Elmor Vita ay nakaranas ng unauthorized access o hacking incident.

Kaugnay nito, hinihiling sa publiko na huwag munang bigyang-pansin ang anumang kahina-hinalang mensahe, post, link, o iba pang aktibidad habang isinasagawa ang pagpapaigting ng seguridad ng account.

Maraming salamat po sa inyong pang-unawa.

30/08/2026

𝐏𝐀𝐌𝐁𝐀𝐍𝐒𝐀𝐍𝐆 𝐀𝐑𝐀𝐖 𝐍𝐆 𝐌𝐆𝐀 𝐁𝐀𝐘𝐀𝐍𝐈

Ngayong Agosto 31, 2026, ang Pamahalaang Bayan ng Nagcarlan, sa pamumuno ni Punong Bayan Ark./Inh. Elmor Vitangcol Vita, ay nakikiisa sa buong sambayanang Pilipino sa paggunita ng Pambansang Araw ng mga Bayani.

Sa araw na ito, buong pagpupugay nating inaalala ang mga Pilipinong nag-alay ng kanilang talino, lakas, panahon, at maging ng kanilang buhay para sa kalayaan at kinabukasan ng ating bansa. Ang kanilang mga sakripisyo at kabayanihan ay patuloy na nagbibigay-inspirasyon sa bawat henerasyon upang isabuhay ang pagmamahal sa bayan, pagkakaisa, malasakit, at tapat na paglilingkod sa kapwa.

TRIVIA | Alam mo ba?

Ang pagdiriwang ng National Heroes Day ay unang itinakda sa ilalim ng Act No. 3827, na inaprubahan noong Oktubre 28, 1931, kung saan idineklara ang huling Linggo ng Agosto bilang National Heroes Day. Kalaunan, sa ilalim ng Republic Act No. 9492, itinakda ang paggunita nito tuwing huling Lunes ng Agosto. Kaya naman, para sa taong 2026, ang Pambansang Araw ng mga Bayani ay ginugunita ngayong Agosto 31, bilang huling Lunes ng buwan.

Inaalala at binibigyang-pugay sa araw na ito ang Sigaw sa Pugad Lawin, na itinuturing na isa sa mga mahalagang pangyayaring nagsilbing hudyat ng pagsisimula ng Himagsikang Pilipino noong Agosto 1896, isang makasaysayang pakikibaka para sa kalayaan ng ating bayan.

Nawa'y magsilbing inspirasyon ang kabayanihan ng ating mga bayani upang sa ating sariling paraan ay patuloy nating maipamalas ang malasakit, pagkakaisa, at pagmamahal para sa ating bayan at kapwa.

Mabuhay ang mga Bayaning Pilipino!
Mabuhay ang Pilipinas!

29/08/2026

𝐊𝐀𝐃𝐈𝐖𝐀 𝐍𝐆 𝐏𝐀𝐍𝐆𝐔𝐋𝐎 𝐒𝐀 𝐁𝐀𝐘𝐀𝐍 𝐍𝐆 𝐍𝐀𝐆𝐂𝐀𝐑𝐋𝐀𝐍
Setyembre 10, 2026 | Municipal Multipurpose Gymnasium

Tuloy-tuloy ang paghahatid ng abot-kaya at de-kalidad na mga produktong para sa bawat Nagcarlangin

Inaanyayahan po ang bawat isa na makiisa sa KADIWA NG PANGULO, isang programa na naglalayong magbigay ng mas abot-kayang presyo ng mga produktong pagkain at iba pang pangunahing pangangailangan, habang binibigyang pagkakataon ang ating mga lokal na magsasaka at food producers na direktang maibenta ang kanilang mga produkto sa mga mamimili.

Makilahok, mamili, at tangkilikin ang mga produktong hatid ng ating mga magsasaka at katuwang na ahensya ng pamahalaan.

27/08/2026

PABATID SA PUBLIKO

Ipinababatid ng Pamahalaang Bayan ng Nagcarlan sa mga benepisyaryo ng isinagawang Medical Mission na maaari nang makuha ang resulta ng kanilang Ultrasound at X-Ray.

📅 Agosto 28, 2026 (Biyernes)
⏰ 1:00 PM
📍 Office of the Mayor, Municipal Hall

Hinihikayat ang lahat ng benepisyaryong nabanggit na magtungo sa itinakdang lugar at oras upang personal na matanggap ang kanilang mga resulta.

Maraming salamat sa inyong pakikiisa at pakikilahok sa mga programang pangkalusugan ng Pamahalaang Bayan ng Nagcarlan.

26/08/2026

CIVIL MASS WEDDING 2026

Ang Pamahalaang Bayan ng Nagcarlan, sa pamamagitan ng Municipal Civil Registrar’s Office, ay muling magbibigay ng pagkakataon sa mga magkasintahang nagnanais na gawing pormal at legal ang kanilang pagsasama sa pamamagitan ng Civil Mass Wedding 2026.

Inaanyayahan ang mga interesadong mag-asawa na magtungo sa Municipal Civil Registrar’s Office upang makapag-inquire, makapagpahayag ng interes, at malaman ang mga kinakailangang dokumento at proseso para sa nasabing programa.

📅 Civil Mass Wedding: Nobyembre 2026 (ang eksaktong petsa ay Ihahayag sa susunod na abiso)

Ang programang ito ay bahagi ng patuloy na pagsisikap ng Pamahalaang Bayan ng Nagcarlan na mapadali at mapalapit sa ating mga kababayan ang mga serbisyong sibil, lalo na ang mga serbisyong may kaugnayan sa pagpaparehistro at legal na pagkilala sa pagsasama ng mag-asawa.

Para sa karagdagang impormasyon, mangyaring makipag-ugnayan o personal na magtungo sa Municipal Civil Registrar’s Office, Nagcarlan Presidencia.

Makiisa sa pagdiriwang ng pag-ibig, pangako, at pagsisimula ng isang legal at mas matatag na pagsasama.

26/08/2026

𝐋𝐈𝐁𝐑𝐄𝐍𝐆 𝐈𝐌𝐏𝐋𝐀𝐍𝐓 𝐈𝐍𝐒𝐄𝐑𝐓𝐈𝐎𝐍 𝐀𝐓 𝐑𝐄𝐌𝐎𝐕𝐀𝐋

Setyembre 3, 2026 (Huwebes)
7:00 AM – 11:00 AM
Nagcarlan Family Planning Center, 2nd Floor, OSCA Building

Inaanyayahan ang mga kwalipikadong indibidwal na samantalahin ang LIBRENG IMPLANT INSERTION & REMOVAL na hatid ng Nagcarlan Family Planning Center bilang bahagi ng patuloy na pagsusulong ng pamahalaang bayan ng Nagcarlan ng accessible at dekalidad na serbisyong pangkalusugan at family planning para sa ating mga kababayan.

Ang serbisyong ito ay naglalayong mabigyan ang mga kwalipikadong benepisyaryo ng ligtas, maayos, at libreng family planning service.

Para sa karagdagang impormasyon at mga katanungan tungkol sa eligibility at proseso, maaaring makipag-ugnayan sa Nagcarlan Family Planning Center.

Makilahok, magplano, at pangalagaan ang kalusugan ng pamilya.

26/08/2026