20/08/2026
ٹاؤن میونسپل کارپوریشن نیرون کوٹ، حیدرآباد
جمعرات، 20 اگست 2026ء | 6 ربیع الاول 1448ھ
**ربیع الاول کے انتظامات کے حوالے سے اسسٹنٹ کمشنر سٹی کے دفتر میں اہم مشترکہ اجلاس ۔۔۔
ٹاؤن چیئرمین نیرون کوٹ منٹھار علی جتوئی** نے اسسٹنٹ کمشنر سٹی کے دفتر میں حیدرآباد سٹی ایریا کے ربیع الاول کے انتظامات کے حوالے سے منعقدہ اہم مشترکہ اجلاس میں شرکت کی، جس میں حیدرآباد شہر کے مختلف ٹاؤنز کے چیئرمینز، علماء کرام، مفتیانِ دین، جلسے جلوسوں کے منتظمین، میلاد کمیٹی کے سرپرستان اور دیگر مذہبی شخصیات نے شرکت کی۔
منٹھار علی جتوئی نے اجلاس میں علماء کرام، مفتیانِ دین، میلاد کمیٹی کے عہدیداران اور جلسے جلوسوں کے منتظمین کی جانب سے پیش کی جانے والی تجاویز اور مسائل کو غور سے سنا اور یقین دہانی کرائی کہ ربیع الاول کے بابرکت مہینے میں عاشقانِ رسول ﷺ کی سہولت کے لیے ہر ممکن بہترین انتظامات کیے جائیں گے۔
منٹھار علی جتوئی نے کہا کہ ماہِ ربیع الاول حضور اکرم حضرت محمد مصطفیٰ ﷺ کی ولادتِ باسعادت کی خوشیوں کا مبارک مہینہ ہے، اس لیے ان شاء اللہ ٹاؤن نیرون کوٹ کی جانب سے اس مقدس مہینے کے تمام پروگراموں کے لیے بھرپور انتظامات کیے جائیں گے۔
انہوں نے کہا کہ علماء کرام اور منتظمین کی جانب سے رکھے گئے تمام مسائل اور مطالبات کو ترجیحی بنیادوں پر حل کیا جائے گا۔ لائٹنگ، صفائی ستھرائی، نکاسیٔ آب، سڑکوں اور راستوں کی صفائی سمیت تمام ضروری بلدیاتی انتظامات کو بھرپور انداز میں مکمل کیا جائے گا تاکہ جلسوں، جلوسوں اور میلاد کی محافل میں شرکت کرنے والے عاشقانِ رسول ﷺ کو کسی قسم کی دشواری کا سامنا نہ کرنا پڑے۔
منٹھار علی جتوئی نے مزید کہا کہ ربیع الاول کے تمام پروگرام عقیدت و احترام، امن، محبت اور بھائی چارے کے ماحول میں منعقد ہوں، اس مقصد کے لیے تمام متعلقہ اداروں اور مذہبی تنظیموں کے ساتھ مکمل تعاون جاری رکھا جائے گا۔
جاری کردہ:
شعبہ اطلاعات
ٹاؤن میونسپل کارپوریشن نیرون کوٹ، حیدرآباد
