07/08/2026
Tikang sa Senado, mas napapakusog an paningkamot para sa edukasyon, agrikultura, ngan padayon nga pag-uswag para sa aton hinigugma nga probinsya.
Bilang bisita ni Sen. Bam Aquino, an akon pagbisita sa Senado sayu nga higayon nga mas mapakusog pa an akon paningkamot bilang sayu nga taga-himo balaod. Samtang nakikita ko an mga proseso, deliberasyon, ngan paghimo desisyon dida sa plenary hall, mas nasabtan ko nga an kada pitad nga ginhihimo didto may direkta nga epekto sa kinabuhi san kada Pilipino, labi na sa aton mga igkasi-Nortehanon.
Dako an akon pasalamat kan Senate President Win Gatchalian ngan kan Senate Majority Leader Migz Zubiri tungod san ira mapaso nga pagkarawat ngan pagkilala dida mismo sa Senado.
Antes magtikang an sesyon, nagkaada kami sin maupay nga kumustahan ni Sen. Bam Aquino. Ginpasalamatan ko siya tungod san iya padayon nga paninindugan para sa edukasyon ngan sa iya pagiging kampyon san sektor dida sa Senado. Amon liwat napag-istoryahan an kahimtang san Classroom Construction Program, tungod kay siya an namumuno yana san Committee on Basic Education.
Antes pa sini nga pagbisita, nagsurat ngan nakig-angbit na ako sa opisina ni Sen. Bam basi mangaro sin suporta para sa dugang nga mga classroom sa Laoang. Dako gud an maibubulig sini sa aton mga estudyante, mga magturutdo, ngan sa bug-os nga komunidad.
Naglalaom ako nga padayon nga mag-uswag an implementasyon san programa ngan, ha husto nga panahon, makapirma an Laoang san mga kinahanglanon nga MOA para sa pagtukod san bag-o nga mga classroom.
Bug-os an akon suporta sa Senate Bill No. 1482 o an Classroom-Building Acceleration Program (CAP) Act nga gin-author ni Sen. Bam Aquino. Ini nga panukalang balaod nagtutuyo nga matagan baton an ginbabana-bana nga kakulangan san 165,000 nga classroom sa bug-os nga nasud. Naglalaom ako nga pinaagi sini, mas damu pa nga kabataan an magkakaada sin angayan, luwas, ngan komportable nga lugar para sa pag-aradman.
Makalilipay liwat nga makumusta utro si Sen. Kiko Pangilinan, nga akon na nakilala sadto dida san National Movement of Young Legislators (NMYL), diin siya an founding president. Naglalaom ako nga magkakamay-ada pa kami sin dugang nga higayon nga magpadayon san pakig-istorya kaupod an iya opisina basi mas mapakusog pa an suporta para sa aton mga parag-uma ngan sa sektor san agrikultura didi sa Northern Samar.
An kada pakig-istorya ngan kada pakigbulig sa aton nasyonal nga mga lider diri la ordinaryo nga pagbisita. Ini nga mga higayon sayu nga importante nga pitad agud makadara kita sin mas damu nga oportunidad, proyekto, ngan serbisyo para sa aton mga igkasi-Nortehanon.
