11/06/2014
TATAY, SA INYO NAMAN ITO
Katulad ng mga nanay, tayo din ay may ipinagdiriwang
Ngayong buwan ng Hunyo, sa isa pa nating magulang
Sa atin ay nagtataguyod , Kay Inay siya ay tumuwang
Upang tayo ay mapalaki, sa kanya, buhay din nati’y utang.
Ito’y para naman sa mga tatay, na haligi ng tahanan
Siya ang katuwang ni inay, kahati sa pagmamahalan
Sa pagtataguyod ng pamilya, Siya’ng ating inaaasahan
Sa mga problemang kinakaharap, karamay natin kahit kailan.
Tayo din sa kanila, may tawag na iba’t iba
Tatay at Itay daw sa mahirap, iyon ba talaga?
Kung ikaw daw ay mayaman, Daddy at Papa
Meron din naming simple, tawag lamang ay Ama.
Ang pagiging isang ama, ay hindi biro-biro
Nang si inay ay magbuntis, siya ang pasimuno
Binusog niya ng pagmamahal, puhunan ay dugo
At ng tayo’y maisilang, dibdib niya ay sumikdo.
Ang ating mga ama, ay masasabi kong talagang uliran
Ang gabi’y ginagawang araw, para tayo’y mapagsilbihan
Nagtatrabaho siya buong araw, sa init, siya’y pawisan
Di alintana ang pagod, ang mapakain tayo’y kasiyahan.
Sa ating tahanan, ang masusunod lagi’ y si tatay
Sa kanyang mga utos, walang dapat sumuway
Kapag ikaw ay pasaway, pwet mo ay may latay
Ng sinturong anung bagsik, mapapasigaw ka ng ARAY.
Pero ang mga ama natin, ay tunay na mapagmahal
Kapag may dumating na problema, sa atin ay dumatal
Sabihin mo sa kanya, at sayo ay may payong ibibigay
Yayakapin ka niya ng mahigpit, Katulad ng kay Inay.
Ako’y nalulungkot, kapag may mga anak na sumasagot
Kay tatay na kay bait, hindi sumisigaw ni gaputok
Sa atin ay balewala, pero puso niya ay kumikirot
Tinatanong ang sarili, sa pagmamahal ba siya’y madamot?
Anu nga bang kaylupit, ng mga anak na bastos?
Pagkatapos na arugain, Pinalaki’t pinagtapos
Sa kay amang matanda’t ulyanin na’y di pa makakilos
Ay hindi na pinapansin, pinapabayaan na lang bagkus.
Atin ngang limiin isa’t isa, Nang kay tatay ay ginawa
Tayo’y kanyang pinalaki, ng kanyang lakas at pwersa,
Dinibdib niya ang pagtatrabaho, Iniipon ang kinikita
Upang tayo’y mapag-aral , buhay natin ay gumanda.
Mayroong ding mga amang, pamilya ay iniiwan
Nagtrabaho sa ibang bansa, lungkot ay pinapasan
Nagtitiis ng kalbaryo’t hirap, para sa kinabukasan
Na mga anak na maliliit, musmos at walang alam.
Ahh kayrami pang ginawa, mga tatay natin sa bawat isa
Kanya-kanyang sakripisyo, pagmamahal at pag-aaruga
Kanya-kanyang mga kwento, karanasan at mga ala-ala
Pero kahit pa man iba-iba, tayo’y may kanya-kanyang ama.
O kay dakila ng mga taong, mapagmahal sa ama
Sa kanila’y walang masasabi, Pagtatangi ay tama
Sa bawat yakap na mahigpit, pag-ibig na dakila
Sa kanya’y maiiamot, kaligayahan niya’y luha.
Atin naman ngayong papurihan, mga ama ng tanan,
Sa inyo pong lahat, pagpupugay ay walang hanggan
Saan man kayo magtungo, taas noo kahit kailan
Kayo’y mga dakilang haligi, nitong ating tahanan.
Kayo po ay di maipagpapalit, sa materyal na mundo
Ang inyong mga paghihirap, at buong mga sakripisyo
Nakabaon sa aming buhay, sa isipan at aming puso
Amin ngayong ipinagmamalaki, na naging TATAY ay kayo!.
