Rescue 1122 Astore

13/09/2026

10/09/2026

🚨 پریس ریلیز | ریسکیو 1122 استور
داسخرم سے استور آنے والی ہائس کے بریک فیل، پکورہ کے مقام پر حادثہ
استور: داسخرم سے استور ہیڈکوارٹر آنے والی ہائس گاڑی کے اچانک بریک فیل ہونے کے باعث پکورہ کے مقام پر حادثہ پیش آیا۔
حادثے کے وقت گاڑی میں متعدد افراد سوار تھے۔ خوش قسمتی سے گاڑی میں سوار افراد معجزانہ طور پر محفوظ رہے، تاہم گاڑی کی چھت پر سوار تین افراد گرنے کے باعث معمولی زخمی ہوئے۔
حادثے کی اطلاع ملتے ہی ریسکیو 1122 استور کی ایمبولینس اور میڈیکل ٹیم فوری طور پر جائے حادثہ پر پہنچ گئی۔ ریسکیو اہلکاروں نے زخمیوں کو موقع پر ابتدائی طبی امداد فراہم کی۔
بعد ازاں زخمیوں کو مزید طبی معائنے اور علاج کے لیے DHQ ہسپتال استور منتقل کر دیا گیا۔
ریسکیو 1122 استور کی بروقت کارروائی کے باعث زخمیوں کو فوری طبی امداد فراہم کی گئی۔ شہریوں سے اپیل ہے کہ سفر کے دوران خصوصاً پہاڑی علاقوں میں گاڑی کی بریک، ٹائر اور دیگر اہم فنی حصوں کی مکمل جانچ یقینی بنائیں تاکہ ایسے حادثات سے بچا جا سکے۔
ریسکیو 1122 استور
بروقت امداد، محفوظ زندگی
📞 ایمرجنسی: 1122

06/09/2026

یومِ دفاع پاکستان کے موقع پر پیغام

6 ستمبر ہمیں اپنے ان بہادر سپوتوں کی قربانیوں کی یاد دلاتا ہے جنہوں نے وطن عزیز کے دفاع کے لیے اپنی جانوں کا نذرانہ پیش کیا۔ ان کی قربانیاں ہمارے لیے عزم، حوصلے اور حب الوطنی کی روشن مثال ہیں۔

ریسکیو 1122 گلگت بلتستان کے اہلکار بھی عوام کی جان و مال کے تحفظ کے لیے ہر وقت خدمت اور قربانی کے جذبے کے ساتھ میدانِ عمل میں موجود رہتے ہیں۔ قدرتی آفات ہوں، حادثات یا دیگر ہنگامی حالات، ہمارے ریسکیورز اپنی جان کی پروا کیے بغیر دوسروں کی جان بچانے کے لیے آگے بڑھتے ہیں۔

آج کے دن ہم شہدائے وطن کو خراجِ عقیدت پیش کرتے ہیں اور اس عزم کی تجدید کرتے ہیں کہ پاکستان کی سلامتی، استحکام اور عوام کی خدمت کے لیے اپنی ذمہ داریاں ایمانداری اور بھرپور جذبے کے ساتھ ادا کرتے رہیں گے۔

پاکستان زندہ باد

میڈیا سیل ریسکیو 1122 استور

02/09/2026

🚒 ریسکیو 1122 استور | فائر سیفٹی ٹریننگ
استور: ریسکیو 1122 استور کی جانب سے نادرا آفس استور اور گوری کوٹ میں تعینات اسٹاف کے لیے آگ سے بچاؤ، فائر سیفٹی اور ہنگامی صورتحال سے مؤثر انداز میں نمٹنے کے حوالے سے خصوصی تربیتی سیشن کا انعقاد کیا گیا۔
ڈسٹرکٹ انچارج انجینئر شباب کی خصوصی ہدایت پر ریسکیو 1122 استور کی ٹریننگ ونگ کی ٹیم نے شرکاء کو آگ لگنے کی وجوہات، مختلف اقسام کی آگ، ابتدائی مرحلے میں آگ پر قابو پانے کے طریقہ کار اور ہنگامی حالات میں محفوظ و بروقت اقدامات کے حوالے سے تفصیلی آگاہی فراہم کی۔
تربیتی سیشن کے دوران شرکاء کو فائر ایکسٹنگوشرز کے درست اور محفوظ استعمال، آگ لگنے کی صورت میں فوری ردِعمل، محفوظ انخلا (Evacuation)، ابتدائی حفاظتی اقدامات اور آگ پر قابو پانے کے عملی طریقوں سے آگاہ کیا گیا، جبکہ عملی مشقیں بھی کروائی گئیں۔
اس تربیتی پروگرام کا مقصد نادرا اسٹاف میں فائر سیفٹی کے حوالے سے شعور اجاگر کرنا، ہنگامی صورتحال میں گھبراہٹ سے بچتے ہوئے بروقت اور مؤثر اقدامات کی صلاحیت پیدا کرنا اور قیمتی انسانی جانوں و املاک کے تحفظ کو یقینی بنانے میں معاونت فراہم کرنا تھا۔
ریسکیو 1122 استور کی جانب سے سرکاری و نجی اداروں کے اسٹاف کو ہنگامی حالات سے نمٹنے کے لیے تربیت فراہم کرنے کا سلسلہ آئندہ بھی جاری رکھا جائے گا۔
میڈیا سیل ریسکیو 1122 استور

