09/05/2026
Prince Karim Aga Khan IV کا گلگت بلتستان کی تعمیر و ترقی میں کردار
گلگت بلتستان آج پاکستان کے اُن چند خطّوں میں شمار ہوتا ہے جہاں تعلیم، صحت، سماجی شعور اور سماجی ترقی کے میدان میں نمایاں بہتری دیکھنے کو ملتی ہے۔ جب انسان بلوچستان کے دور دراز اضلاع، جنوبی پنجاب، اندرونِ سندھ یا خیبرپختونخوا کے پسماندہ علاقوں کا سفر کرتا ہے تو اُسے شدت سے احساس ہوتا ہے کہ گلگت بلتستان کے عوام پر حضرت پرنس کریم آغا خان کی خدمات کتنی عظیم نعمت ثابت ہوئیں۔
یہ وہ وقت تھا جب گلگت بلتستان کے بیشتر علاقوں میں نہ معیاری تعلیم موجود تھی، نہ صحت کی بنیادی سہولیات، نہ خواتین اور بچوں کی صحت کے بارے میں شعور، اور نہ ہی زراعت و معیشت کے جدید طریقوں کا علم۔ ایسے حالات میں حضرت پرنس کریم آغا خان نے اس خطے کے عوام کا ہاتھ تھاما اور ترقی کا ایک ایسا سفر شروع کیا جس کے اثرات آج پوری دنیا دیکھ رہی ہے۔
تعلیم کے میدان میں آغا خان کے اداروں نے گلگت بلتستان میں ایک خاموش انقلاب برپا کیا۔ دور افتادہ دیہاتوں میں اسکول قائم کیے گئے، بچیوں کی تعلیم کو فروغ دیا گیا، اور نوجوانوں کو جدید دنیا کے تقاضوں سے ہم آہنگ کرنے کی کوشش کی گئی۔ آج گلگت بلتستان میں شرحِ خواندگی پاکستان کے کئی دیگر صوبوں سے بہتر ہے، اور اس کامیابی کا بڑا سہرا آغا خان ترقیاتی نیٹ ورک اور اُس وژن کو جاتا ہے جو حضرت پرنس کریم آغا خان نے دہائیوں پہلے پیش کیا۔
صحت کے شعبے میں بھی اُن کی خدمات ناقابلِ فراموش ہیں۔ انیس سو نوّے کی دہائی میں جب ہمارے علاقوں میں گلہڑ جیسی بیماری عام تھی، تب آغا خان ہیلتھ سروسز نے عوام میں آئیوڈین ملا نمک استعمال کرنے کا شعور پیدا کیا اور صحت کی بنیادی سہولیات فراہم کیں۔ ماں اور بچے کی صحت کے لیے قائم کیے گئے چھوٹے چھوٹے مراکزِ صحت نے پورے خطے میں ایک مثبت انقلاب برپا کیا۔ آج بھی گلگت بلتستان سے گلہڑ کے خاتمے کی مثال عوامی صحت کی تعلیم اور مطالعات میں دی جاتی ہے، جو اس بات کا ثبوت ہے کہ بروقت منصوبہ بندی، عوامی شعور اور مؤثر قیادت کس طرح ایک بڑے صحت کے مسئلے کو ختم کر سکتی ہے۔
اسی طرح زراعت، دیہی ترقی اور مقامی معیشت کو مضبوط بنانے کے لیے بھی بے شمار منصوبے شروع کیے گئے۔ لوگوں کو صرف امداد نہیں دی گئی بلکہ خود انحصاری، محنت اور جدید طرزِ زندگی کا شعور دیا گیا۔ یہی وجہ ہے کہ آج گلگت بلتستان کے نوجوان دنیا بھر میں اپنی صلاحیتوں کا لوہا منوا رہے ہیں۔
جب میں نے بلوچستان کے مختلف اضلاع کا دورہ کیا تو مجھے شدت سے احساس ہوا کہ گلگت بلتستان کے عوام کے لیے حضرت پرنس کریم آغا خان کی خدمات کتنی بڑی رحمت تھیں۔ آج بھی پاکستان کے کئی پسماندہ علاقے اُن بنیادی سہولیات سے محروم ہیں جو گلگت بلتستان میں دہائیوں پہلے متعارف کروائی جا چکی تھیں۔ اگر اُس وقت یہ وژن اور یہ قیادت ہمیں نہ ملتی تو شاید ہم بھی آج ترقی کی دوڑ میں بہت پیچھے ہوتے۔
موجودہ دور مصنوعی ذہانت اور جدید ٹیکنالوجی کا دور ہے۔ ایسے وقت میں امید کی جا رہی ہے کہ Prince Rahim Aga Khan اپنی امامت کے بعد پہلی مرتبہ گلگت بلتستان کا دورہ کر رہے ہیں، اور یہ دورہ آنے والے وقت میں گلگت بلتستان کے لیے ترقی، تعلیم، جدید ٹیکنالوجی اور نوجوانوں کے روشن مستقبل کے ایک نئے دور کا آغاز ثابت ہو سکتا ہے۔ جس طرح ماضی میں اس امامت نے علم، صحت اور ترقی کے دروازے کھولے، اسی طرح مستقبل میں بھی یہ خطہ شعور، ترقی اور خوشحالی کی نئی مثال بن سکتا ہے۔
گلگت بلتستان کے عوام کو چاہیے کہ وہ اپنے محسنوں کی خدمات کو یاد رکھیں، اتحاد، تعلیم اور ترقی کے سفر کو جاری رکھیں، اور آنے والی نسلوں کے لیے ایک روشن، باوقار اور ترقی یافتہ معاشرہ تعمیر کریں۔
