23/09/2026
پریس ریلیز
اورکزئی پولیس کی منشیات کے خلاف بڑی کارروائی، 80 کلوگرام چرس برآمد، ملزم گرفتار
اورکزئی، 23 ستمبر 2026:
ریجنل پولیس آفیسر کوہاٹ ڈویژن عرفان طارق خان کی خصوصی ہدایات اور ڈسٹرکٹ پولیس آفیسر اورکزئی شوکت علی کی زیرِ نگرانی اورکزئی پولیس کی جانب سے منشیات فروشوں اور اسمگلروں کے خلاف کارروائیوں کا سلسلہ جاری ہے۔
اسی سلسلے میں اورکزئی پولیس نے خفیہ اطلاع پر کامیاب کارروائی کرتے ہوئے 80 کلوگرام چرس برآمد کرکے ایک ملزم کو گرفتار کرلیا۔
تفصیلات کے مطابق اورکزئی پولیس کو خفیہ ذرائع سے اطلاع موصول ہوئی تھی کہ رنگین خیل روڈ کے راستے منشیات کی بھاری کھیپ اسمگل کرنے کی کوشش کی جارہی ہے۔ اطلاع کو مصدقہ جانتے ہوئے ڈی پی او اورکزئی شوکت علی نے ایس ڈی پی او سنٹرل اورکزئی سکندر حسن اور ایس ایچ او تھانہ مشتی میلہ حاجت حسین کو فوری کارروائی اور ملزم کی گرفتاری کے احکامات جاری کیے۔
ڈی پی او اورکزئی کی ہدایات پر ایس ڈی پی او سنٹرل سکندر حسن، ایس ایچ او تھانہ مشتی میلہ حاجت حسین، ایڈیشنل ایس ایچ او عامر خان اور پولیس نفری نے رنگین خیل روڈ پر ناکہ بندی کرتے ہوئے مشکوک ویگو پک اپ گاڑی نمبر 2096 سندھ کو روک کر تلاشی لی۔
دورانِ تلاشی گاڑی کے خفیہ خانوں سے 80 پیکٹ چرس، مجموعی وزن 80 کلوگرام برآمد کرلی گئی۔ پولیس نے گاڑی میں سوار ملزم دلبر خان ولد ملک جان، سکنہ قمبر خیل، ضلع خیبر کو گرفتار کرکے گاڑی اور منشیات قبضہ میں لے لی۔
ملزم کو گرفتار مقدمہ درج کرکے مزید تفتیش شروع کردی گئی ہے۔
اس موقع پر ڈی پی او اورکزئی شوکت علی نے کہا کہ نوجوان نسل کو منشیات جیسی لعنت سے محفوظ رکھنا پولیس کی اولین ترجیحات میں شامل ہے۔ منشیات فروشوں اور اسمگلروں کے خلاف بلاامتیاز کارروائیاں جاری رکھی جائیں گی اور منشیات کے مکروہ کاروبار میں ملوث عناصر کے گرد گھیرا مزید تنگ کرتے ہوئے انہیں قانون کے کٹہرے میں لایا جائے گا۔
ڈی پی او اورکزئی نے کارروائی میں حصہ لینے والی پولیس ٹیم کو کامیاب کارروائی پر سراہتے ہوئے ہدایت کی کہ منشیات کے خلاف زیرو ٹالرنس پالیسی کے تحت کارروائیوں کا سلسلہ مزید مؤثر بنایا جائے۔
✍️ترجمان اورکزئی پولیس
