BulSUONE CHTM

31/08/2026

𝗠𝗔𝗟𝗜𝗚𝗔𝗬𝗔𝗡𝗚 𝗔𝗥𝗔𝗪 𝗡𝗚 𝗠𝗚𝗔 𝗕𝗔𝗬𝗔𝗡𝗜! 🇵🇭

Sa Araw ng mga Bayani, alalahanin natin na ang pagiging bayani ay hindi lamang tungkol sa paghawak ng espada o pakikipaglaban sa digmaan. Ang tunay na bayani ay ang mga taong naninindigan para sa tama, ipinaglalaban ang katotohanan, at hindi natatakot tumayo para sa kanilang mga pinaniniwalaan.

Ating bigyang-pugay hindi lamang ang mga bayaning nakasulat sa mga libro at may mga rebulto, kundi pati na rin ang bawat taong patuloy na naninindigan, nagsasakripisyo, at gumagawa ng mabuti para sa kapwa nang walang hinihintay na kapalit. Dahil ang tunay na kabayanihan ay hindi nasusukat sa lakas o armas, kundi sa tapang na ipaglaban ang tama at pusong handang magsakripisyo para sa ikabubuti ng nakararami.

Saludo kami sa lahat ng bayani—noon, ngayon, at sa mga magiging bayani ng mga susunod pa na henerasyon.

30/08/2026

𝗜𝗞𝗔-𝟭𝟳𝟲 𝗡𝗔 𝗔𝗡𝗜𝗕𝗘𝗥𝗦𝗔𝗥𝗬𝗢 𝗡𝗚 𝗞𝗔𝗣𝗔𝗡𝗚𝗔𝗡𝗔𝗞𝗔𝗡 𝗡𝗜 𝗠𝗔𝗥𝗖𝗘𝗟𝗢 𝗛. 𝗗𝗘𝗟 𝗣𝗜𝗟𝗔𝗥

Isa na namang araw upang alalahanin ang isa sa ating mga bayani—isang Pilipinong nagmula sa lalawigan ng Bulacan na nag-alay ng kanyang talino, tapang at panulat para sa kalayaan at pagbabago sa ating bayan.

Sa pamamagitan ng kanyang panulat at paninindigan, naging malaking bahagi si Marcelo H. Del Pilar sa pakikibaka para sa karapatan at pagkakapantay-pantay ng bawat Pilipino. Patuloy na nagsisilbing inspirasyon sa mamamayang Pilipino ang kanyang pagmamahal para sa bayan.

Nawa’y mag sibling alaala ang kanyang buhay na ang pagmamahal sa bayan ay naipapakita hindi lamang sa salita, kundi sa pagkilos, paninindigan, at paglilingkod sa ating kapwa.

𝗠𝗮𝗯𝘂𝗵𝗮𝘆 𝗮𝗻𝗴 𝗮𝗹𝗮𝗮𝗹𝗮 𝗻𝗶 𝗠𝗮𝗿𝗰𝗲𝗹𝗼 𝗛. 𝗗𝗲𝗹 𝗣𝗶𝗹𝗮𝗿!
𝗠𝗮𝗯𝘂𝗵𝗮𝘆 𝗮𝗻𝗴 𝗹𝗮𝗵𝗶𝗻𝗴 𝗣𝗶𝗹𝗶𝗽𝗶𝗻𝗼! 🇵🇭

30/08/2026

IPAGLABAN ANG KARAPATAN NG MGA MANGGAGAWANG PILIPINO!

Pumutok noong nakaraang Agosto 18 ang welga ng mga manggagawa sa ilalim ng DHL United Workers Union (DUWU) sa Muntinlupa Warehouse. Ito ay nag-ugat sa tahasan at patuloy na pag-iwas ng pamunuan na harapin ang unyon upang makipag-negosasyon para sa isang nararapat na Collective Bargaining Agreement (CBA).

Matapos pormal na makakuha ng certification ang unyon noong Mayo ng taong ito, sa halip na simulan ang makatwirang dayalogo para sa mas maayos na pasahod at kondisyon sa paggawa, panggigipit, retrenchment, at banta sa trabaho ang isinagot ng kumpanya. Ikinatwiran ng management ang umano'y pagtatapos ng kontrata nito sa isang pangunahing kliyente, isang pahayag na mariing pinabubulaanan ng mga manggagawa dahil sa mismong anunsyo ng kumpanya sa isang town hall na na-renew ang nasabing kontrata ng tatlong taon. Dagdag pa rito, patuloy ang pag-hire ng kumpanya ng mga bagong empleyado kahit na nag-anunsyo ng pagsasara ng warehouse. Malinaw itong porma ng union-busting na nagkukunwaring restructuring upang patahimikin ang nagkakaisang hanay ng mga manggagawa.

