https://www.facebook.com/685383018001634/

Sangguniang Bayan ng Morong Bataan, Burgos Street, Poblacion (2026)

03/06/2026

Panukalang pag-amyenda sa Market Code ng Morong | Committee Hearing

Isinagawa ng Sangguniang Bayan noong ika-26 ng Mayo, 2026 ang Committee Hearing kaugnay sa panukalang pag-amyenda sa umiiral na Market Code ng bayan. Ang pagdinig ay pinangunahan ni Kgg. Ac Noriega Millares, Committee Chairman on Market at dinaluhan ng bawat miyembro.

Layunin ng pagdinig na suriin at pagbutihin ang mga umiiral na alituntunin sa operasyon ng Morong Public Market upang matiyak ang mas maayos, ligtas at episyenteng pamamahala ng pamilihang bayan para sa kapakinabangan ng mga mamimili at mga negosyante. Kabilang sa mga pangunahing tinalakay ang mga probisyon ukol sa pagbabayad ng renta ng mga puwesto, mga kaukulang penalties sa mga hindi nakasusunod sa mga obligasyon, mga bayarin sa slaughterhouse operations, regulasyon sa paggamit ng mga pasilidad ng palengke at pagpapatibay ng mga panuntunan para sa kalinisan at kaayusan ng mga tindahan at common areas.

Tinalakay rin ang mga hakbang upang higit na mapahusay ang food safety standards, kabilang ang wastong inspeksyon ng mga produktong karne at ang mas mahigpit na pagsubaybay sa mga hayop na kinakatay para sa pampublikong konsumo. Binigyang-diin din ang pangangailangan ng malinaw na mga regulasyon sa mga delivery area, waste management at iba pang operasyong may direktang epekto sa kaligtasan at kaginhawahan ng mga mamimili.

Lumabas sa talakayan ang pangangailangan ng isang Market Code na hindi lamang nakatuon sa pangongolekta ng kita kundi nagsisilbi ring gabay sa pagpapanatili ng kaayusan, kalinisan, patas na kalakalan at proteksyon sa kalusugan ng publiko. Ipinakita rin ng pagdinig ang kahalagahan ng pakikipagkonsultasyon sa mga market personnel at stakeholders upang matiyak na ang mga pagbabago sa polisiya ay praktikal at naaayon sa aktuwal na kalagayan ng pamilihan.

Bilang susunod na hakbang, napagkasunduan ng komite na magsagawa pa ng karagdagang konsultasyon at pagdinig upang maisama ang iba pang rekomendasyon bago pormal na ihain ang mga amyenda para sa konsiderasyon ng kapulungan.

Ang Sangguniang Bayan ng Morong ay tuloy-tuloy sa pagsusulong ng mga patakarang naglalayong mapabuti ang serbisyo publiko at mapangalagaan ang kapakanan ng bawat mamamayan.

21/05/2026

Panukalang Ordinansa na Nagbabawal sa Pag-iinom ng alak sa mga Pampublikong Lugar | Committee Hearing

Isinagawa kahapon, ika-20 ng Mayo, 2026 ang Committee Hearing as a Whole ng Sangguniang Bayan kaugnay sa panukalang ordinansa na “Anti-Public Drinking and Open Container Ordinance of Morong, Bataan,” isang mahalagang hakbang upang patatagin ang kaayusan at disiplina sa mga pampublikong lugar ng ating bayan.

Pinangunahan ang pagdinig ni Kgg. James Darwin Castro, Chairman ng Committee on Peace and Order & Public Safety, katuwang ang mga miyembro ng Sangguniang Bayan. Nakiisa rin sa makabuluhang talakayan si Kgg. Gerbo Bernados, Brgy. Kagawad ng Brgy. Poblacion. Sa isinagawang pagdinig, masusing sinuri ang mga pangunahing probisyon ng ordinansa, kabilang ang mahigpit na pagbabawal sa pag-inom at pagdadala ng bukas na lalagyan ng alak sa mga pampublikong lugar gaya ng kalsada, parke, terminal at iba pang lugar na bukas sa lahat. Layunin nitong maiwasan ang kaguluhan, mapanatili ang kalinisan at mapalakas ang disiplina lalo na sa mga lugar na madalas puntahan ng mga residente at bisita.

