Talavera Tourism Page

24/08/2026

𝐕𝐈𝐃𝐄𝐎 𝐇𝐈𝐆𝐇𝐋𝐈𝐆𝐇𝐓𝐒: Pilgrimage season (Romeria a San Isdirdo)
Maraming salamat po sa inyong pagbisita! Peregrinos mula sa Diocesan Shrine and Parish of San Isidro Labrador - Pulilan Bulacan.

24/08/2026

𝐀𝐮𝐠𝐮𝐬𝐭 𝟐𝟏, 𝟐𝟎𝟐𝟔

Welcome Pilgrims!

Masayang sinalubong at tinanggap ng Diocesan Shrine and Parish of San Isidro Labrador, Talavera, N.E. ang mga deboto mula sa San Isidro Labrador Pulilan, Bulacan na bumisita sa ating Simbahan. Tunay na pinagpala ang ating parokya sa pagdating ng humigit kumulang sa Isang Libong deboto at mananampalataya. Isang karangalan na maging bahagi ng inyong banal na paglalakbay.

Salamat po sa pagbisita. Gabayan nawa kayo ng ating Panginoon sa inyong Pilgrimage.

19/08/2026

𝐊𝐀𝐒𝐀𝐘𝐒𝐀𝐘𝐀𝐍 𝐍𝐆 𝐁𝐀𝐑𝐀𝐍𝐆𝐀𝐘 𝐒𝐀𝐍 𝐌𝐈𝐆𝐔𝐄𝐋 𝐍𝐀 𝐌𝐔𝐍𝐓𝐈
Ang nayon ng San Miguel na Munti ay lubhang kilala ng mga taga-ibang bayan lalo na ng mga manglalakbay at nagyayao’t ditong mangangalakal. Itinuturing na “Baretbet” ng Talavera, ang San Miguel na Munti at nakilala sa simula dahilan sa mga pansamantalang tindahan ng pinalamig na tuba ng buli kung tag-araw na ang malaon ay naging palagiang kapihan-kantina.
Nagsimulang magkatao ang San Miguel na Munti noong 1911 nang dumating ang mga taga-San Miguel, Bulacan sa pangunguna ni Don Meliton Carlos. Sila ang nagbukas ng mga lupang sakahan sa nayon sa pamamagitan ng paghohomestead. Kabilang sa mga naglawag sina Eduardo Manahan, Luis Bautista, Roberto Alfonso, Felix Maningas, Juan Dandan, Maximo Ignacio, Patricia Ongjoco, Joaquin Maniquiz, Tomas Caling at Pablo Ballesteros. Mula naman sa bayan ng Malolos ay dumating sina Victorinoo de la Cruz, Agapito Tiangco, Gavino Abesamis, Teodulo Basa, Gil Maniquiz, Benito Tolentino, Juan Melchor at Juan Bautista. Itinayo nila ang kanilang mga tahanan sa magkabilang gilid ng lansangang pambansa.
Isang araw ay nagdaos ng pulong ang mga taganayon at pinag-usapan nila kung ano ang pangalang itatawag nila sa pook na kanilang tinatahanan. Sapagkat ang nakararami sa kanila ay mga taga-San Miguel, Bulacan kayat napagkaisahan nilang tawaging “San Miguel” ang nayon na dinugtungan nila ng “Munti” upang magkaroon ng pagkakakilanlan sa bayang kanilang pinagbuhatan. Nagpatayo sila ng munting bisita na ang patrong kanilang inilagay ay San Miguel na inihandog ni Don Meliton Carlos. Ang lupang pinagtirikan ng bisita ay ipinagkaloob din ng mga Carlos.
Ang San Miguel na Munti ay may tinatawag na Tila-Kaingin at may tinatawag na Bakood. Ang Tila-Kaingin ay ang mga bukiring nasa dakong kanluran ng nayon na kaya tinagurian ng ganito ay kasalukuyang hinahawan. At yaong bahaging ginagawa nilang taniman ng iba’t-ibang mga halaman at nililinang sa pamamagitan ng pagbabakood ang siya naman nilang tinatawag na Bakood.
Maraming puno ng buli sa nasasaklaw ng San Miguel na Munti at kapag yaon ay matanda na ay kanilang tinutuba kung panahon ng kwaresma. Nagtatayo sila ng mga habong sa gilid ng lansangang pambansa at doon ipinagbibili ng mga kadalagahan sa nayon ang malinamnam na tuba ng buli. Nang malaon ay nagbukas nang kapihan-palamigan ang ilan sa kanila na ang higit na kilala ay ang kina Rosenda de la Cruz o ang Rosie’s Café and Refreshment at Maria Vendevil o ang Maring’s Café Refreshment. Ang huling itinayo ay ang kay Ramon Bernardo sa dakong luwasan ng nayon. Karaniwan nang tanawin ngayon sa buong maghapon at magdamag ang nangakahimpil na mga sasakyang pambyahe, pamasahero at pansarili upang ang mga sakay ay magkape o magpalamig sa nasabing mga kantina.
