24/09/2026
شانگلہ: ڈی پی او اکرام اللہ پی ایس پی کی ضلع بھر کے ایس ڈی پی اوز اور ایس ایچ اوز کے ساتھ آن لائن میٹنگ
ڈی پی او شانگلہ اکرام اللہ پی ایس پی کی زیرِ صدارت ضلع بھر کے تمام ایس ڈی پی اوز اور ایس ایچ اوز کے ساتھ آن لائن میٹنگ کا انعقاد کیا گیا، جس میں ایس ایس پی انوسٹی گیشن شانگلہ سلیم امان اللہ خان، تمام ایس ڈی پی اوز اور ایس ایچ اوز نے شرکت کی۔
میٹنگ کے دوران ضلع میں امن و امان کی مجموعی صورتحال، سیکیورٹی انتظامات اور جاری پولیو مہم کے حوالے سے تفصیلی جائزہ لیا گیا۔
ڈی پی او شانگلہ اکرام اللہ پی ایس پی نے افسران کو ہائی الرٹ رہنے اور امن و امان کی صورتحال کو ہر صورت برقرار رکھنے کی ہدایات جاری کرتے ہوئے کہا کہ جمعہ کے روز تمام مساجد، عبادت گاہوں، اہم و حساس مقامات اور دیگر عوامی مقامات کی سیکیورٹی مزید مؤثر اور سخت بنائی جائے۔
انہوں نے ہدایت کی کہ شہریوں کے جان و مال کے تحفظ کو ہر صورت یقینی بنایا جائے، جبکہ پولیس تنصیبات، اہم سرکاری عمارات اور دیگر حساس مقامات کی سیکیورٹی کا ازسرِنو جائزہ لے کر مؤثر انتظامات یقینی بنائے جائیں۔
ڈی پی او شانگلہ نے ضلع بھر میں پولیو مہم کے دوران پرامن ماحول اور مؤثر سیکیورٹی انتظامات کو یقینی بنانے پر تمام افسران اور جوانوں کی کارکردگی کو سراہتے ہوئے انہیں شاباش دی اور آئندہ بھی اسی جذبے اور ذمہ داری کے ساتھ فرائض سرانجام دینے کی ہدایت کی۔
انہوں نے مزید کہا کہ عوام کے تحفظ اور ضلع میں امن و امان کا قیام پولیس کی اولین ترجیح ہے، اس سلسلے میں کسی قسم کی غفلت یا کوتاہی برداشت نہیں کی جائے گی۔
