Dr. Nisar Ahmad Cheema

25/09/2026

سابق رکنِ اسمبلی اکمل سیف چٹھہ کے ڈیرے پر پولیس کے گھیراؤ کی خبر انتہائی تشویش ناک ہے۔ تحصیل وزیرآباد میں سیاسی اختلافات کے باوجود ایسی کارروائیوں کی روایت نہیں رہی۔ یہ سوال اپنی جگہ موجود ہے کہ وہ کون سے عوامل ہیں جن کے باعث وزیرآباد میں یہ نئی صورتِ حال سامنے آئی؟

ہم اس واقعے کی شدید الفاظ میں مذمت کرتے ہیں اور اس واقعے پر دلی دکھ اور افسوس کا اظہار کرتے ہیں۔

ڈاکٹر نثار احمد چیمہ
سابق رکنِ قومی اسمبلی

17/09/2026

ہم کس طرح کی روایات قائم کر رہے ہیں؟ خیبر پختون خوا کے وزیر اعلٰی کے پنجاب کے حالیہ دورے کے دوران ان کے ساتھ اور مختلف شہروں میں ان کے میزبانوں کے ساتھ جو سلوک کیا گیا وہ افسوسناک بھی ہے اور شرمناک بھی - سہیل آفریدی صاحب اور ان کے ساتھیوں نے اس دورے کے دوران نہ تو کہیں قانون ہاتھ میں لیا اور نہ ہی کوئی ایسا کام کیا جس سے امن عامہ کو کوئی خطرہ درپیش ہو سکتا تھا مگر اس کے باوجود نہ صرف ایک مہمان وزیر اعلٰی کی نقل و حرکت کو محدود کرنے کی ہر ممکن کوشش کی گئی بلکہ سیالکوٹ اور میرے شہر وزیرآباد میں ان کے میزبانوں کو ہراساں کرنے اور ان کے گھروں میں گھس کر توڑ پھوڑ اور لوٹ مار کرنے کی مذموم کاروائیاں بھی کی گئیں -اور جب اس پہ بھی تسلی نہیں ہوئی تو پی ٹی آئی سے وابستہ درجنوں افراد جن میں خواتین بھی شامل ہیں ، کے خلاف سو فیصد جھوٹی ایف آئی آر بھی کاٹ دی گئی - ایف آئی آر کاٹنے والے بھی یہ اچھی طرح جانتے ہیں کہ پی ٹی آئی کے جن افراد کے خلاف یہ جھوٹا مقدمہ درج کیا گیا ہے ان میں سے بیشتر نامزدگان تو موقع پر بلکہ وزیرآباد میں ہی موجود نہ تھے - پنجاب کا کلچر تو رواداری ، فراخدلی اور مہمان نوازی سے عبارت ہوا کرتا تھا ، یہ کون لوگ ہیں جو اس طرح کی شرمناک حرکتیں کرکے پنجاب اور اہل پنجاب کے لئے رسوائی اور جگ ہنسائی کا باعث بن رہے ہیں ؟

11/09/2026

محترم محمود بشیر ورک صاحب کے انتقال پر دلی افسوس اور گہرے رنج کا اظہار کرتے ہیں۔ مرحوم کے ساتھ ہمارے دیرینہ اور نہایت اچھے تعلقات تھے، وہ ہمارے لیے بھائیوں جیسے دوست تھے۔ ان کی وفات ہمارے لیے ایک ذاتی صدمہ ہے۔ اللہ تعالیٰ مرحوم کو جوارِ رحمت میں اعلیٰ مقام عطا فرمائے اور لواحقین کو صبرِ جمیل دے۔ آمین۔

26/08/2026

21/08/2026

وزیرآباد کے غیور عوام نے ہمیں چار مرتبہ اپنا نمائندہ منتخب کر کے جو اعتماد دیا ہے، ہم اس شہر کے لوگوں کو کسی کے رحم و کرم پر نہیں چھوڑ سکتے۔ وزیرآباد کو نہ کبھی لاوارث چھوڑا ہے، نہ چھوڑیں گے۔

03/08/2026

ڈاکٹر نثار احمد چیمہ صاحب کی گکھڑ آمد
رانا گوھر نذیر (سابقہ کونسلر) کی وفات پر ان کے بھائی رانا طاھر نذیر اور دیگر عزیز واقارب سے تعزیت اور مرحوم کی مغفرت کی دعا کی۔