Mula sa lupang inihandog ni Don Meliton Carlos ay itinayo ng mga taga-San Miguel na Munti ang mga bahay-paaralang pinagdadausan ng mga klaseng mula sa una hanggang ikalimang baytang. Ang pagkakatayo ng nasabing mga bahay-paaralan at ng konkretong bakod ng bakuran ng paaralan ay utang sa magkakalakip na pagsusumikap nina Isabelle W. Vera Cruz, g**ong namamahala, Jose Capillar, pangulo ng samahan ng mga magulang at g**o at ni Kapitan Cezar Macapagal. Ang konkreto at makabagong gusali ng Bernardo Hall ay ipinagawa ni Pedro Bernardo at inihandog sa nayon nang yaon ay pasinayaan noong Abril 30,1996 sa pangalan ng Rural Improvement Club ng Nuweba Esiha. Ang huling natamo ng nayon ay ang teleponong ng kasalukuyang Punongbayan Romeo Maliwat.
Ang nayon ng San Miguel na Munti ay kaunti nang matina ng masaganang dugo noong dito pa nakahimpil ang isang batalyon ng mga kawal konstabularya na pinamumunuan ni Komandante Napoleon Valeriano. May sagisag na markang malaking bungo, ang batalyon ay napabantog sa pangalan ay Nenita na pagkatapos gahasain ay pinatay ng mga taong labas. Isinumpa sa harap ng kanyang bangkay ng mga kawal konstabularya na hindi sila tutugot hangga’t hindi nalalansag nang lubusan ang pangkat ng mga mapanligalig na namamayani sa laot ng mga kabukiran. Subalit lumabis ang kalupitan ng mga kawal ng Nenita Unit. Pati mga mamamayang tahimik at walang kasalanan ay kanilang idinadamay sa ginagawa nilang paghihiganti. Pati mga kababaihan ay naging biktima ng kanilang walang pangalang kabuhungan. Sa malabis na p**t ay pinangunahan ni Leopoldo Diaz, punongbayan ng Talavera nang mga panahong yaon, ang kanilang kinukob ang himpilan ng Nenita Unit sa San Miguel sa San Miguel na Munti. Salamat sa maagap na pagdating ng isang mataas na pinuno ng Hukbo na siyang namagitan, ang namintong pagkaputi ng maraming buhay ay naiwasan.
Ang iba pang nagsipagtinyente del baryo sa San Miguel na Munti ay sina Hilario Manahan, Juan Dandan, Felipe Villamar, Fonteno Caling, Pablo Ignacio, Jose Canosa, Juan Canosa, Jose Ballesteros, Jose Capillar, Francisco Paltao at Florencio Alfonso. Ang mga kagawad Foster, Mario Tiangco, Herminio Suva, Leopoldo Caling, Jose Ballesteros at Pedro Mauricio. Ang kalihim ay si Victorino Bulaclac, ingat-yaman si Pablo Ignacio at hepe ng pulis-nayon ay sina Feliciano Santos, Ignacio Murillo, Pepito Ibanez, Ruperto Mapilisan at Romeo Abesamis.
Nakatapos ng iba’t-ibang karunungan ang mga sumusunod: Manggagamot: Teodoro Carlos; Komersyo: Jose C. Bernardo, Celendonio Mauricio; Inhenyero Elektrika: Tranquilino Manahan; Dentista: Carmen Carlos, Irene Carlos; Optiko: Jose G. Carlos; Manananggol: Marte Carlos; Agrimensor: Pedro Rayo; Radyo Mekaniko: Ramon Bernardo; Pagtuturo: Cecilia Ongjoco-Legaspi, Miguela Ongjoco; Pananahi (damit pambabae): Miguela Manahan, Aida de la Cruz, Luisa Alfonso, Nieves Alfonso, Clarita Alfonso, Lita Benedicto, Conzuelo Maniquiz, Estrelita Mauricio, Rosalinda Mauricio Zenaida Villamar, Ligaya Melchor, Dolores de la Cruz, Pacita Magtalas, Maria Vendevil, Leticia Gariando, Antonia Benedicto, Conchita Maningas, Gloria Miranda, Gloria Reyes at Anatacia Caling; Pananahi (damit panlalaki): Anita Alvindia , Melchor Pablo, Merly Foster, Paula Bautista; Pananahi at Pagkukulot: Consorcia Alfonso; Pagkukulot : Flordelisa Ballesteros at Lualhati Atendido.
Nagdaraos ng pistang-nayon ang San Miguel na Munti kapag sumasapit ang ika-5 ng Marso na siyang kaarawan ng kanilang Patrong Pintakasi