Nakakadismaya na ang isang higanteng pandaigdigang kumpanya ng logistics—na sa papel ay nangangakong rerespetuhin ang freedom of association at human rights—ay siya mismong sumusupil sa boses ng sarili nitong mga manggagawa. Sa kabila ng apat na conciliation conferences sa DOLE at NCMB, walang inilatag na counterproposal ang management. Bilang tugon sa pambabastos sa kanilang karapatan, 98 porsyento ng mga miyembro ng DUWU ang tumindig at bumoto pabor sa welga.

Ang laban na ito ay hindi lamang para sa dagdag na benepisyo. Ito ay laban para sa batayang karapatan ng bawat manggagawang Pilipino na mag-organisa at magkaroon ng kapangyarihan sa pagpapatakbo ng kanilang ginagalawang industriya nang walang takot na tatanggalin sila sa trabaho.

Ang laban ng mga manggagawa ng DHL ay laban din ng bawat kabataan, mag-aaral, at ordinaryong mamamayan. May malaki tayong papel na gagampanan upang palakasin ang kanilang panawagan at iparamdam ang ating buong pagsuporta.

Tungkulin nating ibahagi ang kanilang tunay na kalagayan at dalhin ang diskurso ng kanilang pakikibaka sa loob ng ating mga silid-aralan, mga organisasyon, at maging sa ating mga tahanan. Palawakin natin ang suporta para sa DUWU sa pamamagitan ng pagpapalaganap ng impormasyon, pagpapabulaan sa mga maling naratibo ng management, at pagkundena sa mga hindi makatarungang hakbang ng kumpanya.

Huwag nating hayaang makulong ang laban na ito sa loob lamang ng pagawaan. Kapag inaapi ang manggagawa, lahat tayo ay apektado. Igiit ang karapatan sa disenteng trabaho at igalang ang boses ng uring manggagawa!

28/08/2026

DOCTOR OF (EVADING) LAWS: ISANG MAINIT NA PAGBATI SA BAGONG 'DIPLOMA' NG PANGGULO!

Isang masigabong palakpakan! Matapos ang ilang dekadang kalituhan at pilitang pagpapaliwanag kung bakit mukhang certificate of participation lang ang kaniyang "Special Diploma" mula sa Oxford, sa wakas ay may lehitimo at sigurado na siyang degree. Ang pinakamaganda pa rito? Hindi na niya kinailangang mag-edit ng Wikipedia page. Walang puyat sa library, walang iniyakang thesis defense, walang terror na professor na kailangang lambingin, at higit sa lahat, walang tuition na pinroblema. Isang talumpati lang, may diploma na. Sana all, hindi ba?

Tunay ngang "deserving" at overqualified ang Pangulo na gawaran ng titulong Doctor of Laws (Honoris Causa). Sino pa nga ba ang mas bihasa sa batas kundi ang isang taong may dekada ng karanasan sa pag-iwas dito? Kung may degree lamang para sa Legal Gymnastics, malamang ay Summa Cum Laude pa siya. Mula sa bilyon-bilyong pisong estate tax na tila na-magic at ibinaon sa limot, hanggang sa walang-habas na pag-absuwelto sa mga paglabag sa karapatang pantao noong Batas Militar, isang malaking masterclass ang ginagawa ng kanilang pamilya. Hindi na nila kailangan ng Bar Exam—ang track record nila mismo ang jurisprudence ng kawalan ng hustisya.

Nakakapanggigil ang lantarang pambabastos na ito sa akademya. Habang ang mga Iskolar ng Bayan at ordinaryong Pilipinong mag-aaral ay literal na nagkakasakit, namomroblema sa araw-araw na pamasahe, at gumagapang mairaos lamang ang bawat semestre para sa isang pirasong papel na mag-aahon sa kanila sa kahirapan, ang mga nasa poder ay ginagawang giveaway na lamang ang pinakamataas na karangalan ng pamantasan. Isang napakalaking sampal sa mukha ng bawat estudyanteng Pilipino na ang diploma ay naging palamuti na lamang sa résumé ng mga naghahari-harian.