Binigyang-diin din ang mga makatwirang exemptions para sa mga lisensyadong establisyimento, pribadong pagtitipon at mga aktibidad na may pahintulot ng pamahalaan. Kasabay nito, tinalakay ang mahalagang papel ng mga negosyo sa pagpapanatili ng kaayusan, pati na rin ang malinaw at makatarungang pagpapatupad ng mga parusa sa mga lalabag.

Lumabas sa talakayan ang isang malinaw na direksyon, isang ordinansang may matibay na paninindigan sa kaayusan at kaligtasan ngunit may malasakit at paggalang sa karapatan at dignidad ng bawat mamamayan. Kaakibat nito ang pagpapatupad ng malawakang information and education campaign upang matiyak na ang bawat isa ay may sapat na kaalaman bago ito ganap na ipatupad.

Ito ay patunay na ang Sangguniang Bayan ng Morong ay nananatiling matatag sa layuning bumuo ng isang disiplinado at responsableng komunidad para sa lahat.

21/05/2026

Pagbabawal sa mga Nakahubad sa mga Pampublikong Lugar at Lansangan | Panukalang Ordinansa

Isinagawa rin kahapon, ika-20 ng Mayo, 2026, ang Committee Hearing as a Whole ng Sangguniang Bayan hinggil sa panukalang ordinansa na pinamagatang “Public Decency and Proper Attire Ordinance of Morong, Bataan,” na naglalayong itaguyod ang kaayusan at disiplina sa pampublikong lugar sa ating bayan.

Pinangunahan ang pagdinig ni Kgg. James Darwin Castro, Chairman ng Committee on Peace and Order & Public Safety, kasama ang mga miyembro ng Sangguniang Bayan. Dumalo rin si Kgg. Gerbo Bernados, Brgy. Kagawad ng Brgy. Poblacion upang makibahagi sa talakayan.
Sa pagdinig, masusing tinalakay ang mahahalagang probisyon ng ordinansa kabilang ang malinaw na depinisyon ng public places at improper or indecent attire, mga ipinagbabawal na gawain at ang mga makatwirang exemptions para sa mga lehitimong sitwasyon.

Binigyan ding diin ang pagpapatupad ng penalties, gayundin ang kahalagahan ng maayos at may paggalang na enforcement ng batas. Lumutang sa talakayan ang pangangailangan ng balanseng polisiya, isang regulasyong nagtataguyod ng disiplina at kaayusan sa mga pampublikong lugar, habang iginagalang ang karapatan at iba’t ibang kalagayan ng bawat indibidwal. Tinalakay rin sa pagdinig ang kahalagahan ng information dissemination at tamang gabay sa publiko bago tuluyang ipatupad ang ordinansa.

Ang hakbang na ito ay patunay ng patuloy na pagsisikap ng Sangguniang Bayan ng Morong na mapangalagaan ang moral na pamantayan ng komunidad at maisulong ang isang maayos at ligtas na kapaligiran para sa lahat.

21/05/2026

Proposed Ordinance on Sanitation Code of Morong | Public Hearing

Noong ika-11 ng Mayo, 2026, isinagawa ng Sangguniang Bayan ang Public Hearing kaugnay sa panukalang Sanitation Code of Morong, na pinangunahan ni Kgg. Ricky Batoon Paguio, Chairman ng Committee on Health and Sanitation at may-akda ng naturang ordinansa. Dinaluhan ito ng mga miyembro ng Sangguniang Bayan, kasama ang mga kinatawan mula sa iba’t ibang ahensya at sektor ng komunidad.

Layunin ng panukalang ordinansa na magpatupad ng isang komprehensibong balangkas sa kalinisan at kalusugan ng buong bayan bilang pundasyon ng isang ligtas at maayos na kapaligiran para sa mga mamamayan at mga bumibisitang turista. Sa isinagawang pagdinig, naging bukas ang talakayan sa mga mahahalagang probisyon ng ordinansa.