SOURCE: Libro ng Kasaysayan ng Talavera, Nueva Ecija na sinulat ni TOMAS I. PAGADUAN

14/08/2026

𝐕𝐢𝐝𝐞𝐨 𝐇𝐢𝐠𝐡𝐥𝐢𝐠𝐡𝐭𝐬: Linggo ng Kabataan - Inter-High School Tournament 2026 Opening.

13/08/2026

Pagbati!

Matagumpay na naisagawa ang pagbubukas ng kauna-unahang 𝗜𝗻𝘁𝗲𝗿-𝗛𝗶𝗴𝗵 𝗦𝗰𝗵𝗼𝗼𝗹 𝗧𝗼𝘂𝗿𝗻𝗮𝗺𝗲𝗻𝘁 noong ika-12 ng Agosto 2026 . Dito ay nagsama-sama ang iba’t ibang Pampubliko at Pribadong Paaralan sa bayan ng Talavera upang ipakita ang husay, determinasyon, teamwork, at tunay na sportsmanship.

Ang aktibidad na ito ay hindi lamang tungkol sa panalo ito ay tungkol sa pagkakaibigan, karanasan, pagkakaisa at paglikha ng mga alaalang hindi malilimutan.

Salamat sa ating lokal na Pamahalaan sa pangunguna ng ating Punongbayan Aries Gaboy Lim sa pagbibigay ng pagkakataon at oportunidad sa ating mga Kabataan. Ang nasabing palaro ay pinangasiwaan ng 𝗠𝘂𝗻𝗶𝗰𝗶𝗽𝗮𝗹 𝗬𝗼𝘂𝘁𝗵 𝗗𝗲𝘃𝗲𝗹𝗼𝗽𝗺𝗲𝗻𝘁 𝗢𝗳𝗳𝗶𝗰𝗲 sa pamumuno ni G. Amador Allan A. Reyes katulong ang iba pang sangay ng lokal na pamahalaan at Department of Education.