24/08/2026

🚨 ریسکیو الرٹ | استور
استور: آج مورخہ 24 اگست 2026 کو ڈپٹی کمشنر استور نیلم علی نے ریسکیو 1122 استور کی زیرِ تعمیر نئی عمارت کا دورہ کیا اور جاری تعمیراتی کام کا تفصیلی معائنہ کیا۔
اس موقع پر محکمہ مواصلات و تعمیرات (Communication & Works Department) کے متعلقہ افسران، ریسکیو 1122 کے ذمہ داران اور تعمیراتی کام سے وابستہ ٹھیکیدار بھی موجود تھے۔
ڈپٹی کمشنر استور نے متعلقہ محکمہ مواصلات و تعمیرات (C&W) کے افسران اور ٹھیکیدار کو ہدایت کی کہ تعمیراتی کام کو مقررہ معیار کے مطابق تیزی سے مکمل کیا جائے اور عمارت کو جلد از جلد مکمل کرکے ریسکیو 1122 استور کے حوالے کیا جائے تاکہ ریسکیو اہلکاروں کو بہتر سہولیات میسر آ سکیں اور ضلع استور میں ہنگامی خدمات کو مزید مؤثر بنایا جا سکے۔
انہوں نے تعمیراتی کام میں معیار، شفافیت اور بروقت تکمیل کو یقینی بنانے پر بھی زور دیا۔

24/08/2026

ریسکیو الرٹ | استور
استور: شُگرٹ گاؤں میں عبدالحلیم کے گھر میں اچانک آگ بھڑک اٹھی۔ آگ لگنے کی اطلاع ملتے ہی ریسکیو 1122 استور کی ٹیم فوری طور پر جائے وقوعہ کی جانب روانہ ہوئی اور موقع پر پہنچ کر امدادی کارروائیوں کا آغاز کیا۔
ریسکیو 1122 کے اہلکاروں نے مقامی لوگوں کے تعاون سے بھرپور کوشش کرتے ہوئے آگ پر قابو پایا اور اسے مزید پھیلنے سے روک لیا۔ بروقت کارروائی کے باعث قریبی مکانات اور دیگر املاک کو آگ کی لپیٹ میں آنے سے محفوظ رکھا گیا۔
ریسکیو 1122 اور مقامی افراد کی بروقت اور مشترکہ کوششوں سے ایک بڑے نقصان کا خدشہ ٹل گیا۔ واقعے میں کسی جانی نقصان کی اطلاع نہیں ملی، جبکہ آگ لگنے کی وجہ معلوم کرنے کے لیے مزید معلومات حاصل کی جا رہی ہیں۔
میڈیا سیل ریسکیو 1122 استور