Ilan sa mga mahahalagang punto na lumutang ay ang:�• Pangangailangan na maisama ang regulasyon sa frozen meat products upang masiguro ang kaligtasan ng mga mamimili at maiayon sa umiiral na Market Code;�• Mga isyu sa solid waste management, partikular sa regular na koleksyon ng basura sa mga paaralan at barangay;�• Pagpapatibay ng mga umiiral na sanitation practices sa mga paaralan, kabilang ang pagsusuri sa kalidad ng tubig;�• At ang kahalagahan ng malinaw na implementasyon ng mga parusa alinsunod sa umiiral na Revenue Code ng bayan.

Mula sa mga pahayag ng iba’t ibang sektor, malinaw na ang hamon ay hindi lamang nasa pagbuo ng polisiya kundi sa epektibong pagpapatupad nito, lalo na sa usapin ng waste management at inter-agency coordination. Kasabay nito, ipinakita rin ang pagkakaisa ng mga stakeholder sa pagsuporta sa isang mas mahigpit ngunit makatarungang sanitation framework.

Binigyang-diin ng kapulungan na ang ordinansa ay magsisilbing gabay at pamantayan upang matiyak ang kalinisan, kaligtasan at kalusugan ng buong bayan.

13/05/2026

Substantial Alteration of Boundaries between Brgy. Nagbalayong & Brgy. Poblacion | Committee Hearing

Isinagawa noong ika-6 ng Mayo ng Sangguniang Bayan ang isang Committee Hearing as a Whole hinggil sa panukalang Substantial Alteration of Boundaries sa pagitan ng Brgy. Nagbalayong at Brgy. Poblacion. Isang kritikal na usapin na may direktang implikasyon sa jurisdiction at paghahatid ng serbisyo ng mga mamamayan sa Sitio Panibatuhan, Sitio Crossing at Sitio Fuerte.

Pinangunahan ang pagdinig ni Kgg. Ruben M. Pastelero, Chairman ng Committee on Housing and Land Utilization. Sa masinsing talakayan, binusisi ang mga pangunahing batayan sa pagtukoy ng hangganan mula sa aktuwal na saklaw ng serbisyong naibibigay, pagkakakilanlan ng mga botante, hanggang sa paggamit ng natural boundaries gaya ng mga ilog, partikular ang Bayandati River, bilang isang matibay at teknikal na sanggunian. Inilahad din ni Engr. Johnfel David, Acting Municipal Assessor ang rekomendadong mapa na nagsisilbing konkretong gabay sa pagtakda ng eksaktong sakop ng bawat barangay.

Lumutang sa pagdinig ang pangangailangan ng isang malinaw at patas na desisyon, lalo na’t matagal nang may magkakaibang pananaw ang dalawang barangay sa usapin ng nasasakupang lupa. Mariing iginiit ng mga miyembro ng Sanggunian ang kahalagahan ng transparency at wastong impormasyon upang matiyak na ganap na nauunawaan ng mga residente ang magiging epekto nito lalo na sa inihahaing plebisito kung saan sila mismo ang magpapasya.

Bilang bunga ng pagdinig, nagkaisa ang kapulungan na pakausisain ang inilahad na proposed boundary na nakabatay sa natural landmarks, kasabay ng paghahanda ng pormal na pagtalakay nito sa sesyon. Ito ang unang hakbang upang mabigyang-linaw ang sakop ng dalawang barangay na sa maraming taon ay walang tiyak na dokumentong magbibigay patunay.

Ang pagdinig na ito ay sumasalamin sa matibay na paninindigan ng Sangguniang Bayan ng Morong sa pagsusulong ng isang maayos na pamamahala at makatarungang serbisyo para sa kapakanan ng ating mga Kababayan.

12/05/2026

Usapin hinggil sa mga Ambulant Vendors na nagtatayo ng Stalls sa tapat ng mga Beach Resort | Committee Hearing

Noong ika 6 ng Mayo, pinangunahan ni Kgg. Kathyleen Vicedo, Chairman on Tourism and Cultural Affairs ang isang Committee Hearing upang tugunan ang matagal nang isyu hinggil sa paglalagay ng mga ambulant vendor ng kanilang pansamantalang tindahan sa harapan ng mga beach resort at baybaying-dagat.