Mabuhay ang mga Kabataan at Mag-aaral
Mabuhay ang Bayan ng Talavera

12/08/2026

𝐊𝐀𝐒𝐀𝐘𝐒𝐀𝐘𝐀𝐍 𝐍𝐆 𝐁𝐀𝐑𝐀𝐍𝐆𝐀𝐘 𝐒𝐀𝐌𝐏𝐀𝐋𝐎𝐂
Isang kilometro mula sa poblasyon ng Talavera sa gawing silangan ay matatagpuan ang nayon ng Sampaloc. Ito ay binubuo ng dating sityo ng Balasiwak at Gulod at nagsimulang magkatao noong panahon pa ng mga kastila. Ang pangalang Balasiwak ay binago at pinalitan ng Sampalok dahilan sa isang malaking puno ng sampalok na nag-iisang nakatindig sa gitna ng bakurang pag-aari ni Gregorio Maliwat. At nang matatag ang Sampalok bilang isang nayon ay nasakop nito ang sityo ng Gulod kayat kung tawagin ang bagong nayon ay Sampalok-Gulod.
Ang unang nanirahan sa Sampaloc ay nagmula sa malalayong lugar at mga lalawigan. Itinaboy sila ng hangaring tumuklas ng bagong kapalaran sa pandadayuhan at sa dakong ito sila humangga. Kabilang sa nagbukas ng mga lupang sakahan sa nayon sina Marcos Miranda, Julian Carreon, Jose Ramos, Arsenio Tiongson, Matias Toralba, Eugenio Reyes, Bonifacio Francia, Eugenio Pineda, Juan Dizon, Joaquin de la Cruz, Narciso Santiago, Pablo Santos, Alejandro de la Cruz, Matias Tiongson, Domingo Santos, Julian Maliwat, Ignacio Maliwat, Gregorio Maliwat, Pablo Valino, Gregorio Miranda, Modesto Ochavez, Joaquin Sanglay, Narciso Monje, Valeriano Miranda, Leocadio Miranda, Diosdado Maliwat, Fidel Maliwat, Alfredo Cayetano, Laureno Pelayo, Felino Pelayo, Jose Tanuecoz, Crispulo Sanglay,Cirilo Pineda, Modesto de Guzman, Isidro Lopez, Agustin Capinlac, Hermogenes Tumale, Maximo Pagaduan, Emilio Capulong at Fausto Lacanilao. Nanirahan din sa pook na ito at nagsaka sina Alejandro de Guzman, Maximo Tumibay, Ismael Ferrer, Modesto Cena at Pedro de Guzman.
Marami ang hindi nakakabatid subalit ang nayon ng Sampalok-Gulod ang siyang nayong sinilangan ng kasalukuyang Punongbayan Romeo Maliwat. Taganayon ang kanyang mga ninuno at magulang at bilang katunayan ang kauna-unahang naging tinyente del baryo sa Sampalok-Gulod ay ang kanyang ina, si Virginia Maliwat, ay dito naninirahan at ang isa niyang ale, si Engracia Maliwat, ang siyang nagmamay-ari ng maluwang na palayan at tayuan ng konkretong bisita ng Sampalok-Gulod ay pag-aari ni Engracia Maliwat at siya rin ang naghandog ng Patrong Pintakasi ng nayon—ang Nuestra Senora de la Paz na ipinagpipista ng mga taganayon kapag sumasapit ang ika-4 ng buwan ng Pebrero. Ang nayon ng Sampalok-Gulod ay isa sa mga nayong pinakabitan ng Telepono ng Kasalukuyang Punongbayan.
Ang iba pang mga nagsipagtinyente del baryo sa Sampalok ay sina Marcos Miranda, Ismael Santiago at Gaspar Lacanilao. Ang kasalukuyang kapitan del baryo ay si Francisco Monje at ang mga kagawad ng sanggunian ay sina Marcos Miranda, Ismael Santiago, Adriano Santos, Geronimo Ferrer, Monico Pineda, at Estanislo Lopez. Ang kalihim ay si Benito Santiago, ingat-yaman si Virginia Maliwat at hepe ng pulis-nayon ay sina Luisito de la Cruz, Celestino de Leon, Ramon Miranda, Maximo Tiongson, FautoPurification, Miguel Monje, Silvino Pascual at Alfredo de la Cruz. Nakatapos ng iba’t-ibang karunungan ang mga sumusunod: Pagtuturo: Cresecia Tiongson, Agueda Carreon, Engracia Carreon, Primitiva Santos, Dominga Pineda; Pagkukulot: Agueda Carreon.

SOURCE: Libro ng Kasaysayan ng Talavera, Nueva Ecija na sinulat ni TOMAS I. PAGADUAN

27/07/2026

𝐕𝐢𝐝𝐞𝐨 𝐇𝐢𝐠𝐡𝐥𝐢𝐠𝐡𝐭𝐬: Social Preparation for Cultural Mapping Orientation: “Identifying and Writing the Narratives of Our Tangible and Intangible Cultures: Basis for Cultural Mapping/Documentation”

24/07/2026

Matagumpay na isinagawa ang Social Preparation for Cultural Mapping Orientation na may temang “Identifying and Writing the Narratives of Our Tangible and Intangible Cultures: Basis for Cultural Mapping/Documentation” sa Mayor’s Hall, Municipal Compound, Talavera, Nueva Ecija.

