19/07/2026
Habang papalapit ang BSK Elections, kaliwa't kanan na rin ang mga nagpapakilalang handang mamuno.
Sa mga naghahangad maging kinatawan ng kabataan: nawa'y hindi matapos sa kampanya ang inyong mga pangako. Ang tunay na pamumuno ay nasusukat hindi sa dami ng tarpaulin, liga, o social media posts, kundi sa kakayahang maglatag ng mga programang tumutugon sa tunay na pangangailangan ng kabataan.
Walang mali sa paglulunsad ng mga liga at palaro. Mahalaga ang sports sa paghubog ng disiplina, kalusugan, at pagkakaisa. Ngunit hindi rito nagtatapos ang mandato ng Sangguniang Kabataan.
Ang SK ay inaasahang magpatupad ng mga programang nakaangkla sa 17 Sustainable Development Goals (SDGs) at 10 Centers of Participation—mula sa edukasyon, kalusugan, kabuhayan, kalikasan, mental health, gender equality, disaster resilience, digital literacy, hanggang sa aktibong pakikilahok ng kabataan sa pamamahala.
Ang tanong ay hindi kung sino ang pinakasikat, kundi kung sino ang may malinaw na direksyon, may kakayahang makinig, at may tapang na harapin ang mga isyung madalas na hindi napapansin.
At para sa mga botante, huwag nating gawing sukatan ang kasikatan o iisang proyekto lamang. Maging mapanuri. Tanungin ang kanilang plataporma, alamin ang kanilang pananaw, at suriin kung paano nila isusulong ang kapakanan ng buong kabataan.
Ang SK ay hindi dapat maging samahan ng mga organizer ng liga lamang. Ito ay dapat maging institusyon ng tunay na representasyon, makabuluhang partisipasyon, at responsableng pamamahala.
