07/03/2026
*محکمہ مواصلات و تعمیرات عامہ حکومت گلگت بلتستان*
*دیامر استور ڈویژن کے چیف انجینئر وزیر غلام رسول کی ملازمت سے سبکدوشی کے موقع پر ان کے اعزاز میں ایک پُروقار الوداعی تقریب کا انعقاد کیا گیا۔یہ تقریب دیامر استور ڈویژن کی جانب سے منعقد کی گئی۔*
الو داعی تقریب میں صوبائی سیکریٹری برائے محکمہ مواصلات و تعمیراتِ عامہ سجاد حیدر، ایڈیشنل سیکریٹری آمین اللہ غزنوی، چیف انجینئر گلگت ڈویژن سمیت دیگر اعلیٰ افسران اور متعلقہ عملے نے شرکت کی اور انجینئر وزیر غلام رسول کی طویل اور قابلِ قدر خدمات کو خراجِ تحسین پیش کیا۔
اس موقع پر صوبائی سیکریٹری برائے محکمہ مواصلات و تعمیراتِ عامہ نے انجینئر وزیر غلام رسول کی خدمات کو سراہتے ہوئے کہا کہ انہوں نے اپنی پیشہ ورانہ زندگی کے دوران انتہائی دیانتداری، محنت اور ذمہ داری کے ساتھ فرائض سرانجام دیے۔ انہوں نے کہا کہ انجینئر وزیر غلام رسول کا شمار محکمہ کے اُن قابل اور تجربہ کار افسران میں ہوتا ہے جنہوں نے ہمیشہ ادارے کی بہتری اور عوامی فلاح کو ترجیح دی۔
صوبائی سیکریٹری نے کہا کہ ایسے مخلص اور محنتی افسران کسی بھی ادارے کا قیمتی اثاثہ ہوتے ہیں۔ اگرچہ آج وہ سرکاری ملازمت سے سبکدوش ہو رہے ہیں، تاہم ان کی خدمات اور تجربہ ہمیشہ یاد رکھا جائے گا۔ انہوں نے انجینئر وزیر غلام رسول کی آئندہ زندگی کے لیے نیک تمناؤں کا اظہار کرتے ہوئے دعا کی کہ اللہ تعالیٰ انہیں صحت، خوشحالی اور کامیابی سے ہم ہنکار کریں ۔
بعد ازاں دیامر استور ڈویژن کی جانب سے سپرنٹنڈنٹ انجینئر دیامر استور ڈویژن انجینئر عبدالہادی نے انجینئر وزیر غلام رسول کی خدمات کو خراجِ تحسین پیش کرتے ہوئےانہوں نے کہا
کہ بطور چیف انجینئر دیا میر استور ڈویژن انجینئر وزیر غلام رسول نے دورانِ ملازمت ہمیشہ اپنے ماتحت عملے کا خاص خیال رکھا اور ان کے مسائل کو ترجیحی بنیادوں پر حل کرنے کی کوشش کی۔ وہ نہ صرف ایک قابل اور ذمہ دار افسر تھے بلکہ ایک مخلص اور شفیق رہنما بھی تھے، جنہوں نے اپنے عملے کی رہنمائی اور حوصلہ افزائی کے ذریعے محکمہ میں مثبت اور دوستانہ ماحول قائم رکھا۔ ان کی یہی خوبی انہیں اپنے ساتھیوں اور عملے کے درمیان ایک محترم اور قابلِ قدر شخصیت بناتی ہے۔
انہوں نے مزید کہا کہ محکمہ مواصلات و تعمیراتِ عامہ میں اہم منصوبوں کی تکمیل میں نمایاں کردار ادا کیا بلکہ دیامر اور استور کے علاقوں میں انفراسٹرکچر کی بہتری اور ترقی کے لیے بھی قابلِ قدر خدمات سرانجام دیں۔ ان کی قیادت اور تجربے سے محکمہ کو ہمیشہ فائدہ پہنچا۔
تقریب کے دوران افسران اور ساتھیوں نے انجینئر وزیر غلام رسول کے ساتھ گزارے گئے پیشہ ورانہ لمحات اور ان کی خوش اخلاقی، رہنمائی اور خدمتِ خلق کے جذبے کو بھی یاد کیا۔ اس موقع پر انہیں یادگاری شیلڈ اور تحائف پیش کیے گئے جبکہ شرکاء نے ان کی آئندہ زندگی کے لیے نیک خواہشات کا اظہار کیا۔
اپنے خطاب میں انجینئر وزیر غلام رسول نے تقریب کے انعقاد پر محکمہ کے افسران اور ساتھیوں کا شکریہ ادا کرتے ہوئے کہا کہ انہوں نے اپنی پوری ملازمت کے دوران دیانتداری اور خلوصِ نیت کے ساتھ ذمہ داریاں نبھانے کی کوشش کی۔ انہوں نے کہا کہ وہ اپنے ساتھیوں کی محبت اور تعاون کو ہمیشہ یاد رکھیں گے۔
تقریب کے اختتام پر دیامر استور ڈویژن کی جانب سے انجینئر وزیر غلام رسول کو عزت و احترام کے ساتھ ثقافتی ٹوپی پہنائی گئی اور انہیں یادگاری تحفہ پیش کیا گیا۔ اس موقع پر شرکاء نے ان کی خدمات کو سراہتے ہوئے نیک تمناؤں کا اظہار کیا اور ان کی صحت، خوشحالی اور کامیاب زندگی کے لیے دعا کی۔ تقریب خوشگوار ماحول میں اختتام پذیر ہوئی جہاں افسران اور عملے نے انجینئر وزیر غلام رسول کو پرتپاک انداز میں الوداع کرتے ہوئے انہیں عزت و احترام کے ساتھ رخصت کیا۔