Naging Resource Speaker sa nasabing orientation si Dr. Rommel V. Espejo, na nagbahagi ng kanyang kaalaman at karanasan sa kahalagahan ng pagtukoy, pagsulat, at pagdodokumento ng mga salaysay ng ating tangible at intangible cultural heritage bilang mahalagang batayan ng cultural mapping.

Layunin ng gawaing ito na palalimin ang pag-unawa sa kahalagahan ng pagtukoy, pagdodokumento, at pangangalaga sa mga tangible at intangible cultural heritage ng ating bayan. Sa pamamagitan ng cultural mapping, mas mapapangalagaan at maipapasa natin sa susunod na henerasyon ang mayamang kasaysayan, tradisyon, at pagkakakilanlan ng Talavera.

Sama-sama nating ipagmalaki at pangalagaan ang ating kultura at pamana.

20/07/2026

𝐊𝐀𝐒𝐀𝐘𝐒𝐀𝐘𝐀𝐍 𝐍𝐆 𝐁𝐀𝐑𝐀𝐍𝐆𝐀𝐘 𝐏𝐔𝐋𝐎𝐍𝐆 𝐒𝐀𝐍 𝐌𝐈𝐆𝐔𝐄𝐋
Noong unang mga taon, ang Pulong San Miguel, ay tinawag na Pulong Kapampangan. Kasi ang mga unang tao rito, ay nanggaling sa parteng Pampanga, at San Miguel, Bulacan. Komo marami ang nagpupunta sa bayan ng San Miguel, kung Pista, pagkat sila ay nakapunta doon, kaya napagkaisahan ng mga mamamayan sa lugar na ito, na ang kunin nilang Patron ay si San Miguel Arkanghel, upang sa gayon ay hindi na sila nagpupunta sa bayan ng San Miguel, para mamista. Ang kauna-unahang Pistang ginanap sa barriong ito ay noong Mayo 8, 1948. Magbuhat noon ay naging Pulong San Miguel na ang lugar na ito, ang Bisita ay natayo sa lupa ng mga Pamilya Paulino. Noon mga panahong iyon, nakasama pa ang Pulong Matias sa Pulong San Miguel.
Sa haba ng panahon bago ideklara ang Presidential Decree 1194. Noon na nga nagkaroon ng mga barangay. At itong Barangay Pulong San Miguel, ay naging isang ganap na Barangay. Ang boundary ng Pulong San Miguel, sa South Barangay Matias, sa North Barangay Calipahan sa East dalawang barangay Esguerra, at Andal Aliño, at sa West Talavera River. Ang barangay ay binubuo sa kasalukuyan ng 250 pamilya na ang karamihan nito ay Merchants, Market Vendors, Farmers at iba naman ay Professional. Ang Pulong San Miguel ay may animnapung (60) ektarya at mahigit pa. Tungkol sa ekonomiya, ang kalawakan ng lupa ay taniman ng iba’t ibang uri ng gulay.
Ngayon ang barangay na ito ay progresibong lugar na. Ang lahat ng mga pangangailangan para sa kaligtasan ng tao ay makikita rito, tulad ng kuryente, Media, kapilya para sa pang spiritwal na pangangailangan, laruan ng mga bata, Basketball Court para sa mga Kabataan, may Barangay Stage at mayroon ding Barangay Hall, gayundin dito ay napapaikutan ng konkretong kalsada, ang lahat ng ito ay gawa at tulong ng Local Government.
Ang barangay na ito ay umusad sa pamumuno ng Punong Barangay Dominador E. Antonio, at kanyang mga konsehal, sa tulong ng mabait na adviser Fernando a. Capulong at ang yumaong Engr. Leandro Lacsamana.

SOURCE: Libro ng Kasaysayan ng Talavera, Nueva Ecija na sinulat ni TOMAS I. PAGADUAN

14/07/2026