04/06/2026

چیمہ برادران کی کٹھوہرکلاں میں اپنے ڈیرہ پر دوستوں کے ساتھ ملاقات

03/06/2026

ڈاکٹر نثار احمد چیمہ نے کوٹ بیلا میں دریا کے المناک حادثے سے متاثرہ خاندان کے لواحقین سے ملاقات کی اور ان کے غم میں شریک ہوتے ہوئے اظہارِ تعزیت کیا۔ اس موقع پر انہوں نے ریسکیو 1122 کی ان ٹیموں کی خدمات کو خراجِ تحسین پیش کیا جو لاپتہ افراد کی تلاش اور ڈیڈ باڈیز کی برآمدگی کے لیے مسلسل امدادی کارروائیوں میں مصروف ہیں

01/06/2026

میں ضلع وزیرآباد اور گوجرانوالہ کے ان ہزاروں افراد کا شکر گزار ہوں جنہوں نے مجھ سے رابطہ کر کے سیاسی وابستگی سے بالاتر ہو کر ایمن آباد سے گکھڑ تک میٹرو بس کے غیر ضروری اور انتہائی مہنگے منصوبے (جسکے اخراجات کا تخمینہ بعض اطلاعات کے مطابق 100 ارب روپے تک پہنچ چکا ہے) کے حوالے سے میرے اس واضح مؤقف کی تائید کی کہ
میٹرو بس کے منصوبے (جس کا نہ کبھی عوام نے مطالبہ کیا تھا اور نہ ان کے نمائندوں نے) کی بجائے کامونکی سے وزیرآباد تک جی ٹی روڈ کی دونوں سائیڈوں پر ایک ایک لین کا اضافہ کر کے اسے کشادہ کر دیا جاتا اور اس روٹ پہ اور اس کے ساتھ ساتھ وزیرآباد - رسول نگر اور علی پور - گوجرانوالہ روٹ پر چلنے والی گرین الیکٹرک بسوں کی تعداد میں چند درجن بسوں کا اضافہ کر دیا جاتا - علاوہ ازیں گکھڑ میں جی ٹی روڈ پر فلائی اوور بنایا جاتا جس کا پی ڈی ایم کی گورنمنٹ کے دوران میرے مطالبے پر فیصلہ بھی ہو چکا تھا اور اس کی فیزیبلیٹی رپورٹ بھی بن چکی تھی - مگر بدقسمتی سے اس بہترین حل کی بجائے اس غریب ملک کے عوام کا تقریباً 100 ارب روپیہ میٹرو بس کے غیر ضروری منصوبے کی نذر کیا جا رہا ہے جب کہ سو ارب روپے سے تو عوامی مفاد کے بیشمار منصوبے شروع کرکے انہیں پائہ تکمیل تک پہنچایا جا سکتا تھا مثلاً
* گوجرانوالہ اور وزیرآباد میں دو نئی یونیورسٹیاں بنائی جا سکتی تھیں
* گوجرانوالہ اور وزیرآباد کے اضلاع میں لڑکوں اور لڑکیوں کے کتنے ہی نئے سکول اور کالج بن سکتے تھے
* گوجرانوالہ میں ایک اعلٰی معیار کا کینسر ہسپتال قائم ہو سکتا تھا
* گوجرانوالہ اور وزیرآباد میں دو چلڈرن ہسپتال بن سکتے تھے
* وزیرآباد کے تحصیل ہیڈکوارٹر ہسپتال کو اپ گریڈ کرکے ڈسٹرکٹ ہیڈ کوارٹر ہسپتال بنایا جا سکتا تھا
* گکھڑ اور علی پور چٹھہ میں تحصیل ہیڈکوارٹر لیول کے دو نئے ہسپتال بن سکتے تھے
* گوجرانوالہ اور وزیرآباد کی دیہی یونین کونسلوں میں قائم سرکاری ہسپتالوں (BHUs) میں سٹاف اور دیگر سہولتوں میں اضافہ کرکے ان ہسپتالوں کو چوبیس گھنٹے فعال بنایا جا سکتا تھا جس سے گوجرانوالہ اور وزیرآباد کی لاکھوں پہ مشتمل دیہی آبادی کو اپنے گھروں کے قریب چوبیس گھنٹے بہتر طبی سہولتیں میسر آ سکتی تھیں