Nakakalungkot na ang mga unibersidad, na dapat sana'y huling balwarte ng katotohanan, integridad, at kritikal na pag-iisip, ay tila nagiging glorified washing machine para linisin ang maduming kasaysayan ng mga pulitiko. Ang akademya ay hindi dapat ginagamit bilang PR agency ng gobyerno.

Huwag nating hayaang gawing katatawanan ang halaga ng ating edukasyon at kasaysayan! Patuloy nating tuligsain ang pamumulitika sa loob ng mga pamantasan at labanan ang pagtatangka ng mga nasa poder na i-laundry ang kanilang mga pangalan. Tumindig para sa katotohanan, ipagtanggol ang integridad ng akademya, at ipaglaban ang edukasyong naglilingkod sa masa—hindi pamunas sa kasalanan ng mga nasa Malacañang!

27/08/2026

𝐏𝐚𝐧𝐢𝐧𝐢𝐧𝐝𝐢𝐠𝐚𝐧 𝐩𝐚𝐫𝐚 𝐬𝐚 𝐂𝐎𝐍 𝐚𝐭 𝐂𝐫𝐢𝐦𝐢𝐧𝐨𝐥𝐨𝐠𝐲: 𝐇𝐢𝐧𝐝𝐢 𝐓𝐚𝐲𝐨 𝐏𝐚𝐩𝐚𝐲𝐚𝐠 𝐧𝐚 𝐈𝐰𝐚𝐤𝐬𝐢 𝐚𝐧𝐠 𝐀𝐭𝐢𝐧𝐠 𝐊𝐢𝐧𝐚𝐛𝐮𝐤𝐚𝐬𝐚𝐧.

Kaisa ang College of Hospitality and Tourism Management (CHTM) sa paninindigan ng ating mga kapwa mag-aaral mula sa College of Nursing (CON) at College of Criminal Justice Education (CCJE). Hindi tayo papayag na basta-basta alisin, ilipat, o buwagin ang mga programang College of Nursing (CON) at BS Criminology sa Main Campus ng BulSU. Ang mga kursong ito ay bahagi ng puso at pagkakakilanlan ng ating unibersidad—mga pundasyon ng serbisyo, kalusugan, at katarungan. Ang mga desisyong walang konsultasyon at walang malasakit sa kapakanan ng mga estudyante ay isang insulto sa ating karapatan at dignidad bilang kabataan na naghahangad ng makabuluhang pagbabago.

Ang Criminology at Nursing ay hindi lamang mga simpleng kurso. Ito ay mga programa na nagbubunsod ng pagbabago at serbisyo sa bayan. Ito ay mga misyon na maglingkod sa bayan, at maghubog ng mga propesyonal na may malasakit at may integridad. Ang paglipat o pagtanggal sa mga ito ay magdudulot ng malaking paghihirap, pag-aalinlangan, at pagkawasak ng ating pangarap na makapaglingkod sa bayan.

Bilang bahagi ng kolektibong boses ng mga estudyante, naninindigan tayo na ang edukasyon ay isang Karapatan at hindi pribilehiyo. Ang ating panawagan: patuloy na pagpapanatili, pagpapalawak, at pagpapalakas ng ating mga programa sa Main Campus—hindi sa paglilipat o pagtanggal. Ipanawagan natin na pakinggan at pagtuunan ng pansin ang kapakanan ng mga mag-aaral, at huwag hayaang maging eksperimento ang ating edukasyon.

Tayo ang lakas, tayo ang boses, at tayo ang pagbabago. Sama-sama, ipaglaban natin ang ating kinabukasan. Hindi tayo titigil hanggang sa mapanatili ang tunay na diwa ng BulSU!

21/08/2026

𝐔𝐠𝐚𝐭 𝐧𝐠 𝐍𝐚𝐤𝐚𝐫𝐚𝐚𝐧, 𝐓𝐚𝐧𝐠𝐥𝐚𝐰 𝐧𝐠 𝐁𝐮𝐤𝐚𝐬: 𝐌𝐚𝐥𝐢𝐠𝐚𝐲𝐚𝐧𝐠 𝐁𝐮𝐰𝐚𝐧 𝐧𝐠 𝐖𝐢𝐤𝐚! 🖋️

Isang marangal at mainit na pagpupugay sa kaakuhan, kultura, at kasaysayan ng lahing Pilipino! Ngayong buwan ng Agosto, buong pagmamalaki nating ipinagdiriwang ang Buwan ng Wika.

