12/08/2026
آر آر ايف سي ايم يو جا 2100 ميرٽ تي چونڊيل اميدوار 8 مهينن کان اپائنٽمينٽ ليٽر جا منتظر
آر آر ايف سي ايم يو ۾ ڀرتي لاءِ اميدوارن پاران وڏي عرصي کان اپائنٽمينٽ ليٽر جاري نه ٿيڻ خلاف آواز اٿارڻ جو مطالبو ڪيو ويو آهي.
اميدوارن موجب مجموعي طور 3850 جايون نڪتيون هيون، جن لاءِ تقريبن 20 هزار مرد ۽ عورت اميدوارن فزيڪل ٽيسٽ ڏنو. فزيڪل ٽيسٽ ۾ لڳ ڀڳ 11 هزار اميدوار پاس ٿيا، جڏهن ته لکت واري ٽيسٽ ۾ تقريبن 6 هزار اميدوار ڪامياب ٿيا. ان کان پوءِ انٽرويو واري مرحلي ۾ لڳ ڀڳ 2300 اميدوار چونڊيا ويا.
اميدوارن جو چوڻ آهي ته انهن مان ايس پي يو جا تقريبن 190 اميدوارن کي اپائنٽمينٽ ليٽر جاري ڪيا ويا، پر آر آر ايف سي ايم يو جا لڳ ڀڳ 2100 چونڊيل مرد ۽ عورت اميدوار اڄ تائين اپائنٽمينٽ ليٽر جا منتظر آهن.
چونڊيل اميدوارن موجب 8 مهينا گذري چڪا آهن، پر هر ڀيري کين ”هن مهيني“ يا ”ايندڙ مهيني“ اپائنٽمينٽ ليٽر ملڻ جون خاطريون ڪرايون وڃن ٿيون. اميدوارن جو سوال آهي ته جيڪڏهن هو ميرٽ تي چونڊجي چڪا آهن ته پوءِ کين اڃا تائين مقرر ڇو نه ڪيو پيو وڃي؟
اميدوارن سنڌ جي آءِ جي، وڏي وزير ۽ گهرو وزير سنڌ کان مطالبو ڪيو آهي ته معاملي جو فوري نوٽيس وٺي، آر آر ايف سي ايم يو جي سمورن 2100 چونڊيل اميدوارن جا اپائنٽمينٽ ليٽر جلد جاري ڪيا وڃن ۽ سندن جائز حق ڏياريو وڃي.