Sa talakayan, malinaw na napakinggan ang magkabilang panig, ang panawagan ng mga resort owners para sa kaayusan at pagprotekta sa kanilang karapatan sa ari-arian, at ang realidad ng mga vendor na umaasa sa araw-araw na kita para sa kanilang kabuhayan. Bagama’t may mga nauna nang hakbang na isinagawa sa antas ng barangay katulad ng pag-iikot at pakikipagdayalogo, lumitaw sa talakayan na nananatiling hamon ang epektibong pagpapatupad dahil sa kawalan ng malinaw at umiiral na ordinansa na magsisilbing matibay na batayan ng aksyon.

Binigyang-diin sa pagdinig ang pangangailangan ng isang balanseng solusyon, isang kaayusang gumagalang sa karapatan ng mga resort owners, kabilang ang kanilang Foreshore Lease, habang isinasaalang-alang pa rin ang kabuhayan ng mga ambulant vendors. Tinalakay rin ang mahalagang papel ng barangay sa pagpapatupad ng kaayusan, pati na ang pakikipag-ugnayan sa kapulisan kung kinakailangan.

Bilang konkretong hakbang, iminungkahi ng Sangguniang Bayan ang mas pinaigting na monitoring sa lugar, agarang aksyon ng barangay at ang pagbuo ng isang komprehensibong ordinansa na magtatakda ng malinaw na regulasyon kabilang ang pagtukoy ng angkop na lugar gaya ng mga bakanteng lote para sa mga vendor, upang maiwasan ang usapin sa ating mga baybayin.

06/05/2026

Pagdinig sa Sulat-Reklamo ni G. Dacula | Committee Hearing

Isinagawa noong ika-29 ng Abril ng Sangguniang Bayan, ang isang Committee Hearing kaugnay sa sulat-reklamo ni G. Dacula na tumatalakay sa usapin ng kasunduan sa pagbabayad at pag-aari ng lupa sa pagitan ng may-ari at mga kliyente nito.

Pinangunahan ang pagdinig ni Kgg. Ruben M. Pastelero, Committee Chairman on Housing and Land Utilization, kasama ang mga miyembro ng Sangguniang Bayan at katuwang ang kinatawan ng barangay. Layunin ng pagdinig na mabigyan ng malinaw na direksyon ang hindi pagkakaunawaan at maisulong ang isang makatarungan at maayos na kasunduan sa pamamagitan ng amicable settlement.

Sa talakayan, lumitaw ang ilang mahahalagang isyu kabilang ang hindi pagkakapareho ng interpretasyon sa naunang kasunduan, kakulangan sa pormal at notaryadong dokumento, usapin sa aktwal na sukat ng mga lupang sakop at ang kakayahan ng mga mamimili na makasunod sa itinakdang iskedyul ng pagbabayad. Binigyang-diin din ang kalagayan ng mga residente na karamihan ay umaasa lang sa hindi regular na kabuhayan na nakaapekto sa kanilang kakayahang makapaghulog nang buwanan.

Sa huli, nagkasundo ang magkabilang panig sa isang malinaw na balangkas ng kasunduan, ito ay ang pagbibigay ng paunang hulog na 15%, kasunod ang pagbabayad batay sa kakayahan ng bawat mamimili at ang obligasyong mabayaran nang buo ang lupa sa loob ng itinakdang dalawang taon. Napagkasunduan din na kung hindi matupad ang kabuuang bayad sa loob ng nasabing panahon, papasok ang mga kondisyon ng interes at posibleng forfeiture alinsunod sa kasunduan. Dagdag pa rito, ilalatag sa pinal na kasunduan ang mga probisyon hinggil sa pagsukat ng lupa, pagproseso ng titulo at iba pang legal na dokumento upang matiyak ang proteksyon ng parehong panig. Ipinakita ng pagdinig ang mahalagang papel ng Sangguniang Bayan bilang tagapamagitan, hindi lamang sa pagresolba ng alitan kundi sa paghahanap ng balanseng solusyon na isinasaalang-alang ang batas at tunay na kalagayan ng mamamayan.