Ang ating pambansang wika at mga katutubong wika ay hindi lamang simpleng kasangkapan sa pang-araw-araw na pakikipagtalastasan; ito ang pangunahing nagbubuklod sa ating iba't ibang rehiyon at nagsisilbing salamin ng ating mayamang kalinangan. Sa bawat salita at tula, naipapasa natin ang mga aral, panitikan, at pangarap ng ating mga ninuno tungo sa mga susunod na henerasyon.

Sa gitna ng mabilis na modernisasyon at pag-usbong ng pandaigdigang komunikasyon, higit kailanman ay mahalagang manatiling nakaugat ang ating puso sa sariling atin. Ang pagpapalakas ng ating wika ay hindi lamang pag-alala sa nakaraan, kundi pagbuo rin ng isang matatag at malayang bukas para sa kabataan. Magkasama nating paunlarin, tangkilikin, at ipagmalaki ang Wikang Filipino at mga wika ng ating bansa.

Mabuhay ang Wikang Filipino! Mabuhay ang Lahing Pilipino! 🇵🇭

21/08/2026

𝐍𝐢𝐧𝐨𝐲 𝐀𝐪𝐮𝐢𝐧𝐨 𝐃𝐚𝐲

“Ang isang bayani ay hindi kailanman namamatay—ang kanyang tapang at paninindigan ay patuloy na nabubuhay sa bawat Pilipino.”

Tuwing Agosto 21, ating ginugunita ang sakripisyo ni Senator Benigno “Ninoy” Aquino Jr., na piniling ipaglaban ang demokrasya kaysa manatiling tahimik. Ang kanyang pagkamatay ay naging mitsa ng pagkakaisa, pag-asa, at muling pagbangon ng bayan laban sa diktadura.

Nawa’y magsilbing paalala ang araw na ito na ang tunay na lakas ng bansa ay nasa pagkakaisa ng mamamayan, sa patuloy na paghahangad ng katotohanan, katarungan, at kalayaan.

15/08/2026

𝐋𝐚𝐡𝐢 𝐧𝐠 𝐁𝐚𝐲𝐚𝐧𝐢, 𝐘𝐚𝐦𝐚𝐧 𝐧𝐠 𝐊𝐚𝐬𝐚𝐲𝐬𝐚𝐲𝐚𝐧

Tayo ngayon ay nagkakaisa bilang isang komunidad upang ipagdiwang ang Araw ng Pagkakatatag ng Bulacan, isa sa mga mahalagang okasyon sa ating mga Bulakenyo upang mag-alay pagpupugay sa mayamang kasaysayan, makulay na kultura, at makabuluhang pag-unlad ng ating minamahal na lalawigan.

Kilala ang Bulacan bilang “Duyan ng Rebolusyong Pilipino” dahil sa mahalagang papel nito sa kasaysayan ng bansa, mula sa mga makasaysayang pook hanggang sa mga bayan na nagsilbing sentro ng paglaban para sa kalayaan. Ang araw na ito ay nagpapaalala sa atin ng ating pinagmulan, mga pagsubok, at mga tagumpay na naipamana sa atin ng mga ninuno na nagbuwis ng buhay para sa kalayaan at kaunlaran.

Habang ating ipinagdiriwang ang makasaysayang okasyong ito, nawa’y ating alalahanin ang mga katangian na sumasailalim sa diwa ng Bulacan, katatagan, pagkakaisa, at pagmamahal sa bayan. Ang ating probinsya ay tahanan ng mga makasaysayang pook, masiglang mga selebrasyon, at mga talentadong kababayan na patuloy na nag-aambag sa pag-unlad ng ating lugar. Ito ay patunay na ang progreso ay nagsisimula sa pagtutulungan at pagmamahal sa bayan.

Para sa bayan na nagsilang ng Unang Republika ng Pilipinas, ang araw na ito ay hindi lamang pag-alala sa nakaraan, kundi isang paanyaya rin upang maging mapagmatiyag sa ating kinabukasan. Ito ay pagkakataon upang muling panghawakan ang ating mga pangarap na makabuo ng mas maunlad, makatarungan, at matatag na lalawigan. Nawa’y magsilbing inspirasyon ang araw na ito upang ipagpatuloy ang pagpapahalaga sa ating kultura, pagsusulong ng lokal na industriya, at pagtutulungan tungo sa mas maliwanag na bukas. Maligayang Araw ng Pagtatatag ng Bulacan, mga Bulakenyo!