19/08/2026

گاؤں فینہ استور میں کمیونٹی موک ڈرل کا انعقاد
استور: ضلع استور کے نواحی گاؤں فینہ میں ECARE TIAES پراجیکٹ کے زیرِ اہتمام کمیونٹی کی ہنگامی حالات اور قدرتی آفات سے نمٹنے کی صلاحیت کو مزید مضبوط بنانے کے لیے ایک جامع اور کامیاب موک ڈرل کا انعقاد کیا گیا۔
یہ سرگرمی اقوام متحدہ کے ترقیاتی پروگرام (UNDP) کے تعاون سے، جبکہ گلگت بلتستان رورل سپورٹ پروگرام (GBRSP) کی شراکت سے کمیونٹی میں ڈیزاسٹر رسک ریڈکشن، ایمرجنسی رسپانس اور محفوظ و لچکدار کمیونٹی کے فروغ کے لیے جاری اقدامات کا حصہ تھی۔
موک ڈرل کے دوران ریسکیو 1122 استور کے میڈیکل انسٹرکٹر میر عالم نے کمیونٹی ممبران کو ہنگامی صورتحال میں فوری اور مؤثر ردِعمل، ابتدائی طبی امداد، محفوظ انخلاء اور بنیادی زندگی بچانے کی تکنیکوں کے حوالے سے عملی تربیت فراہم کی۔ شرکاء کو مختلف ہنگامی صورتحال میں زخمی افراد کو ابتدائی طبی امداد دینے، انہیں محفوظ مقام تک منتقل کرنے اور ریسکیو اداروں کے ساتھ مؤثر رابطہ کاری کے طریقہ کار سے بھی آگاہ کیا گیا۔
موک ڈرل کا بنیادی مقصد مقامی آبادی کو کسی بھی ہنگامی صورتحال، قدرتی آفت یا حادثے کی صورت میں بروقت، محفوظ اور مؤثر انداز میں ردِعمل دینے کے لیے عملی طور پر تیار کرنا تھا۔ سرگرمی کے دوران محفوظ انخلاء، متاثرہ افراد کو محفوظ مقام تک منتقل کرنے، ابتدائی طبی امداد اور بنیادی زندگی بچانے کی تکنیکوں کا عملی مظاہرہ بھی کیا گیا۔
کمیونٹی ممبران نے موک ڈرل میں بھرپور اور فعال شرکت کی۔ عملی مشقوں کے ذریعے ہنگامی حالات میں ٹیم ورک، باہمی رابطہ کاری، فوری فیصلہ سازی اور منظم امدادی کارروائیوں کی اہمیت کو اجاگر کیا گیا۔ شرکاء کو بتایا گیا کہ کسی بھی قدرتی آفت یا ہنگامی صورتحال کے دوران گھبراہٹ کے بجائے منظم انداز میں فوری اقدامات، محفوظ انخلاء اور ایک دوسرے کی بروقت مدد سے جانی و مالی نقصان کو کم کیا جا سکتا ہے۔
اس موقع پر کمیونٹی کو قدرتی آفات کے ممکنہ خطرات، ابتدائی ردِعمل، محفوظ انخلاء اور مقامی سطح پر دستیاب وسائل کو مؤثر انداز میں استعمال کرنے کے حوالے سے بھی آگاہی فراہم کی گئی۔ بالخصوص پہاڑی، دور دراز اور قدرتی آفات کے خطرات سے دوچار علاقوں میں اس نوعیت کی عملی تربیت کمیونٹی کی استعدادِ کار اور Resilience بڑھانے میں اہم کردار ادا کرتی ہے۔
موک ڈرل کے ذریعے کمیونٹی ممبران، متعلقہ اداروں اور دیگر اسٹیک ہولڈرز کے درمیان رابطہ کاری کو مزید بہتر بنانے کا عملی موقع بھی فراہم ہوا۔ شرکاء نے ہنگامی حالات میں اپنی ذمہ داریوں اور ممکنہ کردار کے بارے میں آگاہی حاصل کی، تاکہ کسی بھی ناگہانی صورتحال میں امدادی اداروں کے پہنچنے سے قبل مقامی سطح پر ابتدائی اور مؤثر اقدامات کیے جا سکیں۔
ECARE TIAES پراجیکٹ کے تحت اس نوعیت کی سرگرمیوں کا مقصد محض عوام میں آگاہی پیدا کرنا نہیں بلکہ مقامی آبادی کو عملی طور پر اس قابل بنانا ہے کہ وہ قدرتی آفات اور دیگر ہنگامی حالات میں مؤثر ابتدائی ردِعمل دے سکیں اور ریسکیو سمیت دیگر متعلقہ اداروں کے ساتھ بہتر انداز میں تعاون کر سکیں۔
گاؤں فینہ میں منعقد ہونے والی یہ موک ڈرل ایک محفوظ، باخبر، منظم اور قدرتی آفات کے مقابلے میں زیادہ مضبوط و لچکدار کمیونٹی کی تشکیل کی جانب ایک اہم قدم ہے۔ ایسے اقدامات بالخصوص گلگت بلتستان جیسے پہاڑی اور قدرتی آفات کے خطرات سے دوچار خطے میں انسانی جانوں کے تحفظ، ہنگامی صورتحال سے نمٹنے کی تیاری اور مقامی آبادی کی استعدادِ کار بڑھانے میں نمایاں کردار ادا کرتے ہیں۔