Sa pamamagitan ng bukas na diyalogo at pagkakaisa, muli nating pinagtibay ang paninindigan na isulong ang mga solusyong makatao at makatarungan para sa kapakanan ng ating mga kababayan.

06/05/2026

Pagdinig sa Insidenteng kinasangkutan ng Jet Ski at Banana Boat sa Brgy. Nagbalayong

Noong ika-28 ng Abril, isinagawa ng Sangguniang Bayan ang isang Committee Hearing kaugnay sa insidenteng kinasangkutan ng jetski at banana boat sa Brgy. Nagbalayong noong April 11, 2026.

Pinangunahan ang pagdinig ni Kgg. Kathyleen Vicedo, kasama ang mga miyembro ng Sangguniang Bayan, kinatawan ng Philippine Coast Guard, ang complainant, jet ski operator at may-ari ng naturang water activity. Layunin ng pagdinig na linawin ang mga pangyayari, tukuyin ang pananagutan at maglatag ng mga hakbang upang maiwasan ang kahalintulad na insidente sa hinaharap.

Sa talakayan, inilahad ng complainant ang naranasang panganib dulot ng umano’y substandard na life vest, kakulangan sa agarang rescue response at kawalan ng maayos na communication system habang nasa gitnang dagat. Lumutang din ang mga isyu sa maintenance ng kagamitan, partikular ang kondisyon ng jetski na umano’y nawalan ng power sa gitna ng operasyon. Bilang tugon, inamin naman ng operator at ng may-ari ang kanilang pagkukulang at sila ay agad na humingi ng paumanhin, kasabay ng pangakong papalitan ang mga hindi angkop na safety equipment. Binigyang-diin naman ng Philippine Coast Guard ang mahigpit na pagsunod sa paggamit ng mga life jacket na may akreditasyon ng MARINA, gayundin ang kahalagahan ng regular na inspeksyon at pagsunod sa umiiral na safety standards.

Sa huli, naglatag ng malinaw na direktiba ang Sangguniang Bayan. Inobliga nila ang mga operator na tiyakin ang kahandaan at kaligtasan ng kanilang kagamitan bago mag-operate, magpatupad ng epektibong communication system para sa agarang responde at palitan ang lahat ng substandard na life vest. Inatasan din natin ang Philippine Coast Guard na magsagawa ng inspeksyon at magbigay ng kaukulang ulat sa Lokal na Pamahalaan. Mahigpit ding ipinabatid na ang hindi pagsunod sa mga itinakdang pamantayan ay maaaring magresulta sa hindi pagpapahintulot ng operasyon.

Sa kabuuan, ipinakita ng pagdinig ang seryosong paninindigan ng Sangguniang Bayan na pangalagaan ang kaligtasan ng mga turista at mapanatili ang tiwala sa turismo ng bayan. Isang malinaw na paalala na ang kaunlaran ay dapat laging kaakibat ng responsibilidad at mataas na pamantayan ng kaligtasan.

30/04/2026

Health and Sanitation Code of the Municipality of Morong | Committee Hearing

Isinagawa noong ika-27 ng Abril, 2026 ng Sangguniang Bayan ang isang Committee Hearing as a Whole kaugnay sa panukalang ordinansa na magtatatag ng Health and Sanitation Code of Morong na naglalayong maglatag ng komprehensibong polisiya para sa mas epektibong pangangalaga sa kalusugan ng mamamayan at kalinisan ng kapaligiran.