💛

14/08/2026

12/08/2026

MALAKING KALTAS-PONDO, NAGBABANTA SA BULSU NGAYONG 2027!

Matapos ang ating naging matagumpay na pagkalampag at pagpapasa ng position paper sa House of Representatives, isang malaking hamon ang muling kinakaharap ng ating pamantasan. Inilabas na ang panukalang badyet para sa taong 2027, at malinaw ang posisyon ng pambansang gobyerno sa pagkakait sa sapat na pondo para sa mga Iskolar ng Bayan.

Batay sa opisyal na National Expenditure Program document para sa BulSU, asahan natin ang higit ₱181 milyong pisong kaltas sa kabuuang pondo ng ating pamantasan. Ang Total Agency Budget ng BulSU para sa kasalukuyang taong 2026 ay nagkakahalaga ng ₱ 2,109,744,000. Para sa panukalang badyet ng taong 2027, ibinaba ito sa ₱ 1,928,510,000. Pinakamatindi ang kaltas sa Capital Outlays ng pamantasan, na nagkakahalaga na lamang ng ₱ 101,360,000 para sa 2027.

Ano ang ibig sabihin ng lantarang kaltas-pondong ito para sa mga ordinaryong BulSUan? Ayon mismo sa ating Agenda 1, ang kaltas-pondong ito ay lantarang pagtalikod ng estado sa mandato ng Article XIV, Section1 ng ating Konstitusyon na protektahan at itaguyod ang karapatan ng bawat mamamayan sa de-kalidad at abot-kayang edukasyon.

Ang kakulangan sa pondo ay isang "manufactured scarcity" na direktang sumasagasa sa kalidad ng ating edukasyon. Libu-libong aplikante ang hindi matatanggap taon-taon — hindi dahil kulang sila sa galing, kundi dahil napipilitan ang pamantasan na maglagay ng artipisyal na enrollment cap bunsod ng kawalan ng pisikal at logistikal na kapasidad. Ang patuloy na hindi paglalaan ng sapat na Capital Outlay ay nagreresulta sa mga nag-uumapaw na klasrum, paggamit ng mga pasilyo bilang espasyo sa pag-aaral, at kakulangan sa armchairs at desks para sa mga nakapasok. Direktang manipestasyon din ng pag-ipit sa pondo at kawalan ng institusyonal na proteksyon sa gitna ng reorganisasyon ng pamantasan ang kinakaharap na banta sa College of Nursing, kung saan pilit silang inililipat mula sa Malolos Campus patungo sa San Rafael sa halip na palakasin at pondohan ang pananatili ng isang matagal nang kolehiyo. Ang patuloy na pag-ipit sa Personnel Services ay naglilimita sa permanenteng plantilla positions, na nagtutulak sa pamantasan na umasa sa mga contractual at part-time na g**o na nabibigyan ng hindi makatarungang dami ng teaching loads. Sa gitna ng krisis pang-ekonomiya, nananatiling underfunded ang Unified Student Financial Assistance System for Tertiary Education (UniFAST) kung ikukumpara sa tunay na pangangailangan ng mga mag-aaral para sa transportasyon at internet connectivity.

Hindi natin maaaring tanggapin ang kakulangan sa pondo bilang isang normal na sitwasyon — sapagkat ang kakulangang ito ay direktang desisyon at patakaran ng estado, hindi isang aksidente lamang. Ang batayang karapatan natin sa edukasyon ay hindi isang pribilehiyo na pwedeng tawaran pababa taon-taon. Panahon na upang palakasin ang ating panawagan. Iisang boses nating igigiit na ang sapat na pondo ay isang batayang obligasyon ng estado, at nararapat na sundin ng gobyerno ang pamantayang 6% of GDP allocation para sa edukasyon na nirerekomenda ng UNESCO upang punan ang mga pangangailangan ng bawat SUC. Ang estado ay may pangako nang itayo nito ang Bulacan State University, at nandito tayo para siguruhing tutuparin nila ito. Isulong ang laban. Para sa edukasyon. Para sa bayan.