* 100 ارب روپے میں تو ضلع وزیرآباد اور گوجرانوالہ کے ایک لاکھ بیروزگار نوجوانوں کو دس دس لاکھ روپے قرض حسنہ دے کر انہیں اپنے پاؤں پر کھڑا کر کے ایک لاکھ خاندانوں کی کفالت کا ذریعہ بنایا جا سکتا تھا -
مگر یہ سب کچھ کرنے کی بجائے قوم کا سو ارب روپیہ میٹرو بس کے غیر ضروری منصوبے پہ لگا دینا افسوسناک بھی ہے اور حیران کن بھی -
اس صورت حال میں میری مسلم لیگ ن کے قائد محترم میاں نواز شریف صاحب اور وزیر اعلٰی پنجاب محترمہ مریم نواز صاحبہ سے گزارش ہے کہ وہ ذاتی طور پر اس منصوبے کا جائزہ لیں اور قابل اعتماد ذرائع اور غیر جانبدار اور مستند ایجنسیوں کے ذریعے اس منصوبے کے بارے میں یہاں کے عام لوگوں سے ، دکانداروں سے ، تاجروں سے بلکہ ہر شعبہ زندگی سے تعلق رکھنے والے افراد سے رائے لیں اور اس معاملے میں ایک شفاف سروے کروائیں تا کہ انہیں اندازہ ہو کہ گوجرانوالہ اور وزیرآباد کے عوام اور بالخصوص ایمن آباد سے گکھڑ تک تیس بتیس کلومیٹر کے اس روٹ پر جی ٹی روڈ کے دونوں طرف رہنے والے اور کاروبار کرنے والے لوگوں میں سے نوے فیصد سے زیادہ افراد اس انتہائی مہنگے منصوبے کو بالکل غلط ، غیر ضروری اور ناپسندیدہ قرار دے رہے ہیں - اب بھی وقت ہے کہ اس غلط اور غیر ضروری منصوبے پر نظر ثانی کی جائے - ایمن آباد سے گکھڑ تک ٹھیکیداروں نے جی ٹی روڈ پر بغیر مناسب منصوبہ بندی اور متبادل رستوں کے جو توڑ پھوڑ اور اکھاڑ پچھاڑ کی ہے (جس کی وجہ سے نہ صرف اس رستے پہ سفر کرنے والے لوگ شدید مشکلات اور اذیت کا شکار ہیں بلکہ یہاں آئے روز حادثات کی وجہ سے قیمتی جانوں کا ضیاع بھی ہو رہا ہے) یا کنٹریکٹرز نےاب تک اس منصوبے پر جو بھی کام کیا ہے اس کے اخراجات ابھی کروڑوں میں ہیں اربوں میں نہیں - اگر ٹھیکیدار ان اخراجات کو بہت بڑھا چڑھا کر بھی دکھائیں تب بھی اب تک کے کل اخراجات زیادہ سے زیادہ ایک ارب روپے تک ہی ہوں گے - میری دردمندانہ اپیل ہے کہ متعلقہ کنٹریکٹرز کو ایک ارب روپیہ دے کر اس غریب اور مقروض قوم کے 99 ارب روپے بچا لئے جائیں - ابھی وقت ہے کہ اس انتہائی مہنگے ، غلط اور غیر ضروری منصوبے کو نہ صرف منسوخ کیا جائے بلکہ اس بات کا بھی پتہ چلایا جائے ک کن لوگوں نے محترمہ وزیراعلٰی کو misguide کر کے ان سے اس انتہائی مہنگے اور غیر ضروری منصوبے کی منظوری لی ، یہ پتہ کرنا بھی ضروری ہے کہ وزیر اعلٰی صاحبہ کو misguide کرنے والوں میں کوئی کمیشن مافیا تو نہیں جس نے اس منصوبے میں سے اربوں روپے کمیشن لینے کے لئے اس غریب اور مقروض قوم کا 100 ارب روپیہ برباد کرنے کا پروگرام بھی بنا لیا اور وزیراعلٰی سے اس کی منظوری بھی لے لی ، ایسے قومی مجرموں کو ہر صورت بے نقاب کیا جانا چاہئے