Pinangunahan ang pagdinig ni Kgg. Ricky Batoon Paguio, Committee Chairman on Health and Sanitation kasama ang mga miyembro ng Sangguniang Bayan. Dumalo rin si Mrs. Luz Morna, Sanitation Officer upang magbigay ng teknikal na kaalaman at mahahalagang rekomendasyon sa pagpapatibay ng nasabing panukala. Sa talakayan, binigyang-diin ang pangangailangang magkaroon ng isang pinag-isang Health and Sanitation Code na naaayon sa mga umiiral na pambansang batas, kabilang ang Local Government Code of 1991, Sanitation Code of the Philippines at iba pang kaugnay na batas sa kalusugan at kapaligiran. Layunin nitong palakasin ang pagpapatupad ng mga pamantayan sa sanitation sa lahat ng sektor mula sa mga tahanan, establisyemento, at pamilihan, hanggang sa mga coastal at tourism areas ng bayan.

Tampok din sa panukala ang mahigpit na regulasyon sa waste management, water at wastewater systems, food safety, disease prevention, at coastal protection, kabilang ang pangangalaga sa mga likas-yaman at ecosystem gaya ng mga dalampasigan at tirahan ng pawikan. Sa pamamagitan ng bukas at masusing deliberasyon, patuloy na isinusulong ng Sangguniang Bayan ang mga makabagong hakbang upang matiyak ang isang malinis, ligtas at maayos na kapaligiran. Ito ay isang pundasyon ng matatag na kalusugan at napapanatiling kaunlaran para sa bawat taga-Morong.

30/04/2026

Pagtalakay sa Status ng Sitio Minanga Reservation Area | Committee Hearing

Isinagawa noong ika-22 ng Abril, 2026 ng Sangguniang Bayan ang isang Committee Hearing as a Whole kaugnay sa kasalukuyang kalagayan ng Sitio Minanga Reservation Area sa Brgy. Mabayo, isang usapin na may malalim na implikasyon sa lupa, batas, at kapakanan ng mga naninirahan dito.

Pinangunahan ang pagdinig ni Kgg. Ruben M. Pastelero, Committee Chairman on Housing and Land Utilization kasama ang mga miyembro ng Sangguniang Bayan, katuwang ang mga kinatawan ng komunidad na sina Kapitan Jerry Bascon at samahan ng mga residente ng Minanga. Sa talakayan, inilahad na ang nasabing lugar ay saklaw ng isang Military Reservation Area sa ilalim ng umiiral na pambansang batas, kaya’t sa kasalukuyan ay hindi maaaring ipagkaloob ang hinihiling na reclassification ng lupa. Gayunman, malinaw na umusbong sa pagdinig ang mas malalim na usapin, ito ay ang pangangailangan na maprotektahan ang seguridad at kapakanan ng mga pamilyang matagal nang naninirahan sa lugar.
Ibinahagi rin ang mga hamon kaugnay sa kakulangan ng dokumento, hindi malinaw na hangganan ng nasasakupan at ang epekto ng mga umiiral na polisiya sa aktwal na kalagayan ng komunidad.

Binigyang-diin ng Kapulungan ang kahalagahan ng masusing beripikasyon ng legal na batayan, kabilang ang pagsusuri sa mga umiiral at naamyendahang batas, gayundin ang pangangailangan ng malinaw at opisyal na delineation ng boundaries.
Bilang hakbang pasulong, napagkasunduan ng Sangguniang Bayan na magsagawa ng karagdagang pag-aaral, kumuha ng mga opisyal na dokumento at mapa at pag-aralan ang posibilidad ng paghahain ng isang resolusyon na iaakyat sa pambansang pamahalaan upang tugunan ang nasabing usapin sa mas mataas na antas.

Sa kabila ng mga limitasyon sa legal na kapangyarihan, muling tiniyak ng Sangguniang Bayan ang kanilang paninindigan na patuloy na hahanapan ng makatarungan at makataong solusyon ang sitwasyon na may layuning mapangalagaan ang kapakanan ng bawat pamilya sa Sitio Minanga. Ang usaping ito ay hindi lamang tungkol sa lupa, ito ay tungkol sa tahanan, kabuhayan at kinabukasan ng ating mga kababayan.

Sangguniang Bayan ng Morong Bataan

03/06/2026

21/05/2026

21/05/2026

21/05/2026

13/05/2026

12/05/2026

06/05/2026

06/05/2026

30/04/2026

30/04/2026

Address

Website

Alerts

Shortcuts

Share

Category