01/06/2026
TINGNAN: Upgraded Smart Greenhouse sa Tanay,Rizal, inilunsad bilang modelo ng makabagong pananaliksik at matalinong pagsasaka
Sa layuning isulong ang modernisasyon ng agrikultura sa CALABARZON, matagumpay na inilunsad ng Rizal Agricultural Research and Experiment Station (RARES) katuwang ang Planning, Monitoring and Evaluation Division - Management Information System Unit (PMED-MIS) ng Department of Agriculture (DA) CALABARZON, ang Upgraded Smart Greenhouse of the Philippines Project (SGPP) sa Tanay, Rizal noong ika-20 ng Mayo, 2026.
Tampok sa inilunsad na pasilidad ang makabagong SGPP mobile at web-based applications na nagbibigay-daan sa real-time monitoring at remote management ng operasyon ng greenhouse. Sa pamamagitan ng tinatawag na internet-of-things (IoT), mas episyente nang namomo-monitor ang mga environmental at physicochemical parameters na mahalaga sa agrikultura gaya ng media moisture, pH, humidity, temperature, at iba pang datos mula sa Automated Weather Station (AWS).
Higit sa lahat, kaya na rin nitong kontrolin, maging sa remotong paraan o remotely, ang irrigation system at nutrient delivery at iba pang automated components upang makatulong sa mas episyente, mas tumpak, at mas matalinong pamamahala ng produksyon ng pananim.
Upang ipakita ang suporta at pagkakaisa ng mga katuwang na ahensya ng pamahalaan, dinaluhan ang nasabing pagtitipon ng mga opisyal mula sa national government na sina Lorna Villegas mula sa tanggapan ng DA-Assistant Secretary for Operations, Director Angelita D. Martir ng DA – Philippine Rural Development Project (PRDP) at Special Projects Coordination and Management Assistance Division (SPCMAD), Anthony Obligado ng Bureau of Agricultural Research (BAR), Charez P. Arevalo ng Bureau of Plant Industry (BPI) - Baguio.
Ang paglulunsand ng proyekto ay pinangunahan nina Dr. Alexandra Jamoralin ng RARES kasama si Julany G. Castillo, hepe ng MIS Unit, bilang project leader at co-project leader. Ito ay sinaksihan ng mga opisyal ng DA CALABARZON sa pangunguna ni Regional Technical Director Maria Ella Cecilia B. Obligado, DA-Farmer Director Gaudencio Genil mula sa Regional Agricultural and Fishery Council (RAFC), at mga pinuno ng iba’t ibang dibisyon at opisina ng DA CALABARZON na sina Dr. Wilmer S. Faylon, Dr. Darrio M. Huelgas, Marjorie I. Sepina, at Carmelita S. Ramos.
Binigyang suporta din ng lokal na pamahalaan (LGU) ng Tanay ang aktibidad sa pamamagitan ng pagdalo ni Municipal Agriculture Officer (MAO) at sa pagtulong sa mga logistics na pangangailangan sa event.
Ang naturang proyekto ay naisakatuparan sa ilalim ng Research Facilities Development Grant (RFDG) Program ng DA-BAR. Inaasahang magsisilbi itong modelo ng digital agriculture at climate-resilient agriculture at maging sentro ng kaalaman sa mga magsasaka at mag-aaral.
Bilang bahagi ng malawakang pagbabahagi ng kaalaman, bukas ang tanggapan ng RARES para sa mga lokal na magsasaka, mag-aaral, at mga mananaliksik na nagnanais makita ang aktwal na operasyon ng pasilidad.
-RARES
